تل قلبي تـل قيـر السبرمانـي
سايقه عاشق وشاف اللي كونه

شاف شوقه شاف وضاح الثماني
قدم جول من العـذارى يتبعنـه

ناظرت له نظرة فيهـا حنانـي
ثم صـدت والعـذارى حقرنـه

قال ليه الزين عـدى مادعانـي
وارتفع ضغطه وثور فيـه جنـه

وش سبايب صدة سهيل اليماني
من يجيب العلم والأخبـار عنـه

قال مابه غير خشم الأحمرانـي
طيـر جـو والقطـا ماعانقنـه

جمسي اللي لا نخيته ماعصانـي
يوم بعض الناس صنع العذر فنه

دق سلفه وانتهض مثل الحصاني
ماسمع في دقتـه قعـه وحنـه

عشق الأول وثالـث دون ثانـي
وارتفع صوته وهوباتـه شكنـه

يوم داس البنص واقلع في ثواني
والتوايـر للمزفلـت حفـرنـه

وصله للي تواصيفـه حسانـي
شوقه اللي وصفها بالقرب جنـه

قال ليه تصد ياشمعـة زمانـي
مادريت ان الجفا ياصعـب كنـه

قالت شوقك ياحمد ماهو بانانـي
وحبكم بالعيـن جاراتـي قرنـه

خايفه عليك من حسد الغوانـي
وانتبه قلبك يغيـر بـي مظنـه

أنت شوقي وأنت حبي والأماني
وأنت بس اللي عيوني ناظرنـه