*-* خذيت قلبي *-*

خذيـت قلبـي كـذا ليلـه وردّيـتـه
لكن تغيّر ! وش اللي صار علّمنـي؟



وش قلت له يا الغلا؟ ولوين ودّيتـه؟
أربـع ليالـي وقلبـي مـا يكلّمنـي



حدّك تبيح الخفا؟ ولاّ انـت حدّيتـه؟
أشوفه ان جبت لـك طـاري يألّمنـي



يومك طلبته وقلـت (أبشـر) ومدّيتـه
الله يسلّـم يــدي .. والله يسلّمـنـي



ردّيت خوفك وخوفـي لـك تحدّيتـه
وعدلت لك بالهوى بس أنت .. ظالمني



هـذا مـدار المحبّـه مـا تعدّيـتـه
بعثرني اموادعك والوصـل لملمنـي



قدّمـت حبّـك علـى غيـره وبدّيتـه
كن الزمن في يدينـه لـك مسلّمنـي



وحطّيت حملك على متنـي وشدّيتـه
و وصّيتك إليا بدر منّي خطا .. علمني


لا ارتاح قلبي مـن همومـه وهدّيتـه
الهـمّ الأوّل لمـا بـعـده يولّمـنـي



تعبـت أطـارد غـرامٍ فيـك ناديتـه
وتعبت أعيش الضحى والليل حالمنـي

الموضوع الأصلي: *-* خذيت قلبي *-* || الكاتب: بنت مطير || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::