أنا والليل والعبره وجرح وخاطر مكسور =ونفس من هجير البعد والحرمان مقهوره
وقلب ضامي لشوفك ولا يروي ضماه بحور =وعين تحتري لحضة غياب الطيف و حضوره
ونار تنطفي مره ومره تشتعل وتثور =وقول النار مقدوره وهي ما هي بمقدوره
حسبت الليل بغيابك تمرن الليال دهور =وكني شايل بقلبي ليالي الوقت وشهوره
ألين إن الجفى شد الركايب ونتهى دوره=تحريتك على درب القصايد من ثلاثة شهور
تخيرت الغرام وجيت لا راضي ولا مجبور =وجيتي تسبقين خطاك مرضيه و مجبوره
وانا ما كان لي رغبه أبين وكشف المستور =ولكن الغرام أكبر من الخفاق وشعوره
جمال وود وعيون ودلال وكبرياء شعور =وفتنه تخذل عيون النهار وينطفي نوره
ولك في خافقي صوره تلاشت بين ضي ونور =وخاف أسكت من الفرحه وتنطق بسمك الصوره
عرفتك ونتهت رحلة قساوة دربي المهجور =ولا يا جملة أيام الجفى والصد مشكوره
خذتني للجفى عزه وخذني للعناد غرور =وخاف أكون بعنادي حبيب ومات بغروره
وذا كانت مسافات الخيانه للغرام قبور =وش اللي يجبر العاشق يخون ويحفر قبوره
وش اللي يجبر الشاعر يدور للشعر جمهور =مدام انتي محبينه وعشاقه وجمهوره