::منتدى الجبلان الرسمي:: - ابداع جديد لشاعر بدر البتال

يالله يالله ياغـافـر كبـيـر الـذنــوب
واسوار عطفـك ولطفـك فاتـح ابوابهـا
الطف قبل مانشوف الشمس تشرق غروب
واغفر لنفسـي وذنبـي شـرق صلّابهـا
اتوب وارجع واسوّي ذنب وارجع واتوب
وارجع وازوّد ذنوبي واحسـب حسابهـا
ماغير افكّر واهوجس وانظر لكل صـوب
من ضيقـةٍ ملّلـت عينـي مـن اهدابهـا
من ضيقة الصدر لاصادق ولاني كـذوب
اكـذب واصـدّق بيـوتـي واتغنّابـهـا
واحبس دموعي بعيني لين قلبـي يـذوب
وأعوّضـه والقصايـد حــزن ينتابـهـا
وأواجه النفـس حيلـه بإتجـاه الهـروب
وانشد عن الحال وش ميّـز ووش عابهـا
يوم انظر عيوب غيري كن مالي عيـوب
مااجـل نفسـي ولكـن ماسـك نصابهـا
والعب مع اللي لعب ماحب طبع اللعـوب
لاشـك بعـض الحيايـا يغـدرك نابهـا
وان شفت سـم النوايـا والنوايـا تنـوب
قـبـل اتعشّـابـي اسـبـق واتغدّابـهـا
ملّيت مـن عالـمٍ مستورهـم دون ثـوب
وبليت في ناس تكرهنـي مـن اعجابهـا
مالي ومال العنا مالـي ومـال الحـروب
مالـي ونـاسٍ تحـب تفـرّق أصحابهـا
والعالم اللي تشوف الطيب طعن الجنـوب
مانيب خسران شخـص يـروح بأسبابهـا
شاري رجالٍ تشوف الطيب عـدٍ جـذوب
وان قصّرت بي تشـوف بعينـي عتابهـا
وتصير عوني لياضاقت علـي الـدروب
واصير عـونٍ لهـا بالضيـق وادرابهـا
وانا على نيّتي واشـوف حـب القلـوب
واللـي يـردّ الحقيقـه عـنـد طلّابـهـا
ماالوم نفسـي ليـازادت علـي الكـروب
مـن يعـرف النـاس صادقهـا وكذّابهـا
في هالزمن مايفيدك غير شـقّ الجيـوب
اسـأل مـجـرب بوافيـهـا ونصّابـهـا
لو القلوب اتّصافـا يمـدي المـا يـروب
ولـو المقاديـر تنصـف زان جلبابـهـا
أسيّـر السفـن بـس المشكلـه بالهبـوب
وهموم دنيـاي ترضابـي ولا ارضابهـا
واتوب وارجع واسوّي شي وارجع واتوب
يالله تغفـر ذنوبـي سـاعـة حسابـهـا