حس بشعوُر إنهزم .. وأحلام مقبوُره
أو تدري شلوُن .. خل الناس تقراني
مبطي وأنا أقول .. قلبك ناسيٍ دوُره
وإحساسك العذب ما اشوُفه على شاني
شف كيف نفسك على شاعِرك مغروُره
أو شف خفوُقك إذا هو .. ما تناساني !
يا فاقد الحس صدري عاملٍ .. ثوُره
حتى بقت وإستقرت .. داخل أوزاني
قصرك ما بين الحنايا .. ماتت زهوُره
منك .. ومن هالزمان اللي تحداني ، !
نفسي إذا ملت الحقران .. معذوُره
مجني عليها وقلبك .. حضرة الجاني
اليوُم فاق الضمير وشعشع بنوُره
يالله تحييه .. دامه فاق وأحياني !
من عقب ما صغتك بحبي وسنيوُره
خذ عطرك .. ووردك العطشان وإنساني
دنياك بتدوُر .. والدوُره هي الدوُره
بتشوُف في وقتها .. من يفقد الثاني
وإسمع كلام الذي ثابت على شوُره
ياللي إستبحت بخطاك تعذب أجفاني
أول بنينا قصر حبك .. مع سوُره
واليوُم ما كنك إلا من حدا اخواني !
إسحب ذيوُل الندم وبنفس مكسوُره
وبأسمعك كلمةٍ .. والله لا يبلاني : -
قلبك ترا قلب ضايع ناسيٍ دوُره
لذلك أقول : خل الناس تقراني !