سر يا قلم واكتب عن الشعر تحليل=عن واقعه منه العتب والعتب له
شئٍ سمعته مايجي فيه تمهيل=كتبت به واللي جهل به كتب له
اليوم جاء للشعر من يرغب الميل=ياشين ناسٍ شفتها.. تنتسب له
كيف الحداثة تنتشر.. يارجاجيل=واللي بدعها يقرع اليوم طبله
شعرٍ وضيعٍ في جميع المكاييل=وسط الجرايد ياجماعة نصب له
جانا وقالوا له ثقافة.. وتبديل=واغتر باسمه واحدٍ ما حسب له
جانا ولاشفنا بشوفه.. محاصيل=غير النفوس اللي تحوش العرب له
جابوه من دربٍ عسى دونه السيل=وقامت بعض عوج الدروب تعجب له
لو كان قاله عنترة مرعب الخيل=تشيمت عن حب شرواه.. عبله
تكفون يالله يالرجال الحلاحيل=شعر الحداثة قصوا اليوم حبله
يوم القصايد فاحت البن والهيل=والرجل ينظمها وهو يدرج إبله
واليوم شفنا للتكلف.. مداخيل=تكلفٍ.. ماشفت بعده.. وقبله
بعض الخلايق مثل شقراء مع الخيل=وإلا بعض الناس ربي وهب له
بقلوبنا للنهج الأول.. مداهيل=الحفظ والتمجيد منا.. وجب له
ياناس نبغى بس جزل التماثيل=أبي القصيد الجزل وين اهرب له
متى تزيح همومنا طلعت سهيل=متى جزيل الشعر ينساب وبله