انا شاقني برقً رزيمه يسابق ماه=ترادم غيومه فوق بيدا السعوديه
على باب قصرً سقا الله من يرعاه=تهامل على طرافه اشويه اشويه
يخاف المطر راع القصر ينزعج بنداه=ولافيه غير القصر يذريه موليه
يخاف السحاب اليا نطحه الهوا واخفاه=تفرق مجاميعه هبوب الشماليه
ولا فيه غير القصر من هبها ذراه=ولكن راع القصر هيبه وشخصيه
هذا باب قصرً من دخل فيه ما ينساه=علي الحرام ايروح حاجته مقضيه
سكنه و عمره الي على طايله ممشاه=على خطو ابوه العود تخطي خطاويه
سمو الامير الي على الطيبه رباه=سعـود الـكبير الي سما في معانيه
وجده موحدها حدر سيفه وشلفاه=قبل ينولد عبدالعزيز و ثرا الهيه
خواله خواله شيوخً على لاماه=وجده من امه شيخ وامه عتيبيه
اميرً وابوه امير وخاله على ملقاه=عروق الاماره فيه منا و منيه
وانا ما اقول ان افضل الخلق لا والله=بشر والبشر تعرف حسانيه والسيه
ولا اقول ما فالناس مثله ولا شرواه=تراه ابوه حيه و راية الطيب ماريه
ولكن فيه وصوف تلبق على حلياه=وابا اذكر بعضها لو ماهي بمنسيه
تواضع وحسن اخلاق وايظن زعام وجاه=ومطوعه من طبوعه ثمانين بالميه
بشوش وهلا من عادته للذي ينصاه=يقلط ثلاث وخمس والسابعه نيه
رغم صغر سنه يحرج الناس فمحياه=ذرابة كلام و فكر واعي و عقليه
اعزه واعز ابوه و يشرف امخاواه=وانا ذاخره ليامي ان شانت النيه
تعنيت من داري ابي فزعته ولجاه=بعد ما انطعنت ابظهري براس شبريه
وانا ادري سموه لو يمدا العطا يمناه=كريم ويمينه في عطاياه ماويه
وابشكر سموك يا سموك على لقياه=سموك معي بذات تشكر مساعييه