مطلق , الازيمع , الشاعر , سالفة , وقصيدة

سالفة وقصيدة عن الشاعر فهد بن مطلق الازيمع

	السلام عليكم ورحمة الله وبركاتة سالفة وقصيدة: الشاعر فهد بن مطلق الأزيمع المطيري ــ من أهل حائل ــ يذكر عنه الكرم والمروءة والأخلاق النبيلة اضافةٍ إلى شاعريته التي أضفى بروحه المرحة عليها كثيرا من الوهج مما جعل قصائدة محببه إلى النفوس وتتناقلها الناس. كان أخوه (سالم) حصل على (تثمين) لبيته في حائل, وصدر له شيك على مؤسسة النقد بالرياض, فما كان من (فهد) إلا أن أخذ بمداعبة أخيه, حين قام يصلي بالمسجد المجاور للمؤسسة قبل صرف الشيك, حيث وضعه في جيبه, وأثناء الصلاة كان أنتباهه عند الشيك خشية السرقة, يقول(فهد):

	ما جور يا رجلٍ بدا فيه خلّه حلقه يبس من خير والشر فاته خويّه الأملس صلاته فطن له رجلٍ صدق ولا كذب مع شفاته يقول أبو ناصر كلامٍ يدلّه قولي بشاني بيت هذا ثباته كبّر يصلي .. وانتبه صاحبٍ له الشيك في جيبه ويكرب عباته يرجف شنق صدره تقل فيه علّه حمّى فرح بغت تصرّم حياته يده على المخبا عسى الله يحله وإلى سمع مشيٍ سريع التفاته وشلون بالمسجد تقل فوق ملّه آمنت بالله كيف يبست لهاته نفسه على جمع الدراهم مْغلّه ومن جمعهن وشلون يخرج زكاته؟! وقد رد عليه (سالم) مدافعا عن نفسه, وقد تعمّد أغاظة أخيه (فهد) بما ينوي القيام به بعد الحصول على المبلغ!!.. موضحا بأن البادي أظلم. يقول(سالم): دعواك يا فهيدان لازم نعلّه والقيل والقيفان خذها وهاته هي عادة العايل لزومٍ ندلّه ورد الجزاء بالقوم حاضر حلاته الشيك أخذته فيه (سبعين) كلّه والفضل لله ما جحدنا غناته نبي من الخفرات بنتٍ بْفلّه عين العنود اللي بقفرٍ فلاته وانته على فقرك رمادك تملّه مع العجوز اللي بكبرك بناته وكثيرة هي المداعبات بين (فهد) وأخيه (سالم) وأغلبها حول النقود والمال, من ذلك قول(فهد): علّتك ما مرّتن مرّه ولا مرّيته والمجرّب للمرض مذكور خير مْداوي لا جتن حمّى الفرح والكيس ما عبيّته كيف أسوّي بالدراهم يا كراع الشاوي ما نلومك لو رجف صدرك ولو حبيّته لعن أبوهن يودعن المندهك صقلاوي يوم كبّرت بْصلاتك للإله بْيته وين رحت .. ووين جيت .. ووين فكرك داوي من تسنن حول جنبك ولمسك كزيّته في صلاتك يا عميل الخير تقل تْراوي قال أبو ناصر صلاتك ليش ما وفيّته باقيٍ لك ركعتين وقلت له بالهاوي! والشطر الثاني من البيت الأخير إنما بالغ فيه (فهد) على سبيل الدعابة,وتحيات لكم بووود

الموضوع الأصلي: سالفة وقصيدة عن الشاعر فهد بن مطلق الازيمع || الكاتب: محمد بن حلبيد || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::