قلبي مـن الصدمـات ياصاحبـي ونّ=ونّة جريح(ن) داميـات(ن) عروقـه
سبة حبايب خافق(ن) صوبهـم حـنّ=وأعلن هواهـم واحتياجـه وشوقـه
حتى انصدم فيهم ومن فعلهـم جـنّ=وذاق المرار اللي صعيب(ن) يذوقـه
وسبـة حكايـا يجرحـن مـايـداوّن=فيهـا بـلاوي للمنـايـا سبـوقـه
عن خافيات(ن) للبشـر مـا يسلـنّ=منهـا خلّـي البـال تكثـر فتـوقـه
وسبـة عطيـة مقتـدر كلهـا مـنّ=تكسر جنـاح البـر بأكبـر عقوقـه
وسبة قوي يفرض على الكل ويسـنّ=سنة خطا او شـر محـد(ن) يعوقـه
وذاك الضعيف يجاهد الوقت ويشـنّ=حرب الشقا حتـي يحصـلّ حقوقـه
وناس(ن) تصاحبها على الطيب وتظنّ=ان الصديق اللـي علومـه صدوقـه
واثر الكذب ياصاحبـي لعبـه وفـنّ=وأصدق صديق(ن) ماتميّـز فروقـه
معذور قلـب(ن) للمـلا بيّـح و ونّ=كثر القهر والضيـم أدمـوا عروقـه

الموضوع الأصلي: $خافيات(ن) للبشر ما يسلّن $ || الكاتب: بنت الرجال || المصدر: منتدى الجبلان الرسمي

المصدر: ::منتدى الجبلان الرسمي::