:::((سعود جمعان في مطير)):::

هذي قصيده للشاعر: سعود جمعان الهاملي المطيري
في مطـــــــــــــــــــــــــــــــيــر

عن الغلط يا مقلب الهـرج تقليـب لا تبتلـون مطيـر فـي هالنذالـه
حنا نجازي راعي الطيـب بالطيـب وراع الردى نوفيه من راس مالـه
وكـان النذالـه لـلاوادم عذاريـب ما فيه عـودٍ مـا ورثهـا عيالـه
إخذ الكلام اللي على علم ٍ مصيـب وقوالـه اللـي مـا يـدور بدالـه
ومجمعة قفش الرصاص المكاذيـبب دع الزمـان وكـل بدعـة ظلالـه
حنا مطير اللـي نهـد الأصاعيـب أيـام كـل ٍ حيلتـه دون حـالـه
ورادة العـد المطـرف ليـا هيـب ونزالـة الديـره بلـيـا نـزالـه
في ضفنا ترعى الخطر شمخ النيب ومن وين ما طاح الربيـع تعنالـه
وعلى ظهور الجيش حرش العراقيب دجنـى جنوبـي البـلاد وشمالـه
ولا جا نهار ٍ ما عن الموت تجنيب العمر نرخص ما بقـى مـن ليالـه
يوم السعد بمخلصـات المطاليـب نلنا الذي محدٍ مـن النـاس نالـه
ويوم اللقاء بمصقلات المقاضيـب كم فـارس ٍ منـا سبايـب زوالـه
وفي مضرب الأمثال شلفا تراحيـب مضرب مثل لأهل الظفر والبسالـة
ماض ٍ لنا فالطيب عـدة تجاريـب ومن طاب فعله فالمجالـس حكالـه
وصديقنا يطرب له الكيف ويطيـب وعدونا مـا فـال الأجـواد فالـه
ماله جدى إلا يقلب أريـاه تقليـب ويشكي على من جاه من ما جراله
وخوينا لو هو من أقصى الأجانيـب ما قد يـوم ضيـق الوقـت بالـه
والله يالولا مرتب الوضـع ترتيـب اللي حكم شبـه الجزيـرة لحالـه
وخلى الغنم ما عاد تجفل من الذيب والذيب يجفل بالخـلا مـن ظلالـه
لتلقى لنا في كـل دولـه مناديـب وتلقى لنا من كـل مصنـع وكالـه
لعـل رب ٍ يعلـم السـر والغيـب الواحد اللـي كـل حـي ٍ يسالـه
يديـم عـز مكمليـن المواجـيـب حكامنـا اللـي حكمهـم بالعدالـه
ذا قول من عدى طويـل المراقيـب وهيض بمرقاب العنى مـا طرالـه
وصلوا عدد ما تبدي الشمس وتغيب على الرسول اللي بعـث بالرسالـه




سعـود جمعـان المطيـري

الموضوع الأصلي: :::((سعود جمعان في مطير))::: || الكاتب: راعي الوضحا || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::