قم يانديبي شغل الجيب بالحال=أبزهم الصاحب وبآخذ علومه
أركب على اللي لامشى قام يختال=من وارد اليابان يفرق بسومه
أمواصفاته يافتى تشرح البال=تجلي عن القلب المعنى همومه
ساعة زهمته من بعد خطنا طال=كنه يقول القلب منهو يلومه
قال أحتزمبي جعل تفداك الانذال=(الحر حر وماكر البوم بومه)
نعم نعم v.x.r في كل الاحوال=يجلي عماس الراس ويطير نومه
ياتو زان الجو ياطيب الفال=وخليت راع الثوم يبلش بثومه
نصيته لدار المكارم والافعال=دار الصباح ووين منهم خصومه
يسعد مساها صغار وكبار وأطفال=وعم كل الدار شعب وحكومه
تراي ماسمع به سواليف عذال=حتيش لو قالو ذبحنا سمومه
نصيته لرجلن من سلالة أبطال=يومن ولد اللاش ضاعت علومه
بدر ولد صاهود ياكيف الاحوال=عساك متهني بخير ونعومه
جيت أشتكي يابدر من سلت الحال=وقبلك شكيت الوقت شهره ويومه
صحيح قالو ماشكى الوقت رجال=لاكن شكيت العشق يابن العمومه
امن الدلع يابدر ماتلبس الشال=ولاستر جسم الغضي الا هدومه
تدري وشلي زادها حبت الخال=أركت على قلبي وزادت وسومه
قفت وراحت لاكن الدمع ماسال=يومن قلبي قاسياتن عزومه
وختامها ياجعل تفداك الانذال=أبيك تنصح قلب زادت همومه

بدر صاهود

حيالله الي جا من الشام مرسال=وحيالله الي مرسله في لزومه
أقلط ولك بالصدر مسكن ومنزال=وضيوفنا تلقى الشحم ومحشومه
وهات الكتاب وباقي العلم لا زال=ياتيه مع مرسولنا في قدومه
قم يانديبي وأستلم بدع الامثال=واركب مع الي مايضيع يمومه
طيار ضاري للصعايب والاهوال=نفسه على قطع المسافه جزومه
من فوق طياره بها الكف يهتال=مستورده يادوبها ومعلومه
صناعها مايلبس شماغ وعقال=كافر ولبسه قاصراتن كمومه
واخذ جوازك وأتكل بالله الوال=والتذكره لازم تكون امختومه
واجلس وقل لمظيف الركب فنجال=ويجيك به خشفن عجيبه ارسومه
وليا شغل الكبتن وجا الارض زلزال=واعلن بربط الاحزمه لا تلومه
ناوي يعرضها السما واشهب اللال=وياخذبها من بعد الاقلاع حومه
وليا ستمرت تطوي اميال واميال=من قو سرعتها تفرق غيومه
سردن على قطع المسافات سلال=توصلك لديار الشريف الخدومه
وقل ياعزيز صاحبك فالبلد عال=ياللي تغوص البحر حنى نعومه
لنا مع اهل الشعر مخرج ومدخال=نميز المعنى وندرا اسلومه
والعشق كم به يوم جريت موال=في وسط قلبي بيناتن ارسومه
وانته شكيت من اللذي حط سلسال=تشكي من اللي صوبك في اسهومه
لاكن ابا اسوي على راسك انزال=قدام تاخذلك مع الزين سومه
لايفتنك من حط بالقلب ولوال=وسحرك في زود الدلع والنعومه
كل يوم له في بيت مسكن ومنزال=اليا امتلى مخباك جتلك دحومه
تضحك مادام البوك مملي من المال=وليا فضى مخباك صارت كتومه
لاتتبع احلامك ولا تبني امال=ترا القلوب عن الخراب محكومه
شفك تحرا عودتك والبطى طال=مافيه شكه والامور محسومه
في زينها ماهي تصنع وتحتال=مير البنادم دوم نفسه ظلومه
واختامها مني تحيه واجلال=وعسى عزيز مايطول قدومه

الموضوع الأصلي: صوت عبدالعزيز بن لامي صدى بدر بن لامي || الكاتب: عزيز بن لامـي || المصدر: منتدى الجبلان الرسمي

المصدر: ::منتدى الجبلان الرسمي::