::منتدى الجبلان الرسمي:: - رديه بين الشاعرين فهد بن جبرين ومفرح الظمني

صباح الخير

للحفظ فقط

رديه بين الشاعرين فهد بن جبرين ومفرح الظمني

فهد بن جبرين

يا مل قلب من حياته تملل

كما يمل من الردوف الرديفي

رديف قوم إبغيض وديارهم ذل

عقب الطماعه منتوين النكيفي

تلنه العيرات بأكوارهن تل

في ساعة ينسا الوليف الوليفي

يتلون شيخ تاه للعد ما دل

في كنة الجوزا عذاب العسيفي

على الذي ما عاد منه اتحمل

بيني وبينه مثل كون الصريفي

الصاحب اللي سلني بالهوى سل

كما يسل القاع سيل الخريفي

اللي بحالي مسرف ما تجمل

عليه قلبي مثل ريش خفيفي

وابشتكي للي للأمثال يفتل

حلال فتال وقافه مخيفي

مفرح الظمني الى صرت تجهل

رجل شريف وبالمواقف شريفي

عز الرفيق إليا نسا خله الخل

ما هو من اللي عن رفيقه يقيفي

هو الذي عاداته الطيب يبذل

يفرح بفزعاته خطات الضعيفي

واللي ذبحني يا بو فيصل معزل

زوله لطيف وفي جماله لطيفي

وانا ما عذرك والبدل ما تبدل

ماني بعايف صاحب ما يعيفي

وان ما فزعت اليوم ما عاد له حل

ما تنفع الفزعات حال ضعيفي

رد مفرح الظمني

حي الكتاب اللي لفاني مسجل

تسجيل بيطار وكتبه ذريفي

اهلا هلا به عد ما وابل هل

في مد لهمن والرعد له رجيفي

ساعة قريت الخط قمت اتولول

وامسيت من كثر الروابع نحيفي

كني على نار لو اني على زل

والنوم ما هو للنواظر حليفي

فهد شكا لي ما جراله وكمل

وانا على النخوات ماني قظيفي

يشكي فراق صويحبه عايز الدل

حلو خياله والمذاهب عفيفي

انا ما شفته مير فيه يتغزل

يقول ماله بالعذارى وصيفي

قم يا فهد نبدي عملنا ونعمل

رجلي برجلك لو طريقه كليفي

والله لمشي لين رجلي تنكل

وان كلت الرجلين لزحف زحيفي

نبدي لهم بالجاه والمال يبذل

ماني على الدنيا بخيل حتيفي

وإلا بضرب اللي حديده مصقل

بمهندن يوم الملاقا رهيفي

اما نجيب اللي كلامه معسل

وإلا تصدر من جنابه معيفي

هذا وغير اللي حصل ما تدخل

وابصر بحالك وانتبه للرصيفي

واحذرك عشق يجي بآخره غل

يحرق ثيابك وانت ثوبك نظيفي

وارجي من الله في عشيرك تعقل

تقضي مع الصاحب ربيع ومصيفي

ويا اللي سمعت القول على النبي صل

شفيع الأمه بالنهار الكسيفي