يامل عين في محاجيرها شوك = والقلب به من لذة النوم دكاك
لا دك في قلبي من الهم داكوك = جاوبت طلبات الحمايم على الراك
عزي لحالك يا عزيز وانا بوك = كان الزمان الي وطاني توطاك
افهم وصاتي ياعزيز وانا بوك = دامك صغير وغاية العلم يبراك
تراه ما ينفعك عمك ولا خوك = لا صار ماتقضي لزومك بيمناك
وربعك ان بان الخلل فيك عافوك = اقرب قريب أبهم من الناس يشناك
ان كثر مالك صدقوا لك وطاعوك = وان قل ما بيديك شانت حلاياك
لو تطلب الماء عندهم كان ما سقوك = ابعد مزارك عن وطنهم ومرباك
وان طاب حظك صدقوا لك وحبوك = وان بار كلن ما يبي غير فرقاك
ولا اعترض لك من صروف الملا صوك = كلن تبرا منك ماهوب وياك
هراجة المجلس إلى جيت وروك = منازل تطرب نظريك بدنياك
وليا قضوا راحم تراهم وخلوك = تفرقوا وانت أحتمل كل ما جاك
كنك سراج البيت للنور شبوك = وليا قضى اللازم حدا الربع طفاك
ولا كما ليمونة الحمض مصوك = وليا قضى منها الطعم فرغوا ذاك
واللي يجي من رفقته ريب وشكوك= احذر عنه لاياك تصدق بمسراك
وليا جفوك اهل الوطن واستخفوك =قلع غريسك منه واهدم ركاياك
تراك لو تمشي على الرجل صعلوك = احسن من الي تلتجيلة له وياطاك
عطهم وضيفهم إليا منهم جوك = واغلق ضميرك لا تعلم بقصياك
ان طبت ما حبوك وان عبت زالوك = تمضي حياتك ناقل داك برداك
وليا قضيت من الوظيفة تناسوك = خفت موازينك وكلن تهقواك
واصحا لخلان الرخا لو تغالوك =اعرف ترا اطيبهم إلى احتجت يجفاك
كنك خوي مقيط دهووك واغووك = حقك عطاك ارشاك واقفى وخلاك
احذر عن العيبة ترا الحق مدروك = مثل العمل يدرك ما منه افكاك
ان كان عدوانك على الضيق حدوك = فاخصم طلابتهم مع أجفاك وقداك
وان كان هم لمشرف الحق ماشوك =ناظر مطاليع الفرج قبل مبداك
وزرهم تراك أليا توانيت زاروك =ان ما بديت صاحب السوء يبداك
لو عزروبك من المصايب وغدوك =ما يذبحونك قبل تدني مناياك
واحلم على الجاهل ترا الحلم مبروك = وقم للضعيف اللي من الضيق ينخاك
ودأمح خطا جيران بيتك إليا أوذوك =ترا القصير وحرمة الجار بحماك
عطهم رواتب حقهم لو تناسوك = في كل ما يصلح لدينك ودنياك
وصلاة ربي عد الاوراق والشوك = او ناض براق وما هل سفاك

الموضوع الأصلي: تراه ما ينفعك عمك ولا خوك ** لا صار ماتقضي لزومك بيمناك || الكاتب: أبومحمد || المصدر: منتدى الجبلان الرسمي

المصدر: ::منتدى الجبلان الرسمي::