مقتطفات من شعراء مطير

[عزيز بن لامـي]

السلام عليكم ورحمه الله وبركاته

اما بعد ..

أحبتي مشرفي .. أعضاء ... زوار ..
منتدى الجبلان ( بيت الجبلان )

وأنا أفتر في بعض المنتديات قريت لي موضووع رائع وحبيت أظيفه لمنتدانا لنه يظيف للمنتدى الشي الكثير

وهي كالاتي

جمع أكبر عدد من قصائد شعراء مطير كافه الحي منهم أطال الله في عمره والمتوفي منهم الله يرحمه

وذكر الحي منهم والميت

اي شي تعرفه عن قصايده سواء قصيره ام طويله تاريخيه غزليه مدح

اللي عندك هاته

والهدف من الموضوع هو جمع أكبر عدد قصائد شعراء مطير حتى يكون م رجع لي واحدد يشكك لمنو القصيده

أتمنى من الجميع المشاركه وأظافة مالديه من قصائد لنه يخدم القبيله اولا وهذا المهم

وذا نجح الموضوع اتمنى من المشرفين التثبيت حتى يكون مرجع لي و احد يبي يعرف قصايد شعراء مطير

وأخيرن

أتمنى يكون الموضوع عجبكم




عبدالعزيز بن لامي

[عزيز بن لامـي]

وهذي البدايه عندي
ونبي من الجميع المشاركه وشد الحيل







الشاعر سحلي العواي البرازي المطيري

من البرزان من مطير اللة يرحمة وقد توفي عم 1998 بحفر الباطن ..

هو صاحب القصيدة المشهورة عندما حاول احد كبار رجال الاعمال بحفر الباطن ان يغتصب المنحة الممنوحة للعواي بشتى الطرق وساعدة ضعاف النفوس بالدولة عند ذاللك قام الشاعر الكبير /سحلي العواي بالذهاب الى وزارة الذاخلية وطلب مقابلة سيدي وزير الداخلية وبالفعل قابلة وكان مع الامير ابنة نواف ابن نايف وكان واقفا بجانب والدة فتقد سحلي العواي وقال قصيدتة المشهورة بالشمال





ياسيدي زل الشتاء واقبل الصيف
وانا برجوى معاملات الحكومـه
تلعب بي السرقان لعب على الكيف
رزّت بيارقهـا ونجـد محكومـه
وانته عليك من المحلى تواصيف
الحر حر وماكـر البـوم بومـه
ياعل بيت مايذري عـن الحيـف
تصبح معالـم مبانيـه مهدومـه



عند ذالك سال الامير نواف والدة وزير الداخلية يبو ويش يقول البدوي قال والدة سمو سيدي وزير الداخلية يقول اذا ما عطيتوني حقي سوف تطيح القصر فبكى الامير نواف وامر وزير الداخلية بامر صريح ان يستام العواي منحتة من بلدية حفر الباطن .


وله :



هجي ترى خاطري ملموس
يا بكرتـي يـا الحويطيـه
تنحـري كاسـب النامـوس
معطـي البواريـد خرجيـه
انا ليـا دق بـي هاجـوس
مانـي ولـد عـن وعطيـه
انا خويـاً لحبـس حبـوس
مانـي خويـن لكرجـيـه
ما اطمن الراس تحت الروس
تزعـل علـي المطيـريـه



وكذلك :
ياهيه يا اللي تا تسافـر لملحـان
ود الرسالـه يـم راع الرسايـل
أنا على شوفه شفاوي وشفقـان
لو أن مالـي حاجـةٍ يـم حايـل
ودي بشوفه مير عاجز وتعبـان
وعليه من درب المراجـل دلايـل
يابو مشاري ياسلايـل كحيـلان
صابر وأنا أشوف النكّر والهوايل
حنا وقت اليوم يا أميـر عميـان
الحق غـادي والشـداد أمتمايـل
أمر الحفر بيدين عوده وعثمـان
عقب الرجال اللي تقود الأصايـل
اللي يقودون السبايـا بالأكـوان
فرسـان يـزون العـدو الغلايـل
كم واحدٍ داسوه مـع فجـر الأذان
كونٍ على الأجناب والسبر صايل
اللي مخابطهم وراء حزم حـوران
يوم الحضير يجمعـون الجوايـل
اليوم حضر سدير سوت لها شان
شاخت وأورتنا أنجـوم القوايـل
وحنا غدينا بينهم مثـل عـدوان
متفرقيـنٍ عقـب هكـا القبايـل
حطننٍ أدوج وين قضاب الأرسان
أن كان غرّت منك مامن عقايـل
سوت بنا حضران ورقه شمعدان
أصبر ليـال وياخـذون العوايـل
ماعاد به واصل ولا فيه صعـران
أقفت علينا ما بهـا قـول قايـل
والضابط المسؤل عنـا سليمـان
لو أنت راعي حق سواك عايـل
هاذي علوم أبريه من غير نقصان
خذ الصحيح أن كان عنا أتسايـل
ببيوتنا بـس أنتراعـا بالأعيـان
الذيب رابض والسلوقـي يفايـل
البيت مايبنى على غيـر عمـدان
وين العمود اللي يشيـل الثقايـل


وله :

يازين شب النار بأرض بياحي ** والزول يزميلي على مد شوفي
والبيت مبني والرعايا ضواحي** وانته تمشى مع نبات الحروفي
أخير من ذبحا بليّا سلاحي** بقبوت الحيين مثل الضعوفي
ببيوتنا مثل الدجاج المداحي** متشفقا عقب الشداد الردوفي
ياوب خلف صاحي ولاني بصاحي ** بس اتلفت مثل راس الخروفي
خروفا ادلم مايعرف المتاحي ** وراعيه جابرته عليه الظروفي
ابكي على وقت حضرته وراحي ** اتلاه يامحمد نهار الكسوفي
ياحيف وين موردين الرماحي** اللي نهار الكون تروي السيوفي
يالخس وين مطير هكالنواحي** سلفان مثل مزبرات القنوفي
تسايروا ثم صوتوا بالفلاحي** هيهات ياما فرقوا من شفوفي
خذتهم الدنيا هجاد وصباحي** وحنّا بقينا عقب هكالصفوفي
صار العوض فيهم خطاة الضياحي** ياعنك ماكدٍ عليه مخلوفي
البطن ماتلحق عليه الشباحي** وان نام ماياعي كبير الدفوفي
يالخس يومنه تكسر جناحي ** ماني على الدنيا كثير الحسوفي
اليوم موتي والحياة متواحي** يابو خلف منكف وعايف وموفي
الى تهيالي غزال البراحي** مالي بصيد مخبطات البلوفي
يابو خلف ذا منهجي واقتراحي** وانته على رد المثايل عروفي


وللشاعر الكبير المرحوم سحلي العوّاي هذه القصيدة في الامير محمد الاحمد السديري ويسندها على إبن أخيه فهيد وللمعلوميّه أنّ الشاعر سحلي تزوّج ولكن لم يأتيه أولاد ويقول فيها :





يافهيد وقتٍ بينـت لـي حـزوزه
أهوش من دونك بحاضر ودينـه
مشافت حتى الدوج طاحت قزوزه
من كثر مايسحب علـى بانزينـه
من اولٍ جايز وفـوق المجمـوزه
واليوم خلـه نـوح خـلا جنينـه
خلّه لعلّه يبـن سحلـي همـوزه
لحقت على العطراء وابو زيد وينه
لو آصله كان أشتـري مايعـوزه
ابدّلـه وإلاّ اشتريـلـه مكيـنـه
شيخٍ مجرب من وراء الناس نوزه
ماهو بنا كـل العـرب خابرينـه
أمارته ماهـي عليـه مغـزوزه
ساسٍ عريب وتلّهـا فـي يمينـه
محمد الى جتـه اليديـن معيـوزه
زاد بعطاه الى اشتلهبـت سنينـه
ياما عطا أطيب ماطلع من طروزه
من وارد السبعـه تفـرق يدينـه
وإلاّ خطاة الشيـخ ينكـب فـوزه
يابس عسى تابس يدينـه وعينـه

[عزيز بن لامـي]

البستــان محمد خلف الخس

(1)



بالله ياهـل البيـت لاتشلعونـه
خلوا عيوني من حبيبي تـروى
ثم لاتهوزونـه تبـا تضربونـه
جعل اليدين اللي تطقـه تكـوى
جلده حريرٍ لـو تبـا تلمسونـه
مثل النفل لو تلمسه لمـس ذوى
غروٍ نياشين الغلا فـي عيونـه
يضحك ويشرلي على القلب جوى
يقـول هـذا لـك ولايقربونـه
وابو الذي يزعل بعشرين ضوى
وانا مليك ارضاه ماجوز دونـه
قلبي معه في يديه من حيث موى
حيث اني افهم ماخفى من ضنونه
وادري بقلبه مـن قديـم وتـوى
واخشى عليه من العرب ينضلونه
انا اشهد ان اللي مسويـه سـوى
نبنوب موزٍ مايـلات غصونـه
عرقه من الجم الـزلال يتقـوى
والخد بـراقٍ تكاشـف مزونـه
مثل المشاعل في مقاديـم نـوى
عنق الغـزال مخلعـاتٍ متونـه
والثوب من فوقه عليه يتطـوى
في خاطري مافالبشر مثل لونـه
مما خلق ربي مـن ادم وحـوى
الله على من شد مجمـع قرونـه
واكنع عليه وفي رقبتـه تلـوى


(2)



يامرحبا يااللي لـك القلـب مفجـوج
عـداد نسنـاس الهبايـب ليـا فـاج
حطيت ريع بوسـط القلـب هجهـوج
ياعيـن حـر بالخضيـرا ليـا راج
حبك طفح بي طفحت الساج بالمـوج
ماعاد لي عن حبـك اليـوم مخـراج
اودعتنـي لاشـرب ولاكـل ولادوج
ولاستطعم المنطوق من كـل هـراج
لاغبت عنـي دق بـي كـل دالـوج
قامـت تواردنـي هواجيسـي ازراج
قلبي يجينـي نـوج واضيعـه نـوج
يجيه مـن فرقـاك سجـه وسوهـاج
كن البنات الشقر عندي مـن الهـوج
ماكن به غيـرك علـى الارض دواج
عندي جميع السن بنات العرب عـوج
الا لسانك فيـه لـي طـب وعـلاج
في هرجتك شئ من السحـر ممجـوج
والنور مـن غرتـك يطلـع وينبـاج
وليا ضحكـت بذبـل مابهـا فلـوج
مثل البرد مـن مزنـة تلعـج العـاج
واغضيت في سودن بها السحر مدعوج
ترسل سهوم الموت من حجره افـواج
تنثـرن شقـر مثـل كاسـي الغـوج
تاصل اليا ردف كما حـزف ديبـاج
جاني بـلا فالقلـب يسوجنـي سـوج
يتلنـي يمـك لـك الـروح تنعـاج
كني اليا شفتك على انهـار وبـروج
والاملك شعبٍ علـى راسـي التـاج
واليا بديت بضحك وهروج واغنـوج
قلبي غدا زبده على صالـي الصـاج
او مير كني بين الاضـلاع مخجـوج
بشلفا مثـل شلفـا غنيـم بـن فـراج
غنيم بن شبلان مخلـن لـه سـروج
ليا صاح في تالي الرمك راحت امراج
تبـا تخلينـي مـن العقـل ممـروج
على العمـر شامـان تدرجنـي ادراج
ياروح روحي كـان مامنـك منتـوج
خف الغلا لاعـاد تحرجنـي احـراج
خليتني يازين الاوصـاف محـروج
صليت فيّـه شـرق ماعـاد يحتـاج
لـو قلـت سيـر وخـذ عندنـا روج
جيتك على الاقـدام ممشـى ودفـلاج
اجي وانـا مبهـوج واروح مبهـوج
ليا حصل لي منك لو رفـة احجـاج




(3)
راكب اللي تقـول مذيّـر ذاعرينـه
سامعٍ صقعة البندق وهـو مارمقهـا
يوم فـز وتشمحـط للمبنـدق بعينـه
حاذفٍ صفرة البندق وهـو مافهقهـا
وانصفق مقفي تاصـل لحيّـه يدينـه
لو يباري القطاه اللي تقلـب سبقهـا
اشقرٍ من نسـل شقـران متخيرينـه
من حرارٍ يعرفون الرجـال معمقهـا
اوصله شاعرٍ كل العـرب خابرينـه
كم بيوتٍ مثل نظم الجواهـر طرقهـا
هو حميد الرشيـدي كلكـم عارفينـه
المعاني مع اهل العرف يفتـح نفقهـا
سلـم الله رجـاه وسلـم الله يميـنـه
حيثه الكلمة العوجاء ماعمره نطقهـا
باغ ٍ اخبره فـي علـم بينـي وبينـه
الامانه غدت وامينهـا اللـي سرقهـا
لو حلف لي بوجدانه وربـه ودينـه
ما أقبل العذر لو انه بغيـره لصقهـا
وانت تدري لاشك الحق وينه ضمينه
وين حلال مشكلهـا ومـدّي رفقهـا
ياحميد الطرب والانس راحت سنينـه
مع سنين ام خمس اللي تشاعل فشقها
في يدين الـذي مضرابهـا حافظينـه
عند تال الركاب اليا تناضـح عرقهـا
في نهارٍ يفـر المـرء مـن والدينـه
تذهل المرضعه عن حملها من رهقها
يظهر الحق هاك الوقـت لمدورينـه
كانها طارت الابصار ممـا طرقهـا
واكرم الناس بالذمـه يهّمـل جنينـه
لو يبا كبـر حبـة خردلـه مانشقهـا
يالله العـن ابليـس وعالـمٍ تابعينـه
عالمٍ ماتراقـب ربهـا اللـي خلقهـا
الزمان اختلف والخلف من وارثينـه
والضمير انعدم والناس اخذها وذقهـا
لو تطالب بحـقٍ والعـرب شايفينـه
قيل لك فاتت الدعوى وشربت مرقها
واصبح الحق في وسط البحر حاذفينه
وان تكلمت يالرجال طالـت شققهـا
وانفتح باب حسادك على مصرعينـه
واركبت حصنها العالم وهدت سلقهـا
يامكافي تكافي شـر الارض ودفينـه
وإبعض الناس ليت الله سحقها ومحقها
كود من فيه خيرٍ جعل ربـي يعينـه
والبشر خلق ربي مير ربـي فرقهـا
فيه من ينفـع العالـم وينـدا جبينـه
وإبعض الناس ماودك تعرض شبقهـا
مير با قول بأعلى القيـل ياسامعينـه
واطلب اللي خلق سبع البحور وفلقها
جعل ربي يعز الدار مـع حاكمينـه
ديرةٍ كل من جاها شبع فـي شنقهـا
من فضل قايد الدولـة ومـا سابقينـه
شبعت الناس وارتاحت وربي رزقها
والحسد والنكد يرجع علـى فاعلينـه
والقلوب الغشيشه جعل يابس ورقهـا

(4)
هلا ... هلا يأم العيون المظلـه
اللـي بعينـي مالهـن حـلايـا
فيهن تقول طـراد خيـلٍ وسلـه
اما هـل الـردات والا الطنايـا
لا احذفو عـن المهـار الأجلـه
وردوا لبيـضٍ كنهـن الحنـايـا
ورداتهم تشفي القلـوب المغلـه
من غير حقرانٍ لباقـي النحايـا
يا بنت من ينطح وجيـه المهلـه
زيزوم عيـراتٍ ومقـدم سبايـا
مع دربه العيرات مثـل الأهلـه
دايـم سماريهـن تتالـى حفايـا
العذر منك اني فلا قلـت زلـه
لا طاب حظ مصورين الحكايـا
ما فيك ما ينقال فـي كـل ملـه
وعذروب أهلك يعدلون السرايـا
والزين فيك أحلا الوصايف مدله
مالك بغضـات الصبايـا تهايـا
شمسٍ على روس النوازي مطله
شعاعها يرسـل سهـوم المنايـا
لا بانت الغـره عليهـا اسـم الله
بأطرافها تقـل يتكاشـف مرايـا
مثـل البـروق بمزنـةٍ مستهلـه
توضي وكاسيها أشقرٍ له زوايـا
ما شفتهـا الا ساعـة مستزلـه
يوم العياد ويوم ذبـح الضحايـا
فالماقع اللي شافها النجـع كلـه
تلعب نهار العيـد بيـن الصبايـا
بحجاجها سيفٍ من الهنـد سلـه
تشرق وترهق موسعين الهوايـا
فأن كان هذا سب أنا راعي لـه
يا سيـد كـل مفلجـات الثنايـا
وانا ما أسب الناس طبعي جبلـه
لو كان أشوف الناس تمشي عرايا
إلا ليا جـاء شاعـرٍ فيـه خلـه
مضيـعٍ دربـه وعنـده نـوايـا
اعطيه علـمٍ ليـن دربـه يدلـه
واسنعه بالـي يسـوق المطايـا

(5)



يقولون قلبـك دايمـاً للقنـص يتـوق
وانا اقول هذي رغبـةٍ لـي وعاشقهـا
انا ليّ رغبـه والصقاقيـر فـن وذوق
يعرف الصقار مـن عشقهـا وتشبّقهـا
وانا رغبتي وهوايتي شي يـا مخلـوق
هوى البر في غرب الديار ومشارقهـا
ليا جيت روضٍ فيه مختلـفٍ الزملـوق
نبانيب نبتـه ناعـم الريـح يطرقهـا
مساقيه نوٍ ممطرٍ بـه رعـد وبـروق
تهشم مزونـه فالوطـا ليـن يغرقهـا
عقب سيلة العشب يتعـلاّ نباتـه فـوق
تشوف الفياض من النبات وتضاوقهـا
تشوف الزبيدي كنه المـرو فالرقـروق
والأشجار ظاهرٍ الزهـر مـع مفاتقهـا
ليا دجت فيه عصير والاضحي شروق
يونّسك شوف البـرق فيـه وتخافقهـا
وانا في يدي شيهانـة جنسهـا يلـوق
لو الخارم المقفي علـى الخفـو تلحقهـا
ليا ظفت الجنحان كن السمـا مشقـوق
سوات السهم والعين مـا عـاد ترمقهـا
عليها اطيارن يبهر الحاكـي الصـدوق
وفعـلٍ يحبـب فالشياهيـن وطرقهـا
ليا شقّت الداغر على القلـب والمعلـوق
تعجّـب ولله العجـب يـوم تشلقـهـا
اناستك ياراع الولع جعل مالـك عـوق
لعـل السلامـة فـي حياتـك ترافقهـا
أخذ فالقنص ياللي تحب القنص غدروق
ترى ونستك في آخر حياتـك تشفّقهـا
يقوله لك اللي ما يبا شربـة المطـروق
عسى الله يوسعهـا لنـا مـا يضيقهـا
لياجيت قاعٍ عشبه طبوق فوق طبـوق
تساقيه سحـبٍ كـن الأنهـار مدافقهـا
ما والله اغبط اللي يحبون ظول السـوق
ولا أحب ادوّج فـي الديـار وحدايقهـا
احب المطر والخيل واحب شوف النوق
واحب الهنوف اللي تكاشـف عواتقهـا
ليا صار مع جمالهـا عقلهـا ماثـوق
ليـا شفتهـا تقـول سبحـان خالقهـا
عيون المهاه وعاتـقٍ مـارقٍ منتـوق
وخدٍ كما شمس الضحي فـي تشاعقهـا
تبسّم ابيـض ذبّـلٍ مـا بهـن فـروق
كما الحص مـن محـارةٍ يـوم تفلقهـا
ليا شفتها قام يحدانـي عليهـا الشـوق
ولوهو بكيفي كـان والله مـا فارقهـا
لجّود معضّ الذيب حاضر ما هو مفهوق
واشم الخدود اللي كما الـورد وانشقهـا
هذي رغبتي وهوايتي والاّ العمر ملحوق
ولي رغبةٍ في الحـر الأشقـر محققهـا
واحب اللذي به لون من ريشة الغرنوق
به الميزة اللي راعي الصنـف يعشقهـا
اليا صار فوق الوكر ماكن فيه سبـوق
سراويلـه تغطـي كفوفـه ذلايقـهـا
عذاب الطيار الخارم المقفـي السبـوق
ليـا شافهـا مافادهـا طـول سبّقهـا
اليا من لحقها فالهوى ساق روحه سوق
كما سوق ميراجٍ عطى النـار سايقهـا
ضربها بمخلابٍ يخلاّ العظـام فتـوق
فراها ومن حرصـه تنكّـس وعلّقهـا
وعطيته من الداغر نسورٍ يذوقـه ذوق
علشان يرمـز لختهـا حيـن يرمقهـا
ليا صادها اللي لاطرد مرهيٍ بلحـوق
بقـاعٍ خضـاره كـل عيـنٍ يشوقهـا
هزعت وشعمت النار فالحاجر المرموق
وخوياي ربعٍ تعجبـك فـي طرايقهـا
نشاماً توسّع خاطر الضايـق المغلـوق
على المرجله والطيب عجـلٍ تسابقهـا
يجي شغلهم لاهـو بنـيٍ ولامحـروق
تسوّيـه أيـادٍ جعـل الالـه يرزقهـا




(6) ((شيخة الغزل))



انا لي ثمان سنين اجامل وانا مجـروح
اكن الموده داخـل الصـدر واكتمهـا
يجيني بلاً صندوق قلبي يزوحـه زوح
خطيرٍ معاليقي مـن القلـب يصرمهـا
سبايب مـودة جـادلٍ مابهـا مصلـوح
تبهذلـت منهـا مابـه احـدٍ يعلمـهـا
يقول ارحمي روحٍ تبلت لها فـي روح
هي العوق والاسباب مانـي بضالمهـا
خذتني وجرتني بضحكة غلا ومـزوح
تهايفت معها ليـن طحـت بمراحمهـا
غرقت بغلاها مغرم مثل غرقـت نـوح
ولاادري عن ايام الغـلا وش خواتمهـا
وانا مبتلٍ فيها ولالـي وراهـا شبـوح
مفاتيـح قلبـي فـي يديهـا مسلمـهـا
اليا قلت خفي حبك اللي تعـدا المـوح
تجيني بنغمات ٍ على القلـب ترسمهـا
تجيني باساليبٍ تزيد الجـروح جـروح
خذتني بضحك احجاجها مـع تبسمهـا
تبسم بيضٍ كنهـا اللولـو المصحـوح
او الـدر مـن بكـرٍ سريـعٍ ترزمهـا
عليها الحلا والملح كنك تكوحـه كـوح
حضيض الفؤاد المسعد اللـي لايمهـا
هاك الغره اللي مثل برقٍ لنوره ضـوح
سنـا مزنـةٍ ترعـد وتبـرق مقادمهـا
عن المترفات الضمّرالعقش فيها نـوح
تحشر النفوس اللـي قـويٍ عزايمهـا
تمريع مثل زملوقةٍ في محير الصـوح
عدلها النسيـم ورايـح الوبـل داهمهـا
اليا شافها راع النظـر حـار مايـروح
تكلم حشـى لله ماهـي مـن اوادمهـا
لاهي حص لاياقوت لاجوهرٍ مطـروح
تقـل فضـةٍ مصبوبـةٍ مـن مناجمهـا
هوافٍ خواصرها الجدايل عليها سبـوح
كساها اشقرٍ ياصل اليا الردف ضايمهـا
مثل ذيل شقراً ماعليهـا ثـلاث قـروح
تكـم السبايـا يـوم تطـرخ قوايمهـا
اليا سلهمـت بعيونهـا عدنـي مذبـوح
تبنجت حتـى كلمتـي مقـدر ابرمهـا
هذا هو بلاي وهو سبب جرحي المفتوح
من اسبابها افـرق هجوسـي واليمهـا
عديت وتعبت وطحت والكبد فيها فلوح
تهيج الجـروح ولاش شـئٍ يدمدمهـا
علي الخطر وشلون تلعبـي الشحـوح
مثل مالعبت بغيرهـا صـرت رايمهـا
على كيفها تومي بقلبي سـوات اللـوح
بلاي الغلا اللي بسرة القلـب واسمهـا
حلايا المهاه اللي ذعرها دبش وسروح
وراهـا تشـب النـار فيِِِِِِـه وتشعمهـا
ليا جيت ابا ازعل ردني حكيها المملوح
يجيني بـلاً حتـى عيونـي يغمغمهـا
جدايه جدا ورعٍ جـداه البكـا والنـوح
يبـا حاجـةٍ مخفيتـن امـه معالمهـا
يالولا يالولا ان الخطا فاعله مفضـوح
ماعود محيم وعبرة الصـدر ازايمهـا

[FJ20]

عزيز بن لأمي,,,
لي عودة...
عافاك ربي ...
وشاكرلك...

[عزيز بن لامـي]

اف جي حياك الله وشد حيلك في نجاح جمع قصائد شعراء مطير

شاكرلك مرورك

[حمداللويمي]

آلله آلله عليـــك آخــوي عــزيــز
موضـــوع مهم مهــم في غــآية آلآهميـه
يعطيـــك آلعـآفيه
ولـــي عودهـ بآذن آلله
ونتمنـــى آلتفــآعل من آلآعضــآء

لآهنننننت

[عزيز بن لامـي]

حمد اللويمي شكرآ لتفاعلك مع الموضوع

اتمنى اراك قريبن

[سعود بن لامي]

نايف ابوطفره الجبلي




نسل الحرار القاطعـات الصواريـم=اللي ليـا هـدت تحصـل عشاهـا
من فعلهم كم شيخن اعطى المخاريم=دوشان كان الحـرب دارت رحاهـا
مخرمين اقلـوب الاعـدا اتخريـم=الشجره اللي جعـل يبطـي ذراهـا
اللي بدع زين التماثيـل فـي ريـم=وهيض علي فبيوتـه اللـي بناهـا
ليه ثلاث اسنين ضميـان ومحيـم=ومتركن اهل الهـوى مـع غثاهـا
لكـن ذكرنـي علـي المـلازيـم=طرا وعينـي جنبـت عـن كراهـا
لي صاحبن حالت عليـه المقاسيـم=قفا وعينـي جابـت اللـي وراهـا
عليه قلبي بـه اجروحـن مثاليـم=قفا ونفسي ويـن احصـل دواهـا
ابو قرونن فـوق ردفـه مجاهيـم=سـودن علـى هكردايـف طواهـا
والخـد بـراق المـزون المظاليـم=يبـرق مقادمهـا ويبـرق قفاهـا
حلياه و ضحـا ماعليهـا مياسيـم=ترعى بضف مطير ربعـي حماهـا
اليا غشا الصمان مزنـن مراديـم=دهمن غيومـه والنواظـر شعاهـا
تسعين ليلـه ماشيـات المرازيـم=وتسع الخباري وبل غيثـه ملاهـا
ويخضر عقب مزنن غداله تهاشيـم=من مدت اللي كـل نفسـن ولاهـا
ترعاه لين يصرم العشـب تصريـم=ترد الطوال ان كان قيضـه حداهـا
خرسن عيونه يوم سلهم اتسلهيـم=شيهانتن عين الشبـك فـي يداهـا
اقفت اضعونـه ماحصلـي معاليـما=تلا العهد به يـوم كبـدي كواهـا
اهل الهوى الحـال دايـم مهاضيـم=حال المولـع دايمـن فـي عناهـا
وطوي حالي طويت السيم بالسيـم=الحـال ولـت حسبـي الله علاهـا
الاسم ريـم وصفهـا قايـد الريـم=وشلون تنسـى خيـب الله رجاهـا
امست اعروق القلب عقبه مفاطيـم=وجفت احروفه عقب طوت ارشاهـا

[عزيز بن لامـي]

الشيخ الشاعر الفــارس جهز بن شرار


اشتهر الشيخ الفارس الشاعر:جهز بن فازع بن شرار الميموني من شيوخ بني عبدالله من مطير بالصدق بين القبائل خاصه في الشعر حتى انه اطلق عليه لقب شاعر الشعار بين الحكام وشيوخ القبائل .
كان الملك عبدالعزيز يحبه من اجل صدقه ويقول له اني احبك ياجهز من اجل الصدق,وكان وفيء عند ابرام المعاهدات وغيرها,مماجعل له الهيبه بين الرجال والرّعب في قلوب الاعداء,والميزه الثانيه اللتي يمتازبها عن غيره,انه لايعتدي الا على من اعتدا عليه ولايقارض الا من يقارضه,وله عدة قصائد يصف الوقعات اللتي تحصل عليه من الاخرين وله قصائد في النصح والوصايا وغيرها .

مما قال


ياهل العيرات خلوهن شلايـل
يم ابوتركي وتبراهـن عبيّـه
ماتجي بالسوم من كل القبايـل
يوم خفنا منه جبناهـا هديـه
نجد من قبله تعشاها القبايـل
وانت يامحفوظ قنّعت اعشويه
حاكم الحكيم حلحيل المحايـل
خالط الافعال بابصارٍ قويـه
ياعشير الترف منسوع الجدايل
يوم اخذتم نجد ابي منكم حذيّه



كانت الاعوام الغابره حافله بالتوترات القبليه والاطماع على اشدّها والحذر الشديد يلازم رجل الباديه ولايطمئن على حلاله من السلب بين فتره واخرى ولكن ذلكم لم يكن شيئا غريبا بالنسبه لهم حيث تعودوا على الغارات المتبادله


وعندما لانجدهم ينفجعون على ماقد يفقدونه نتيجه للغارات القبليه المستمره المعتاده بين الاينه والاخرى ولهذا نجد الشيخ جهز بن شرار من الاشداء وكثير المغازي ولكن الحزن كما يذكره الشيخ جهز في قصيدته التاليه يبدأ عندما تكون الفرص غير سانحه والابواب مغلقه والحاجه الماسه متباينه للأعيان

يقول فيهـــا




يالله يارفّـاع سـبـع السـمـوات
ياللي بمدات العطاء ما انت بمشيـر
تمدنـي عـن العطايـا الردّيـات
امـا عطايـا غبـر والا معاذيـر
قولوا لأبو معتق رفيقي بمـا فـات
لو احرز الميراد ما احرز مصادير
ماتخبـره يازبـن تـال الونيّـات
اللـي ورد ماتخبـره بالمصاديـر
لـو ان بيبـان الخرايـم مخـلات
ماكثّـر الميقـاف بيـن الدواويـر
نرجى العطاء من عند رب السموات
فوق النضى ومعسكرات المساميـر
مار ان لبيبان الخرايـم حراسـات
وغير الحرس حطوا وراهن نواطير




كان الكيف عند الباديه قديما من اهم مقومات الحياه
وكانت تساق على الرجل قبل من ادنى منه
ايضا
لهم فيها ذوق خاص ورفيع للغايه

وكان عند الشيخ جهز عامل قهوه ولكن ليس ماهرا بعمل القهوه ممايفقدها كثيرا من ميزاتها
وقال فيها رحمه الله




ياعنك مافنجال راشـد بمشهـاه
ينيـه والا يدّغثـه بالسريـبـي
ودك الى جاء الشول راس مضماه
انه يقف له فـوق راس القليبـي
وان صدرت من كوكبا راهيا ماه
الى العرق من صابره له صبيبي



امتاز الشاعر جهز بسهوله الابيات
وكثره حفظها
فهو من اكثر الشعراء الذين تتناقل ابياتهم حتى في الوقت الحالي وبكثره
وكان يلقب ايضا بلقب

الشــاعر الصدوق

يقول فيها




يم فاضه مطربه جانـا عشيـه
يتمنى اللي حضر بالكون غايـب
يوم جات افزوعهم من كل نيـه
خيلهم والجيش دقلاتٍ غصايـب
نحمـد الفعّـال واللابـه شويـه
يوم سلمت روسنا وانجى الركايب
سلئل الحضـار والذمـه بريـه
عن مواقف ربعنا يوم الغصايب
المواقـف لهلهـا ماهـي غبيـه
والكرب بالضيق عند الله وهايب
اخبر الغايب ترى عنـده زريـه
واعذريني يامنسعـت الذوايـب
نورد الهايب على روس الرعيـه
وفايت الارزاق مايوخذ غصايب



وله ايضا




العقله اللي مادهلهـا العطينـي
حنا الى هيبت نقطـن شفاهـا
ولاهي بعادتنا كلاب القطينـي
تنبح سلف وردا على جال ماها
ولاهي تحوز بيوتنا بالبطينـي
عن وجه ركبانا بعيدا مداهـا




كما يقال إن جهزاً مجاب الدعوة فقد قتلت فرسه فطلب من والده فازع أن يعطيه الفرس ليغزو بها مع الغزو على احدى القبايل لأن فرسه قتلت لكن والده رفض أن يعطيه الفرس لأنه قد وعد شخصاً اسمه كديميس بالفرس فكره أن يخلف الوعد وفعلاً أخذ كديميس فرس فازع بن شرار وفي الصباح تأهب الغزاة ثم توجهوا في طريقهم الى الوقعه أما جهز بن شرار فقد جلس على رجم مرتفع من الأرض وأخذ ينظر إلى الغزاة ولا يستطيع الذهاب معهم أن فرسه قد قتلت فقال:



يوم اسهجني نابيـات النسانيـس
الموت عندي والحيـاة متسـاوي
عسى فقيدة قوم فـازع كديميـس
يضرب برمح بين الأضلاع هاوي
الله يجيبه لـه علـى دارة الديـس
بمشلشل عـوده طويـل رهـاوي
اما أنت يا مثال ولا أنت يا نعيس
حيـث انكـم قدامهـم بالحـراوي
حيث إنكم فرّيس وعيـال فرّيـس
أهل امهار الخيل ما أنتم شـواوي




أجاب الله دعوة جهز بن شرار فقد ضرب مثال ونعيس كديميسا برمح طويل رهاوي كما قال فقتل كديميس وأخذت الفرس ولكن القبيله عندما سمعت بقصيدة جهز بن شرار ومدحه لهم ارجعوا الفرس إلى صاحبها

ويقول الشاعر جهز بن شرار في الفخــر




كم ذود مصلاح نحرك له أسباب
وحنّا إلى شا الله نشتـت نويّـه
إن جيت أعدّ أكواننا عدّ وحساب
كواينن بفعـول ماهـي خفيّـة
بالطيب تشهد لي مغاتير شبّـاب
وكاين سبيع بـوادي القنصليّـة




للأمــانــه مــنــقــوول

[سعود بن لامي]

قصـيدة شـــاعر( غطفــــــان ) هايف بن نعيم البديري المطيري رحمة الله عليه




ذكرت الله قبل أبـدي كلامـي/آلـه العـرش رب العالميـنـا
هـو الخـلاق والـرزاق حقـاً/وحكمـه نافـذاً بالغيـب فينـا
ابـدي خالقـي قـدام خلـقـه/عسى الرحمن للصـح يهدينـا
أنا أسف على بعـض القبايـل/تعـد فعولنـا عكـس عليـنـا
تقول الكذب ما تخشى الملامـة/وحنـا للفـعـول مترخيـنـا
فعول الناس ما تؤخذ همـا يـا/خسرتـم يـا رجـال مهتمينـا
سكتنا مـرة مـن بعـد مـرة/طمع فينا الردي يـوم استحينـا
ولا نرغـب لتعديـد الفعايـل/ولكنـا علـى هــذا بليـنـا
أخبركم بفعـل مطيـر موجـز/بكلمـة صادقـة يـا سامعينـا
قليـل غالـب مطيرالعريـبـة/على هامات الأعداء قد وطينـا
لنا أفعال تشيـب مـن عرفهـا/يشيب لهو لهـا راس الجنينـا
مناخييـن المربـع والرضيمـة/تذكرنـا المواقـع مـا نسينـا
إلى عـدت قبائـل نجـد حنـا/لنـا التاريـخ فيهـا ألا ولينـا
بها يشهـد لنـا تاريـخ نجـدٍ/سل التاريـخ واللـي كاتبينـا
منوخت الجمل للحـرب حنـا/لهـذا الفعـل حنـا السابقينـا
إلى ناخ الجمل ما عاد يرحـل/على العدوان أم كانـت علينـا
إلى شال الدويش الحمل شلنـا/زعيم مطير من ماضي السنينا
زعيم مطير وأهـل للزعامـة/على ما يأمـر القائـد مشينـا
إلى صوت بحمـران النواظـر/على رهن الإشارة حاضرينـا
إلـى منـا ركبنـا فـوق قـب/ٍلبسنا الطاس والدرع الحصينـا
ووجهنا على جمـع المعـادي/نقص الروس من بيـن اليدينـا
عقيد القوم مـا يملـك شعـوره/تولـي القـوم منـا هاربيـنـا
عن الصمـان نزحنـا القبائـل/أخذناها أجباري مـا أعطينـا
أخذناها على ماجـد غصيبـه/بحد السيـف قـد آلـت ألينـا
ملكـنـا للغـديـر واللهابــة/عليها مطيـر ناديـن وقطينـا
حميناهـا وجودنـا حمـاهـا/تخاف الناس منـا مـا تجينـا
لو أن الأرض تنطق بالوقائـع/يخبركـم منـاخ الجـو عينـا
يخبركم منـاخٍ مـا جـر بـه/بواقعات تشيب المـر ضعينـا
مناخ الجو مـا سمـي تعبـث/ثـلاث مـرار فيـه منوخينـا
دويش مطير مـا يلقـى مثيلـه/قليل مثـل جنسـه مـا لقينـا
له أفعالٍ مـع العالـم رهيبـة/وبالتاريـخ لأفعالـه قريـنـا
ينوخ للجمل في وجه خصمـه/ثلاث شهور وأربـع وشهرينـا
دويش مطير قهـار الأعـادي/بقلـب كالحجـارة مـا يلينـا
يشب النار فـي رأس الطويلـة/عن عيون المعادي مـا أتقينـا
دويشٍ ما أظهر التاريـخ مثلـه/يكـون اللـي علينـا حاكمينـا
ومنهو بالشجاعة مثـل فيصـل/إلـى كـروا عليهـم راجعينـا
ترى حنـا رهيبيـن المغـازي/ثلاث شهور إلى منـا غزينـا
ثلاث شهـور نمشيهـا ذهابـاً/وثلاث شهور مثلهنـه منكفينـا
أخذنـا ثـار مقتـول النقيـرة/نهلنـا مـن دماهـم ارتوينـا
وردنـا وردة الحـر القطامـي/عشا بالجـول بالكـف اليمينـا
أخذنا ثأر من صـوت لعلـوى/وحنـا مـع ذويهـم جالسينـا
لنا عـادات نـروي للسلايـل/جزاء للصوت يوم أنا أنتخينـا
عليل القلب تشفيـه الضياغـم/بحـد السيـف وإلا طلقتيـنـا
تنشد كير عـن روس الطنايـا/وراس جديع حيثه خـان فينـا
تلقبنـا بحـمـران النـواظـر/وهذا اللقب معـروف لا بينـا
قليل غالـب مطيـر العريبـة/إلى منه زمـا العايـل زمينـا
نبيع الروح من دون المحـارم/نحـب الغلـب منـا لا علينـا
ولولا كل مـا قلتـه صحيحـاً/سكتنـا بالمواقـع مـا حكينـا
وهذا مؤجزٍ من فعـل علـوى/وباقييـنٍ مطيـر الأخريـنـا
تسمى القور منا باسمـا شـوخٍ/تعشاهـم ذيــابٍ جايعيـنـا
تعشاهم مـن الحيـن الحنـادى/تحت صم الحوافـر طايحينـا
طرحنا الشوخ من فوق الأصايل/سهوم الموت جتهم مـن يدينـا
على الويلان ناصرنـا الطنايـا/ورديـنـا لعطفـتـم يقيـنـا
خلينا الخيل ما تملـك بعضهـا/نهار الكـون نـروي للسنينـا
كُتبنا عن قدر تسعيـن فـارس/علـى بـاب العـراق معلقينـا
خلينا الـدم يجـري بالمسايـل/بكـون القـرن كـلٍ عافيـنـا
تسميها العرب غـزوة خسـارة/لحيث الضد عـادوا خاسرينـا
وردنا عـد لا داعـي لأسمـه/حدانا القيض يوم أنـا ضمينـا
وطلق مالك المـاء مـا نذوقـه/نصحنـا لـه وطلـق مرتينـا
وقلنا رايكـم يـا آل العوينـي/وقالوا عيب نصدر مـا روينـا
وطردنا الضد من مملك جدوده/وطلقـنـا نـسـاه الأثنتيـنـا
مطلقت النسـاء بالجبـر حنـا/جزاء للي تـرد القـاف فينـا
حجزنا زوجها مـا أنفـك منـا/خلعناها وعـن رأسـه عفينـا
ابـن رشيـد خذينـا جــواده/خذت في ملك فتنـان اسنتينـا
قطعنا راس من خـان لخويـه/أخذنا الثـأر يـوم أنـا درينـا
عطينـا وارث البـراق راسـه/جـزا لوجيهنـا منـه أنتقينـا
صلخنا وجه من خـان لخويـه/وعلـق بالنـقـا للناظريـنـا
وهذا فعـل رجحـان العبـادل/وباقيـن مطـيـر الأخريـنـا
نطحنا القوم لـو حنـا قلايـل/عددنـا عشـرة زايـد أثنيـا
ابن رشيد والعشـرة عـوارض/صناديـد الرجـال الطيبيـنـا
تعاقبنا السهـوم مـن البنـادق/وصرنـا بالسهـوم الفايزينـا
إلـى قلنـا هزمناهـم وولــو/إلى بالجمع الأخرينا قد فجينـا
ثلاث مرار يرسل من جنـوده/ورابـع مـرةٍ جـاء بالكمينـا
وقلنا يامطيـر أخـذوا سددكـم/تراكـم لا مـحـال ميتيـنـا
غدا مثل البرد قفـش الهنـادي/ذبحناهـم وعـدنـا سالميـنـا
طرحنـا سابقـه عـدة مـرار/ابحد الجال مـن حـد البطينـا
بدانـا حربهـم صبـح مبكـر/إلى ما الليل قـد ظلـم علينـا
لنا وقعـة مـع علـى الخليفـة/وحنـا تسعـةٍ يـوم التقيـنـا
هزمنا الجمع واحرقنا المواتـر/بسوق الموت بعنا مـا شترينـا
طرحنا الطايره من عالي الجو/رمـاه الله يـوم أنـا رميـنـا
نهار الكـون ذبحنـا الخليفـة/ورد بالموت حـوض الهالكينـا
وهذا فعل عطبيـن الضرايـب/هـل الجدعـا كعـام العايلينـا
تجدد فعلهـم فـي كـل عـام/ولا تفنبـه عشـرات السنينـا
ذبحنا قايـد الجيـش العراقـي/ولا نخشـا جنـود الرافديـنـا
أكلنا راس عبـاس الظفيـري/وياما روس مـن مثلـه كلينـا
فعـول بريـه معجـزة كثيـرة/ألكثر أفعالهـم مـا ينحصينـا
حربنـا كلكـم عشـر القبائـل/عبرنا نجد منكـم مـا أنثنينـا
عبرنـا نجـد شرقـي تهامـة/إلى بحر الخليج حيـث انتهينـا
ومنهـو مثلنـا يثبـت وجـوده/يثبـت حجتـه فـي شاهدينـا
ويقول الصدق نطقاً واستقامـة/ويبـدأ مثـل مـا حنـا بدينـا
وفرق مطير عن بعض القبائـل/مثل فرق الكر عن بحر سينـا
أخير النـاس بأيـام الجواهـل/وأخير الناس يوم أنـا اهتدينـا
ولو ما حكم أبو تركي غطانـا/لكنـا بالجـزيـرة طامعيـنـا
ولكـن أبـو تركـي جبـرنـا/وخضـع للقبائـل اجمعيـنـا
حكم بالشرع والديـن الحنيفـي/وساوانـا جميعـاً واستويـنـا
وخلا الذيب يمشي مـع عـدوة/وليث الغاب رافـق للحصينـا
هذا ما قاله الرجـل المطيـري/تمـر أشيـاء وحنـا ساكتينـا
وأنا أنصح كل ذو عقـل سليـمٍ/بفعـل أجـدادنـا لا يبتليـنـا
سألـت الله أن ينصـر لدينـه/وأن يحفـظ أمـام المسلميـنـا
وأختام القول صلاتي وسلامـي/على سيد البشر والمـر سلينـا
على من أسمه الهـادي محمـد/نبـي الله بهـديـه مهتديـنـا

[عزيز بن لامـي]

شكرن على جهود اخوي سعود

واتمنى ارا الجميع مشارك

عافاك ربي

[بن لامي]

لاهنت يا عزيز و لا هنت يا سعود بيض الله وجهكم اخكم/بن لامي

[بن لامي]

لاهنت يا عزيز لا هنت يا سعود شدو حيلكم على نجاح