ياقوافي الشعر كافي حزن كافي=الحزن ماهوب فيك الحزن فيه
ساعديني واظهري ما فالخوافي=قبل مخزون الحزن يثر عليه
لو ابرثي والدي في كل قافي=تعجز احروف الهجا الابجديه
مير شيَ في صميم الصدر زافي=ضيق اعروقن بجسمي داخليه
لاتلوموني وابا اقول اعترافي=والدي صاهود له حقن عليه
حقه اكبر من قصيدي والقوافي=والله ان حالي بعد فرقاه سيه
ادموع امن العيون الها رعافي=ماهو بكيفي ترا غصبن عليه
لاذكرت ايام وسنينَ اعجافي=عاشها في صبر وبيمنن جريه
كافح ابيمناه ماجتله عوافي=لين سهلها لنا في كل شيه
جفن حطه فرش والاخر لحافي=احتزمنابه وهو يمنا صخيه
حثنا بان الرجل لاقال يافي=وحثنا للمرجله في كل هيه
وحثنا بحب المغاتير الصخافي=ومن غلاه اغليت انا شوف المطيه
حط وضحن عزها عن كل هافي=عن هواها ماجلس في وسط فيه
وحط صفرن مامشت مع كل وافي=مابخل في حقها كفه نديه
يمشي مع الذود في كل الفيافي=وين ماذكر الحيا ساق الرعيه
لاذكرت الماقف الي معه طافي=والله ان كبدي تقل فيها شضيه
يوم نزل بالقبر تحت السوافي=والرمل من فوقه اتسفه يديه
والله يالولا من المولا انخافي=وخوف رب البيت لايغضب عليه
مايجي وسط اللحد راس السنافي=لاكن امر الله وذي سنة نبيه
ويالله انا نطلبك من قلب صافي=يالله المعبود يارب البريه
ترحمه وتجنبه كل انحرافي=في نهار الامتحان انته وليه
في نهارن مايفوز به المفافي=والخوي ماتنفعه فزعة خويه
ياعساه لجنة الفردوس لافي=يالله اني طالبك وارفع يديه