تكفين يا طيور الحـرار افزعيلي=ابى عن ديار الاهـل منـك اخبـار
تكفين حومـى فوقهـم وارجعيلي= وإلا ان حصل لك حومه داخل الدار
تكفيـن حـول بيوتهـم دوريـلي=سبعة فروخ يـوم اخليهـم صغـار
شوفى ضناى وعودى وانكفى لي=واشلونهم يا علهـم صـارو كبـار
نسوا دفاي ونومهـم فـى شليلي=وش علمهم يا علهم بطول الاعمـار
قولي لهـم ان امكـم لها عويلـي=خمسه سنيـن دمعهـا دوم مـدرار
وقولي لهم إني علـي طـول ليلـي=أنوح وليـا قـرب الصبـح أنهـار
وقولي عيوني دايمـا لـه هميلـي=تبكي ليا شافت مـن النـاس زوار
كل يوم اقول غدى حديهـم يجينـي=راحت سنيني مابهم واحـد(ن) زار
وانا اللي من سبت سوات الحليلـي=حالـي تـردى كـل مالـه وينهار
وفرقا ضناي اللـي تـردت بحيلـي=كني على شوفتهم اصلى على نـار
ياويلـي كـان الله عجـل رحيلـي=وانا لي سنين ابـي لو هـي اخبـار
ياعونة الله من يبـي يرتكيلي=لـيا جارت علي بأمر الله كـل الأقـدار
تنكـروا مـن يدخلـون الدخيلي=واللي بوسط ديارهم يامـن الجـار
قولي لهـم ياطيـور قلبـي عليلـي=الله يكافي قلوبهم صـارت احجـار
وانا اللي لبراق الخيـال استحيلـي=واقـول ياعـل ديرتهم للأمطار
تكفيـن وسـط ديارهـم صوتيلـي=شوفي عسى لأسمي مع الناس تذكار
وقولي لمـن نسيانهـم يستحيلـي=ياللي نسيتوها تـرى الوقـت دوار
ياهيه ياللـي بالسمـا لـك هديلـي=ردي خبـر تكفيـن يكفـي امـرار
شوفي هاك اللي نومهم في شليلـي=من اذان المغرب لوقـت الأسحـار
شوفي هاك اللي ماتهنى في مقيلـي=إلا مقيـل معهـم كبـار وصـغـار
وقولي لهم ان كان حملـي ثقيلـي=مره يجون وعقبهـا شـي ماصـار
وانـا يتولانـي كريـم(ن) جليلـي=ياعلني فـي جنّـة وسـط الأبـرار

الموضوع الأصلي: ..قصيـــــــــــــدهـ حزيــــــــــــــنه جــــــــــــــــــــــــــداااااا.. || الكاتب: الغفيليـ || المصدر: منتدى الجبلان الرسمي

المصدر: ::منتدى الجبلان الرسمي::