ما لملتاع في فعله ووصفه نظير = آخذٍ كل ميزة بالوفا والتمام
لو بغيت آصفه الموصف يحير = منوة اللي بقلبه للصقارة غرام
لا صغير ولا بالوصف عبج كبير = كنه مفصلٍ بالزين تفصيل خام
أفدعٍ محدبٍ متسندٍ مستدير = وافي الطول واف العَرض جبر العظام
وارد الوجه وكراعه جلالٍ قصير = واخذاتٍ كفوفه من كفوف الغلام
والسراويل كاسياتٍ اسبوق الحرير = افجحٍ كنه اللقاي وزن المقام
في قحوفه سنا عينه سنا نار كير = فاصلاتٍ بياض الراس مثل الوشام
ولاش ظني مثل بوزه ولا بوز طير = والمناكب تزايمها الثنادي زيام
مكتسٍ من دقاق الريش شين يسير = خُف ريش القطا بالوصف وألا الحمام
والظهر يطرد به مثل موج الغدير = والنحر بترةٍ مطليةٍ بالرخام
وغير الوصاف له فعلٍ يشوق النظير = لا درع فالذهيب اللي عليه الكلام
لا قنص به طلوع الشمس وألا العصير = وشاف بيض الدواغر في بطون المحام
لا خذوا عنه ثم حقق وشن المغير = ثم تنكس عليهن في مذار الثمام
صب مره على عود يقب الهدير = لا اعترض في حياله جندله بالحسام
يضربه ضربة القرم النشيط الشطير = ضربةٍ عقبها ما يستطيع المقام
وكان خصمه ليا شافه تلقى الفرير = يوم شاف الصمايل طق طقة ادهام
جاه يوم عبوس قمطرير = جاه من فوقه كنه من صواريخ سام
ولا حصل عن أسباب المنايا منير = لين تروى المخاليب الظمايا الحيام
طاح من فعلهن طيحة مدقٍ ببير = ميّت قاضٍ فالجو ماضٍ قوام
وشاعرٍ ما فعل ملتاع له ما يثير = عقب حافه وشافه يغتشيه الملام
واكتفيت بقليلٍ موجزٍ من كثير = والعذر والسموحة والسلام اختام

البارحه جفني بحلو الكرى عاف = ودموع عيني مثل وبل الشخاتير
انحاس بالي يوم ضيعت عساف = اللي غدا يطرد صفوق المغاتير
اقفت به الربدا على الحد بأطراف = شمالي البترا بعرق المظاهير
قمت اجدع الملواح في كل مشراف = باح العزا مني ولاجاني الطير
وانا على طيري كثير التحساف = اللي يصخر هارب الربد تصخير
ومن سو حظي ضاع في وقت الأنكاف = ولا عاد من فرصه نرد المداوير

طبعي هواوي واعشق القنص والصيد = واطرب ليا فاح النفل من عباتي
واجلس مع القمرى بليل التساهيد = واشب ناري ثم ألوح عصاتي
واقرب دلالي على النار من حيد = دلال أبويه دايمٍ من سواتي
واترجم أحساسي على صفحه البيد = وأرتب بيوتي بكيفي وذاتي
واجيب سامر وألعب الشعر وأعيد = ولا حان وقت الفرض أصلي صلاتي
وأستغفر الله وطلبه كل ما أريد = راحت ضميري والصبر والثباتي
طبعي هواوي واعشق القنص والصيد = من خلقتي وهذي مسيرة حياتي

يا زين جمعتنا على شبة النار = نارٍ سناها لدلال المباهير
امكرمات وسطهن بن وبهار = وسوالفٍ تطرب سموع المناعير
ناخذ لنا فالوقت سجة ومشوار = بين الفياض اللي زهتها النواوير
أرضٍ خلا ما داجها كل دوار = غير الحباري واشقح الريم ماذير
تلقى جرايرهن مع الروض عبار = زرق الغلب برق الظهور المخامير
هي منوة الي بالصقارة لهم كار = تشفق ضمايرهم على تلة السير
لا حولوا في فيضة كنها الطار = وتكافخن بيض الدواغر مياسير
ردوا على كن وجه ليا دار = وجه الغضيب اللي على علم وصغير
ليا انطلق ما كنه الى يبي ثار = يسوق في سوق الخصيم التباشير
أفحج سراويله على الكف نشار = عينه كما وصف الشمالي سناكير
يهوي عليهن مثل قصاف الاعمار = دابان ما عنده مراود وتأخير
إلى انطلق ما كنه ألا يبي ثار = يسوق في شوف الخصيم التباشير
شقر الحرار اللي لها أفعال واذكار = من ساس فارس وافياتٍ مغاتير

يا حمود انا في نقلت الطير مجبور = احب شوفه واستلذ بمطيره
ما همني العاذل ولو كثر الشور = من ردني عنه حشى مستشيره
اخذ على شانه لي ايام وشهور = اعتز في نقله وفكت جريره
لاجاء نهارٍ فيه قاهرٍ ومقهور = وكلٍ نقل طيره وجهز نسيره
وتدارجن ربد الحباري مع الخور = وخذت برقع من يعقد نظيره
تل ورقى وسم الولي دوم مذكور = يلحم ويشهر والصوايد شطيره
نشه بمخلابٍ على مشـة الـزور = وهوا كما تهوي الدلي وسط بيره
وانسرته المقسوم وعزلت مشهور = وشلته على كفك ولا لـك بغيـره
ثم شللت ربدا لهـا بالفضـا دور = قد وخذ منها ريش يالله الستيـره
تل ورقى مالد للخـرج والسـور = وادلى بكفه وحولت لـه كسيـره
جيته يدوس وخاطرك منه مسرور = ماتغبط اللي وسـط بنكـه يديـره

دار الشمال وسرني يوم داره =بعد البطا وانا اتحرا لها دوم
عقب الرطوبه والندا والحراره = هب البراد وبشر الوسم بغيوم
في موسم نرجي بشاير اخباره = نفرح ليا جتنا مكاتيب وعلوم

بكره ليا ذعذع براد الصفاري = القيض راح وقربت هدة الطير
قرب هداد مصخرات الحباري = اللي لهن عند اهل الصنف توقير
بأتلى شهر عشره وذيك المحاري = يا كثرهم دوار برق الدواغير

يا مرحبا بسهيل جتنا لياليه = عسى علينا كل عام يعود
وقت نحبه والصقاقير ترجيه = ونعد له في كل يوم اعدودي

اليوم قل الصيد من كل الاوطان = زود على قل الطيور وغلاها
آخر زمان ناقل الطير تعبان = يبحث خفايا صيدة ما لقاها

يا زين هد الطير في وسط غابه = اما طلوع الشمس والا الطفيليل
ان شاف له جول تدراج عثابه = جايع وشفقان على شوفهن حيل

يا بو خليفه خل عنك الجماهير = درب الصقاره والقنص سد ريعه
يا دعيج مافي البر كود الخواضير = هن وام سالم قوعهن قطيعه

يا بو سعد يوم المقانيص والصيد = رحنا وجينا والمقانيص حلوات
واليوم منع وقل الصيد وتلايد = قد قلت في ما فات مامن طهامات