(الاخوان المؤرخ )و(نيك نيم )ومتأكد انكم مو مطران التاريخ واضح ومحفوظ هذي المعركة اللي ذكرتها ((كون دخنه)) وشارك فيها الجبلان ومعهم مطلق الجبعاء وقد استفزع فيهم زامل بن سليم امير عنيزه على القحاطين لعلمه بالخلاف الحاصل بينهم وبين مطير واستغلها المطران وكان فعلهم فيها مشهود ضد
ال عاصم ومعهم السحمه من الجحادر بقيادة ناصر بن قرمله وانهزموا فيها القحاطين وهي اللي ذكرتها بالتفصيل ويقول فيها ناصر بن قرمله يوم بعض الحجادر هرب خوف من الحرب
يوم على دخنه علينا تهيا ** يوم قصا الفرسان والمستحين
رديتها لعيون بجدا وهيا ** وام الحوار اللي تجر الحنـيــن
(يـومن بعض الناس عيا ** ماهمه الا حرمته والجنين)*
* يقصد الذين هربوا وخافوا من الثأر
وقال فيها مطلق الجبعاء يتوجد على فرسه ومفتخرا بالنصر
لا واحسايف سابقي يا هل الخيل ** يازينها لا جات تبار المطيه
مسلوبة الذرعان مركوزة الذيل ** باغ عليها فك راع الرديه
ضربت برمح ساطي له شناشيل ** من كف ناصر مهد ينبه عليه
حذفتها في هيئة كنها الليل ** كله لعينى صيحة الدحملية
خذنا القضا فيها خيار الرياجيل ** حامي عقاب الخيل زبن الونيه*
* يقصد فيه حزام بن حشر وغيره من الشيوخ
وقال ابن مسعر العاصمي يرثي حزام بن حشر حيث انه اصيب ودفن في نفي
رحنا وخلينا زبون الحفايا ** على نفي في قاعة الحزم نزال
لاواجملنا اللي يشيل الروايا ** اليانوخوا للشيل وثنات الاجمال
ليته مشاورني واسوق الفدايا ** بمغلافات مايشلين الاثقال
اما موضوع وراط فهو موضوع مستقل لوحده
وراط شعيب بسدير بالقرب من ثادق ونزل فيه القحاطين وكان هذا الكلام بعد دخنه بفتره واجتمعت علوى فيها بقيادة ماجد بن الحميدي الدويش وهي المعركه التي سحق فيها قحطان واشتركت فيها حميع علوى ومعهم العبيات طالت المعركه واستفزع القحاطين بالشيابين من عتيبه وسمع ابواثنين شيخ سبيع وجاء مع مطير هو وربعه فزوع لموقف سابق لمطير معهم
وقد قيلة فيها العديد من القصائد
عجير بن طلمس
ياراكبن حر دله بالخاضير ** متيهن كل الشتا مع ربيعه
يسرح على تقليطت الحوض للبير ** والعصر بين منيصفه والوريعه
تلقى بيوت مدهل للخطاطير ** ياحيف لولا للنزايل مطيعه
ناصر1 لفانا صايلن بالمظاهير ** يقول من علوى علينا هزيعه
جونا وجيناهم وسقنا المغاتير ** سوق الجلايب يم سوق المبيعه
هجن وصفينا عليهن طوابير ** ورد بنا ورد القطا لشريعه
حنا نبيع الروح دون الغنادير ** بعناه بيعة رمة مستبيعه
جمع الجحادر قدم علوى طمارير ** مايسلمون الا من الله شفيعه
وغنيم 2قفا بسبايا3 مدابير ** ووراط 4 سال من اشقر الدم ريعه
والله يا لولا نايفات الشناظير ** ماعاد ينكس من يهرج رضيعه
تغانموهن يابسين الحناجير ** وغدا لهم عن الاهاوي منيعه
وهذي قصيدة عوير اخاه
ياراكب من عندنا عمليه ** تقطع رهاريه السهل ووعورها
ماهسها الراعي يرد رعيه ** ولا مصها وقت الشتا قرقورها
ترعى من الصمان الى ماويه ** لما الاباهر عقب وثورها
تلفي لنا يم الفروق حمايل ** اهل سربة يشكو العدو دعثورها
قل يا هيته جت مع شعيب العوده ** مقرود ياللي ماحضر دافورها
الخيل هي والجيش غاد حفه **والذود قدمه طافح مقهورها
نركب عليهم حدب كل مجرب ** وخصبات عارفين حكورها
نطعن لعين كل شقحن مردم ** يوم القرايا غلقت مسعورها
ونطعن لعين الي تصيح وتنخا ** تبدا الضلوع وتنثني لبزورها
ونطعن لعين اللي تصيح وتنخا ** ومغورقاتن بالدموع حجورها
من بوزت الاوراك ملهوفة الحشا **بنت الشيوخ مضيفه بعسورها
ماني بكانيها تراها موضي ** الدحمليه5 كنها من حورها
فعولنا وصلت ديار ثويني ** وجنوب وصلت يم هوجا وكورها
ترى الوعد الى جا الخضار محقبه ** اليا نثرت غر السحاب بكورها
وهذي قصيدة دعيث المنجلي السهلي اللي حضرها يوصف المعركة والقصيدة اطول من هذا ولكن هالابيات ماحفظ منها
سبة بطانا دفعنا للمطيه ** نضف جنحان طويلات ونشاط
الخيل نعطيها القصب والنسيه ** والمال من كثر المناويخ منلاط
الصبح سقنا ذود ذيب السريه ** وتحاضبوهن لابسين الزقلاط
عثا بهم قنور والشمس حيه ** وحمى جفيل الخيل عرقات الاباط
بني عمر6 جونا رجال الحميه ** من فعلهم هذال7 يدوس ماحاط
حريمهم من عقب ركب الحويه ** ركبن حراذين حثاحيث واملاط
1- ناصر بن قرملة
2- غنيم بن شبلان (فارس علوى)
3- سبايا الجحادر
4- شعيب وراط في سدير قريب ثادق
5- الدحملية موضي الشقير من الدوشان
6- بني عمر ربع ابواثنين
7- هذال بن فهيد امير الشيابين
ويقول دعسان الدويش في وراط
[]ياراكب من فـوق زاهـي خطامـه
منتوب من نسل النجايـب اهمامـي
مافوقـه الا قربتـه مـع ولامــه
مع السفايف والرسـن والخطامـي
سلّم على عمـاش عطنـا علامـه
سلم عليهـم ثـم عطنـا العلامـي
ابمـدح الجبـلان1 يـوم الكتـامـه
سدو مسـد اللـي حـدر للزحامـي
ابو سعـود غنيـم2 فـوق العلامـه
خيالة المظهر مـن عصـر عامـي
ومرزوق3 شوق اللي خفيف كلامـه
للـي يحطـن الذهـب بالزمامـي
ولانيب ناسي من ذوي عون4 (لابه)
هل سربة تركض على الموت حامي
في صف ابوهايف5 زبون الخمامـه
وجاسر6 عسى عمره من الموت دامي
ولانيب ناسي من خوالـي الغامـه
هل سربة تنكسـر حريبـه دوامـي
اليا اوحيت جدعاء7 يامدوّر سلامـه
كـب الطمـع ثـم تقـدّم شمامـي
وذوي رشيد الحرب ترهـن يدامـه
اهـل فرنجيـن يقـص العظامـي
درع لنا في مخملـن فـي كمامـه
وحنا عليهم مـن قديمـن نحامـي
وكنتم جمل صايـك ترانـا بلامـه
يرجع هديّن عقب صـك البلامـي
وكنتوا كما سيلن حدر مـع طمامـه
الله خلـق للسيـل خـدن ارغامـي
وكنتوا كما ضلعن زمى في طمامـه
حنا كمـا نجمـن يقضّـه هدامـي
من ذل هاك اليـوم شانـت علامـه
ياحـف والله يالرفيـق الخمـامـي
ودك توسرلـه علـى وسـك تامـه
والا حمارن يتبعـه فـرق شامـي[
1 - الجبلان ايضا لهم دور مشهود في وراط
2- ابوسعود الفارس غنيم بن شبلان وقد قتل ابن حشيفان شيخ ال روق من قحطان
3- مرزوق بن شبلان
4-ذوي عون (علوى)
5-ابوهايف الفغم
6-جاسر بن غنيمان شيخ الملاعبه
7- هل الجدعاء عزوة العبيات من مطير
هذي هي وراط بأختصار
|