ما دام يسكب غيث الأفعال,, نوِّي
وما دام فعلي شاهدٍ في,, وفايا
وما دام قلبي شاهدٍ في سموِّي
وما دام يرضي من عنالي,, عطايا
ما همني قولٍ يقوله,, عدوِّي
وما همني تدليس سود النوايا
خل الذي وده يسوي يسوي
ياما دمحنا من ذنوب وخطايا
والضربة اللي ما تموّت تقوِّي
للخير خير وللسرايا سرايا
توِّي بديت بعسف الأيام توِّي
وتوِّي عرفت علاج بعض البرايا
لا حان برد الوقت شبيت ضوِّي
ولا حان حر الوقت ذعذع هوايا
من صاخب الأيام جاني هدوِّي
والصبر جاني من كبار الرزايا
وجاني من العاكر حلاي وصفوَّي
نصبر وناخذ من زمنا هدايا
قول البشر ما يقلب اليوم جوِّي
وما ياصل اللي بين عوج الحنايا
من لا جمع بالوقت صبر وتروِّي
ياسرع ما تاقع عليه الزرايا
وش عاد لو حبل الزمان متلوِّي
الصبر مفتاح الفرج بالوصايا

يا عين نامي وخلي للزمن همي
خليني ارتاح واسلي باقي ايامي
متى على الله جروح الوقت تلتمي
لا نيب راضي ووقتي يرفض احكامي
يقلط علي الزمن جيعان ويسمي
يشبع ولا رفرفت من جوره أعلامي
أفز وانفض غبار خلفه غمي
اقصى خضوعي كتاب يشرب اقلامي
اضحك بعز العنا واظهر جلى جمي
لا من تحروا دموعي سالت انغامي
تجارب الوقت قلبي صمها صمي
اعاين الدرب قبل اطاه بقدامي
كم سال موقي وبلل بالمطر كمي
مع كل هذا صبور وموقفي سامي
ما اشكي على إنسان مهما كان حتى امي
اشكي على من وهبني نعمة إسلامي
ما خبرني قلت يا خالي ويا عمي
اشيل حملي على متن وانا ظامي
العز داخل وريدي دم من دمي
لو قل زادي وبين جلدي اعضامي
واللقمة الطيبة يتعب لها فمي
لو دونها تنتظرين لحظة اعدامي
واللي وقف له زمانه وانثنى يمي
والله لحقق لعينه صعب الاسلامي
اقف لعينه قبل بيدينه.. يومِّي
ولا اغيب يا لين يبري جرحه الدامي
واللي ليا غبت يسبح في بحر ذمي
آخذ حسانيه ويوفي من آثامي