كل شبـر بهالوسعيـه ملـك ربـي تعلميـن=وأعلم إن اللي خلقني هو خلق لـك هالعيـون
لكن انتي من جلستي وانتـي فينـي تحدقيـن=كن ما به ناس غيـري بهالكراسـي يجلسـون
لو سمحتي عاد أسمعي وحتى لو ما تسمحيـن=المهـم اللـي بقولـه تسمعينـه و يسمعـون
ع الأقل ليا نظرتك سـوي روحـك تستحيـن=غضي طرفك مثل غيرك خوف ربعي يلمحون
الركادة عاد زينة والحياء فـي البنـت زيـن=وفيك جـآزم لا ركـادة ولا حيـاءٍ يذكـرون
تعرفيني ؟! أعرفـك ؟! مذكـر إنـا ملتقيـن=لا أعرفك من تكوني و لا تعرفي مـن أكـون
وإطمأني أن كان قصدك بـس فينـي تشبهيـن=ما هو أنا إلـي تعرفيـه والبشـر يتشابهـون
مـا دريتـي مالتشابـه يخلـق الله أربعـيـن=وأعرف أربع يشبهنـك بـس والله يستحـون
وإن كان قصدك شي ثاني عاد قولي وش تبين=خايف إنا نصير فرجة وإللي ماشتروا يتفرجون
وإذا ع البال عاجبتنـي لا يحوشـك تحلميـن=صح ربعي من جمالك فيـك صـار يمدحـون
بس وش لي في حلاتك دام فيهـا ترخصيـن=حشمـة البنـت وحياهـا والكرامـة يلفتـون
ولو توفر فيـك هـذا مـع حلاتـك تبشريـن=ما هو أنا ألف غيـري بـاب بيتـك يطرقـون
وش علامك رغم كل اللـي أقولـه وتسكتيـن=مو طبيعي هالسكوت وهالبـرود وهالسكـون
إنتـي خرسـا أسألـك ولا مانـك تسمعيـن=قالوا ربعي ذي كفيفـة قلـت لا لا تمزحـون
لين شفتك يـوم رحتـي يمسكونـك باليديـن=ما دريت إلا عيونـي أربـع أربـع ينزفـون
آه ياني منـه مشهـد يـوم شفتـك ترحليـن=جيت اشوف عيون ربعي لقيت الكل يدمعـون
قلـت سنّـة هالحيـاة وحـن ترانـا مؤمنيـن=الله اللـي مسيّرنّـا بيـن كـاف وبيـن نـون
وكل أبونا نختلف مع إننـا مـن أصـل طيـن=سبحان يلي مصورنا ولله فـي خلقـه شـؤون
يعني حنا كـل أبونـا عـاد إسمنـا بنادميـن=وليا قضى ربك أمر وقـال لـه كـن فيكـون
فينـا يلـي رازقـه خـيـر رب العالمـيـن=وفينا يلي هو لعطفه بحاجـة القلـب الحنـون
وفينا يلي مـا شكـى مـن علـةٍ كالآخريـن=صـمٌ و بكـمٌ و عمـيٌ فـهـم لا يفقـهـون
بس قليـل عـاد فينـا للنعـم هـم شاكريـن=والله يرزق هالخلايق من حيث هم لا يعلمـون
وتدري عاد يالكفيفـة حنـا تـراى متشابهيـن=وإن مانعمت أبصارنا القلوب أهم إلي يعتمـون
يالكفيفـة يالعفيفـة إن قلـت آسـف تقبلـيـن=يغفر الله ذنوب عبده ليا خطا وهل تغفـرون