على قاف عبدالله بن زويبن البيطار=بديت وركزْت السالفه عند طالبها
هذاك الجزيل بشعره وشخصه المغوار=يجيب النوادر ويتنقالك أطيبها
وعسى الله يعين الشاعر الطاير المحتار=من الطلقه اللي ما درى عن عواقبها
يشوف العرب كفـّار والدار ماهي دار=يدرعم على طفس المعاني وينهبها
يبل الكبود الخايبه كذب واستنكار=ويحب الرزاله ويتعمّد يطب ابها
وترا مالنا حاجه ولو كبّروك صغار=على ويش ابحسد كدّش الخيل واركبها
مشاهيب حقدك يلتهب في هواها نار=تهد الجبال وتنطح اللي يعقبها
كشفت الستار وقلت يالله يا ستــّار=ومن هول ماشافت عيوني غرايبها
الا يا لبيب الذم قلي وش اللي صار؟=برولك تيوس القوم واشهب ثعالبها؟
اجل دوك مهره جملّتني مع الشعّار=تفج الصدور وتجدع اللي يقربها
سباع ٍ تجول بخاطري والغضب جرّار=يجر الحقيقه والزوايف يحاربها
ادوج الفياض المخضره واقطف النوّار=واهين الرجال اللي فخرها شواربها
تطش المعارك دمّها والزمن دوّار=الاول يزيــنهــا والآخــر يعـيـــبهـا
هذا اللي يصيبه شك يبرك عليه العار=وتلعب به الدنيا وتفرش عجايبها
وانا ماهرجت الزور وآوزع الاسرار=انا لي دروب اعتدت اساير مصايبها