القلب يحزن - للمبدع سعد الطلحه

القلب يحزن والمدامـع غزيـرة

في جوفي ناراً من لهبها تبكيـت

والدار ظلما كانـت أمـي تنيـره

يايمه وينك من دونك خلا البيـت

قلبي تفطرعلى الفرقاء المريـره

أمنـت بالله وبأقـداره ترضيـت

الموت حقٍ وكـل لـه مصيـره

وموت النبي قبلك يايمه تعزيـت

هذا جلالك وريحك فـي عبيـره

كل يوم أشمه واذاشفتـه تهنيـت

صوتـك يايمـه يامحـلا أثيـره

حنانـك يمـه يخلينـي تدفـيـت

يايمه منـه أجيلـه وأستشيـره

يعدلني لاشفت الصواب وتنحيـت

يوم كنت عندي وكني أمير ديره

كلن يناديني يقول لي تغليت

يوم رحتي يمه وكني في جزيره

وحيد عن الناس تواريت

اجي دويخ وقت الظهيره

ماحد سئل عني يقول تغديت

وابيت ليلي وعيوني سهيره

كم الليالي نايم ماتعشيت

يايمـه كلـن يناظرلـي بحيـره

من يوم رحتي وأنا اللي ماتواسيت

ياكم تعلم مـن معانـي غزيـره

يامنهـل التعليـم منـك تربيـت

كم قصة ٍقلتي وللماضي نسيـره

ولاجيت عندك بسواليفك تسليـت

اااه يايـمـه لنظراتي الأخـيـره

مليت كفـي تـراًب ثـم حثيـت

أبشـري يمـه بدعـوات كثيـره

كل ماذكرتك وللرحمـن صليـت







رحم الله أمهات المسلمين الأحياء منهن والأموات

الموضوع الأصلي: القلب يحزن - للمبدع سعد الطلحه || الكاتب: وهج || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::