أقعد مع نفسي وأهوجس وأطريه=وأذكر سواليفه وضحكة سنونه
وأذكر زماناً فات وأحلا لياليه=يومه على الدنيا قبل يدفنونه
ما باقي إلا ذكرياته وماضيه=وصورته فوق المغسله يغسلونه
أخر لقا من بيننا قبل أخليه=واقف على قبره قبل يتركونه
خلوه في قبره ولا حداً حواليه=قبراً يروع ومظلماتاً ركونه
قبل أمس قدامي يسولف وأحاكيه=واليوم مدري كيف شكله ولونه
ياناس خلوني أطريه وأبكيه=أنا أعرفه قدام لا تعرفونه
لا تسألون إلي بكاء هالبكاء ليه =باكر يجيكم غالي وتفقدونه
محداً يلوم إلي بكا موت غاليه=ومحداً يحس أطعون ماهي طعونه
إلي سواتي وش بيدينه يسويه=حتى البكاء إليا بكا تمنعونه
لو أخفي العبره ودمعي أخفيه=أنا ترى وضعي صعب تفهمونه
لاشك كلاً موعده عند باريه=يوم الوداع الناس بيواجهونه
وأنا قنعت بحكم ربي وراضيه=محداً على الدنيا بقى يذكرونه
عسى تمايل كفته في حسانيه=ويغفر له الله قبل لا يحاسبونه
وقولو معي أمين يارب تنجيه=أمن العذاب وحشه القبر دونه
الموت حق ودرب والكل يمشيه=يالله حسن الخاتمة والمعونه