::منتدى الجبلان الرسمي:: - ماااهي رجووولـه**

السلام عليكم ورحمه الله وبركاته

حبيت انزل قصيدتين الثانيه انا محتفضه فيها من اربع سنين لاني احبها اما الاولى لا هذي قصيده شاعره عتيبيه

إذا المراجل لبسة شماغ وعــــــــقـــال
قل للعذارى يلبسن العمـــــــــــــــايم

ماعاد يفرق زول حرمه ورجـــــــــال
دام الفعايل تشبه البعض دايــــــــــم

المرجله ماهيب كلـــــــمه وتنقــــــــال
وتروح ما راحت هبوب النســـــايم

وإلاخشونة صوت او رفع الاثقـــــــال
او رزة صدور وفعل الـــــــــزلايم

ولا هي بعد مفتاح موتر وجــــــــــوال
وإلا ردي لسانن حديثه شتــــــــايم

المرجله شيمه عن القيل والـــــــقــــال
رفيع نفسن حر بالجو حـــــــــــايم

المرجله عقل وزن وزنة جـــــــبــــال
ودون العقل وش فرقنا والبــــهـايم

يا مسندي لو مايل الوقت بي مـــــــال
ياولد ابويه ياعظيم العـــــــــــزايم

يا معرب الجدين من العم والخـــــــال
يا نخوة المفزوع وقت الـهـــــزايم

المرجله ياخوي هي طولة البـــــــــال
هي العزم هي الصبرفالظــــــــلايم

فيها الكرم عزه دله وفـــــــنجــــــــال
فيها الكرامه عن ردي الطبع شـايم

والدين لامنه خذا القلب مـــــنـــــــزال
مشي طريق الحق وابليس نـــــايـم

ومن لاعرف ربه في طيب الحــــــال
لابد وقت الضيق بالـــــهم هـــــايـم

حتى صلاتك مع جماعات ورجـــــال
في خيرها ياخوي نعم الــغـنــــــايم

ولامن نصف ليلك قم صفي البــــــال
يا عظيم اجرك بين ساجد وقــــــايم

ولا من رفع ربي له كل الاعمــــــال
حسن الذكر لاقـالو فــلان صــــــايم

وخلك شريف القصد ياطيب الفــــال
سوء المقاصد فالــبـيـوت الهــــــدايم

واحذر تبيع النفس دب الانـــــــــذال
وتتبع ياخوي إبليــــس راع النمـــايم

النفس خيل لك إذا كنت خيــــــــــال
ومن لاقوى نفســـــه قوته الهــــــزايم

ولاصرت ماتدري لوش انت رجال
والله خســــاره فـيك ذبح التمـــــــــايم

*****************************************

ماهي رجوله كلها أفعال الأنذال ؛؛
وصعب على الأنذال مجد تطوله

ولا كل من خط له "شنب" صار رجال ؛؛
ولا ظني ينقاس الشنب بالرجوله

ولا كل من يرمي على أنثاه بعقال ؛؛
يكسب ثقة قلب تزايد حموله

ولا كل من يركب فرس صار خيال ؛؛
تصعب عليه أحيان أخذ البطوله

ولا كل من يركض ورا فلان وش قال؛؛
عاش بسعاده وزاهي الورد حوله

واللي كبر راسه على أم العيال ؛؛
وده يعيد أمجاد عصر الطفوله

واللي يعشمها بغلا وحب بهبال ؛؛
ينسى وعوده بعد شي ينوله

واللي قضى عمره ورا جمعة المال؛؛
ينسى زوال المال لو دار حوله

واللي جحد في والدينه قسى وعال؛؛
على حقوق اللي بصغره سعوا له

هذا ولابد كلمة الحق تنقال؛؛
ولابد علينا نصدق اللي نقوله

البعض فعله تعجز لوصفه أمثال ؛؛
لامن تحدوا هالزمان وقفوا له

فيهم كريم وبالكرم غيث همال ؛؛
يبي رضا ربه وثم رسوله

وفيهم عزيز للبشر صار شيال؛؛
يشيل هم اللي تعنوا وجوا له

وارجع وأكرر وأختصر كل الأقوال؛؛
وعسى يكون الخير عرضه وطوله

ماكل من خط له " شنب" صار رجال ؛؛
ولايوم ينقاس الشنب بالرجوله

اتمنى انها تعجبكم :kk:

اختكم
غلا الصمان