ابتديت بكل بيت(ن) اذكر المولى الرحيم=واستعيذ بقدرته من كل شيطان(ن) رجيم
ياسميع(ن) يابصير(ن) ياغفور(ن) ياحليم= ياودود(ن) ياكريم(ن) كاسي اللحم العظام
كاف هاء(ن) ياء عين (ن) صاد معنى(ن) محكمات=فيها عبرة معتبر من جيل عصر الآفلات
التعيس اللي غرق في بحر وزر الموبقات=والسعيد اللي على الدرب اهتدى ثم استقام
هل ترى من قوم عادٍ من ارم ذات العماد=مضحكات(ن) مبكيات(ن) مفسدات(ن) في البلاد
ارسل الريح المصرصر والمصبصب كالجياد=مصبحات(ن) ممسيات(ن)والغضب جام(ن) وجام
ياإلهي يارجائي حين تبعث هالقبور=هوّن الموقف عليْ يوم الصحف طارت نشور
وانظر بعين العطوف العادل اللي مايجور=هذي نار وهذي جنّه والبشر صف ازدحام
بين مومن بين كافر بين اصحاب النفاق=هايب الموقف جلل والوضع لايمكن يطاق
يهرب الرجال فينا من هله حان الفراق= نفسي نفسي والقلوب الوالفه صارت خصام
وانبرى بين الجموع الغارقه بهم ودموع=رجل تعرفه المساجد والمآذن والخشوع
فيه من تقوى عمَر يوم البشر كلها هجوع= الكريم اللي تسلسل من نسل قوم(ن) كرام
ذاك ابو عبدي على روس المراجل لايزال=حيّر بيوت المثايل والفرايد والجزال
كيف نجزي بالرجال ونمدح اسياد الرجال=من فضل ربي علينا انخلق بين الانام
لاهو جن ولا هوأنس ولاهو من كل هالوجود=العريب اللي عريب(ن) من خواله والجدود
ياملاك(ن) مرسل(ن) والجود من جودك يجود=ودام طيب الطيب من طيبك على الطيبه وسام
فيك من خلق النبي استغفر الله لو أقول=باعثك رب السما للمرجله واهل العقول
ماخذن بيد الضعيف وحامل(ن) كل الحمول=والمراجل تنحني قدام فعلك باحترام
فيك من وصف العرندس الأرندس والزئير=فيك من هيبة ملوك و بالتواضع كالفقير
من فعل جدّانك اللي مالهم غيرك نظير=بالشدايد سيف قرم وبالرخى برد وسلام
مو غريب(ن) وانت حادر من نسل كْرم العباد= ربعي الجبلان قوم(ن) ياتقود وماتقاد
مابنا شخص(ن) رديّ ولا يسير بنا النقاد=اصغر الاقران فينا بغيرنا قايد همام
ياهوى لكل عروس وياشذى عطر النفوس=ويادهن عود(ن) مبخر والنقي من كل دنوس
المشاعر مستلجة بين هجْس و عيطموس=شاعر(ن) خاض البحور وعن هزيل القاف صام
ياحقيقة من سراب ويا براد ويا عذاب=وياهدوْ ويا فتوْ وياحضور(ن) بالغياب
مستحيل اوفي مثيلك ثامن العجب العجاب=والشعر تبطي حروفه والسلام اجمل ختام
انتهى جزل الفرايد والمثايل من بديع=والصلاة الواجبه صلوا على طه الشفيع
ابعدد رمل الصحاري والسوافي من جميع=ماهطل فوق المداين من وبل مزن وغمام