مبداي باللي يامر الشمس وتغيب = اللي رفع سبعي وسبعي بسطها
ربًّ علم ما يحوي وما حوى الغيب = وصان النفوس المكْرمه عن غلطها
وعزّ الرجال اللي تعّز المواجيب = ولاّ الدنايا كل ميسم لعطها
أَقولها لمحرفين المكاتيب = اللي تساقط هرجها من سقطها
من حر ما فيها تحيّر وش أَتجيب = أَحدي قصر دعواه وأَحدي مغطها
وأَنا ما همّي شاذبين العراقيب = اللي تزايد يا بو طفره لغطها
دامي مرباهم ماوسس على الطيب = عز اللّه أَنّه خاسري من غبطها
عوجان الأَريا.. منكرين الأَصاحيب = أَسماً تزينها سوادة نقطها
ترسل على روس الفتايل مناديب = الله يعاقبها ويكثر شططها
ومدامني من فوق روس المواقيب = أَهل اللغا ملزوم نسحب بسطها
هذي هي الدنيا يا نايف تعاجيب = تشعط وتلعط وأَحدي ما شعطها
واليوم كلي قام يعوي كما الذيب = وعصابته من فوق راسه ربطها
ذيابةي (عند البني الرعابيب) = وعند الرجال تضيع رسمة خططها
جاتك مكاتيبي ورد المكاتيب = وراس الفتيله في يدينك شخطها

جتني بيوتي كنّها شمخ النيب = وهي منهو في أَمراحه ربطها
يسوقهن سواقهن فالمشاعيب = واللي تروغ عن مسيره خبطها
ضميا.. وعندي صافيات المشاريب = من جمةي تروي الكبود وفحطها
أَنا لهن من دون شكي ولا ريب = دام العفاسي شكوته لي صفطها
الشعر حَبك وسَبك معنى وترتيب = فرايدي.. ما بين خذها.. وعطها
أَحدي يهندبها بكيفه تنهديب = وأَحدي يمشيها والآخر عبطها
وفهد لقى بعض المشارب دغاليب = ولا هي عباطه ويتعالج عبطها
رايه عسى راي العفاسي له يصيب = فتش.. ومن فتش بحاجه لقطها
من راقب الغادين يطلع له العيب = والله يسخط فالعباد بسخطها
وأَقوله مالك حقوق ومطاليب = أَقضب أَحبالك دام غيرك فرطها
ما انتَ وكيل لراعي الجمس والجيب = كلي يغني والمكينه خرطها
شبعوا.. وقاموا ينفخون اللغابيب = وتخالطت شمغ العرب في فوطها
والاّ ترى الأَجواد فوق الشناخيب = لو زاد هرج الهابطه ما هبطها
لو زاد هرج مدّورين العذاريب = الصدق يبقى والرديه قفطها
وعليك باللي ماضيله تجاريب = وان جات زله صاحبله زرطها
يقّدر الصاحب حصان الأَطاليب = ويكرّم اللحيه وغيره ملطها
القرم خلّه دايم أَصحيب وقريب = دام الشكاله في أَسنونه قرطها

الموضوع الأصلي: العفاسي وأبوطفره ( رديه ) ..! || الكاتب: " فهد الجبلي " || المصدر: منتدى الجبلان الرسمي

المصدر: ::منتدى الجبلان الرسمي::