أفكرت بالدنيا وبيحت مكتوم=ما حن في ليحان صدري وحامي
فكرت ولي بافكار الايام مفهوم=بقلبٍ شوى جاشه لهيب الغرامي
يخفق خفيق اسبوق طيرٍ يبي الحوم=ويرف من جاشه رفيف الحمامي
شاهدت بالدنيا عبارات وعلوم=وعجايب باحوال حام وسامي
اسجم واسبح بها كما الغرق بالنوم=كني على لوح به الموج طامي
كم دولة صالت وزالت لها حوم=أخبارهم وأذكارهم كالحلامي
استغفلتهم يم الأجداث بسهوم=يقطعك دنيا ما لعيشك دوامي
ما قدر الباري على العبد مقسوم=يسلم ويرضى بالقدر والسلامي
العمر له حد بالأوراق مرسوم=والرزق مضمون حسابه تمامي
فلو تسأل اللي عاش به دهر أو يوم=عمره سوا اللي عاش به ألف عامي
اصبر الى منه صفا الدهر لك يوم=يكويك مسمار على الكبد حامي
من خاطب الجاهل جهل منه ملزوم=حده لما ياطا الخطا بالحسامي
من شاف عيب الناس بالعين معلوم=مغرى وعن عيبه عما العين عامي
هيهات من يسلم من الشوم واللوم=رضى الناس فيها غاية ما ترامي
ولا ذكر مخلوق عن العيب معصوم=الا الذي ضلل عليه الغمامي
فكم واحد حده طغى الجهل والزوم=لما شرب بالكره كاس الحمامي
وكم ساري في تايه الراي منجوم=اصبح بضحضاح بعيد المضامي
ومن يبذل المعروف بالنذل مليوم=خاب وخسر من ياصفه باللئامي
حذراك خلان الرخا عدهم قوم=خلان من دامت نعيمه ودامي
ان أدبرت دنياك عدوك معدوم=مروا ولا ردوا عليك السلامي
عنز الى من ضدك الدهر مضيوم=عد يصدر حايمات الظوامي

الى ابصرت بالدنيا تكدر لي الصافي=تعذر زماني ما حصل صاحب وافي
افيض عليه اسرار ما التج بالحشا=وكل شعيب له مفيض ومطافي
تخير من اجناسك رفيق يودك=شفيق وثيق يفهم القيل عراقي
يقبل بزلاتك ويبصرك ما خفا=وقلبه دربيل للابعاد كشافي
من خاطب الجاهل فهو مثل من كشف=وجهه وقابل شعف عاصوف الاصافي
ومن لبس تاج الكبر ما صان عرضه=ولو مطر جوده على الخلق هتافي
ومن طاول أطول منه ما ستر ساعة=يجاهد جنود وينقسم رايه انصافي
وباشر هل المعروف منك بتواضع=وهل الشر باشرهم بشر وتستافي
فالعوشزه لو هي على النيل ما اثمرت=بورد ويوقى الشوك والغصن غريافي
وأبرم دواليبك للاسباب ربما=توافق مفاتيح للاغلاق تكافي
ومن رام صعبات المشاكل برايه=ادرك بها اشيا ما ينوله بالاسيافي

جار الزمان وفرق الشمل مذلول=ونفس فجاها من هواها زواله
امسى فقيد الروح ما عنه مسؤول=جرح جريح الدم ياوي لحاله
بالويل والولوال عمال مشغول=إلا ولا حي رحوم شكاله
واصبحت من صرف الينا تقل بهلول=حيران يصفق في يمينه شماله
من العام ما عود على الحول مكتول=وأحصيت ساعاتي برجوى وصاله
وبشرت يوم طلوع شعبان ودخول=شهر الصيام اتلفت اناظر هلاله
ودي يزول وفرحتي به وانا اقول=الله يعجل ما بقى من لياله
اسألك بالمطلوب يا خير مسؤول=يا من سمك سبع السما بالعدالة
وأوفي بسبع الارض بالعرض والطول=وشرف على خلقه نبي الرسالة
بحسناك يا من دام حي على طول=تلطف بحال اللي برى الود حاله
على وليف فارق الروح يا طول=مابت مستر الجوانب بجاله
بالغي غرقين على غير مفعول=الا هوى نفسي وتشويق داله
لوا حظه به سحر هاروت معمول=يوري الرضا لي في تغازل عزاله
كالورد بالوجنات وان بات مطلول=وأقفا الزهر مهما ظهر من جماله
مجمول مدلول له الوسط معزول=طفل قمر بالزين بدر الكماله
لو كثر الناصح فلا العذل مقبول=لكل يكون بحال تدبار حاله
ما اسمع ولا ابصر يا هل الذات وعقول=هيهات من يبغي الرضا لا يساله
فلا العزا والياس والصبر مجهول=لا شك باح الصبر ما لي وماله

يا مل قلب كل ما التم الأشفاق=من عام الأول به دواكيك وأخفوق
يجاهد جنود في سواهيج الاطراق=ويكشف له اسرار كتمها بصندوق
وان عن لي تذكار الأحباب واشتاق=بالي وطاف بخاطري طاري الشوق
دنيت لي من غالي البن ما لاق=بالكف صافيها من العذق منسوق
احمس ثلاث يا نديمي على ساق=ريحه على جمر الغضا يفضح السوق
أحذرك بالنيّه وبالك بالأحراق=اصحا تصير بحمسة البن مطفوق
الى اصفر لونه ثم بشت بالاعراق=وصارت كما الياقوت يطرب لها الموق
وعطت بريح فاضح فاخر فاق=ريحه كما العنبر بالانفاس منشوق
دقه بنجر يسمعه كل مشتاق=راعي الهوى يطرب الى اوحاه بخفوق
وكبه بدلة مولع كنها ساق=بنورة منصوبة تقل غرنوق
خله يفوح وراعي الكيف يشتاق=الى طفح له جوهر صح له ذوق
وزله على وضحا بها خمسة أرناق=هيل ومسمار بالاسباب مسحوق
مع زعفران والشمطري الى انساق=ريحه مع العنبر على الطاق مطبوق
والى اتفق هذا وهذا بتيفاق=صبه كفيت العوق عن كل مزهوق
بفنجال صين صافي عنه الأرماق=يطرب الكرسيه مع البال معشوق
شكله على الفنجال صبغ كما الراق=او دم قلب وانمزع منه معلوق
راعيه كنه شارب ريق ترياق=كاس الطرب وسرور من ذاق له ذوق
الى انطلق من ثعبته تقل شبراق=دنق تصور بالحمامه على الطوق
يعتاض عن خمر السكارى بترياق=غرو تشف شفاه والعنق مفهوق
عبث يعيل بحبة منه ما ماق=وهو يشابه ساطع البدر بشعوق
والى عنج في وجنته بارق حاق=عجل رفيفه بالطها القمح مطبوق
والعنق كن الورس والمسك به راق=مع مشخص في صدره الشاخ مذلوق
يمشي برفق خايف مدمج الساق=يفصم حجول ضامها الثقل من فوق
الى صفا لك ساعة وانت مشتاق=اقطف ثمر ما لاق والعمر ملحوق
اول صوابي رنة الحجل بالساق=وحجول من تشكي خلا خيله الذوق
والله لو يمشي شفاق بالاسواق=من الملا ما يمطخ الخمس مخلوق
والى حصل ما قلت عندي فالارزاق=في يد كريم كافل كل مخلوق

لعل براق صدوق خياله=محن مزن مرجهن وهطال
حين ارتكم كنه شوا مخ جباله=مترادف ذيله يجي سيلة ارسال
لجب الى ربرب ربابه صباله=من الشرق نسم رد الأول على التال
تشوف عياز المزن وقت احتماله=طبوق بجنحان الخضاري له امثال
تنظر خشوم المزن يوضي بجاله=صفايح الفضه بصالوخ صقال
لكن طفاح الرباب احتبوا له=هجمة مغاتير حداهن خيال
كن الرعد به والبروق اشتعاله=تتيبع اطواب الفرنجي الى صال
ونضناض برقه في مثاني خياله=لا نشروا شرع المراكب بالادقال
الى هل طار غبار خده وشاله=والتج وديان الوعر والسهل سال
يسقي مفالي ديرة ضم جاله=ما يعجب الناظر بشوفه ويهتال
برباه حور العين يسحر جماله=وحماه هو مربى الجوازي والاطفال
دار لنا وادي الرمه عن شماله=غربية الضاحي وشرقية الجال
في روضة شرف المباني قباله=لجة غروس دايره تقل تفصال
فسايل كالتين يا حي فاله=وفواكه فيها الثمر والحمل مال
جار لنجد مشرع كم عناله=راج ومحتاج ولافي ونزال
والضيف هو ويا الضعيف ارتكا له=اكرام النفوس اهل القواعد والافعال
حمو حماها بالمراجل رجاله=لين أوحشوا من جا لجاله بالافعال
براي وتدبير وعقل وصما له=وصبر وتقديم وتوخير الأحوال
فإن بركوا للراي شالت حماله=زمل التخوت اللي يشيلون الاثقال

أم لنا من عقها من عياله=عدم البصر والسمع والمال وعيال
وصلوا على المختار ختم الرسالة=بأزكى صلاة تبلغ الصحب والآل

يا محل العفو عفوك يا كريم=ولطفك اللي شامل كل الأنام
يا سميع يا بصير ويا عليم=يا قوي يا متين ويا سلام
يا حميد يا مجيد ويا حكيم=جل شانه لا يهام ولا يرام
بنور وجهك يوم ناجاك الكليم=عند سينا خر موسى ثم قام
بحرمة الكعبة وزمزم والحطيم=والحجر هو والحجر ويا المقام
موحد يدعيك بالليل البهيم=بالتخضع والتضرع بالظلام
خاشع لك خاضع لك مستقيم=اسألك وأدعيك باسماك العظام
ان تروف بحال من جسمه سقيم=علته تبرى لها خمسة عوام
من بحر مجدك وجودك يا كريم=نفحة يسعد بها دوم الدوام
داوني بدواك من داء اليم=واشفني بشفاك يا من لا يضام
مدله نفسي بتدلية الفطيم=عن لذيذ النوم مع طيب الطعام
فابن آدم لو يعمر بالنعيم=لو تمادى خير عمره للعدام
ما لي اشكي غير للرب الرحيم=سامك سبع السموات العظام
من عميم احسانك ارحم يا رحيم=يوم نزع الروح وان جاه الحمام
قام يصعدها ويحدرها غريم=من اعضاي الى الدماغ الى البهام
عقب نزع الروح لاجن الحريم=ولجو أهل البيت واشغله الغرام

الموضوع الأصلي: ديوان ((محمد العبد الله القاضي)) || الكاتب: أبومحمد || المصدر: منتدى الجبلان الرسمي

المصدر: ::منتدى الجبلان الرسمي::