عدّى عمر .. ياليت الأعمار تنعاد
وأرجع بلا شيب وبليا تجاعيد

أرجع وأضم أبوي وأقول: لا عاد
تموت وتتركني مثل ليلة العـيد

يوم اســألوا عنك الصبايا والأولاد
وقلت:أمي تقول انه مسافر بعيد

بـكــيــت لـيـلـتـهــا وناديت..ما فاد
وظليت أصوت لك .. وأناديك وأعيد

عوّد يا بوي وجب لي ثياب جداد
يا كثر ما تنسى يا بوي المواعيد

بكـيـتـك لحالـــي وأنا كنت معتاد
تكف دمعي بـ إيد وتضمني بـ إيد

كم كنت محتاجك تجي كنّك رقاد
تمطر من كفــوفك صلاة وعناقيد

احتجت لك طفلٍ كسر قلب الأعياد
واحتجت لك طيش وشباب وتناهيد

واحتجت لك شاعر له أحباب وأضداد
واحتجت لك رجال يخشى المناقيد

احتجت لك .. واحتاج لك ظل وسناد
العمر ينقص واحتياجي لك يزيد
منقولـــــــــــــــــــ هـ