قصيده بمناسبة فوز مطير بام رقيبه

قصيده بمناسبة فوز مطير بام رقيبه

يوم يرقـا الرقيبـه فـوق مشذوبـه
وش حصل قبل والا وش حصل تالي
كيف اقصّص مسير العز وادروبـه
اركب الموج وإلا اضرب خلا ًخالي
كـل فـج ٍعميـق المنتحـا دوبـه
ساهج ٍ صدر الارض اقفاي واقبالي
معجـزاتٍ تحقـق كلهـا اعجوبـه
صعب يخطر تخيلها علـى البالـي
يا لمجدٍ هل التاريـخ حـاروا بـه
كنه اسطـورةٍ عـن عالـم ٍ بالـي
كل ما مثلوه بوصـف عجـزوا بـه
نادر ٍ ما لشكلـه وصـف وامثالـي
اطول جبال حايـل عنـد عرقوبـه
راس عز ٍ تسامى فا السما العالـي
من رفيـع السحايـب متخـذ ثوبـه
ومن دواير زحل واحزامـه عقالـي
كل ما الشمس مالت واشرقت صوبه
فوق صدر القمر له فَـي واضلالـي
انظروا فالقمـر مثلـي ولـدوا بـه
من زمن به سوادٍ عنه مـا انجالـي
هي مسيرة فعـول مطيـر مكتوبـه
أو خيـال ٍ مـن العـزة تـورالـي
ذا من هبال عقلي يوم طـاروا بـه
مير في امطير والله ما أزين اهبالي
ترضخ الطايلـة لمطيـر مغصوبـه
لين منهـا تعلـوا كـل مـا طالـي
طوّقوا عزها الطاغي واطاحوا بـه
لين نخّت لهم فـي هـون واذلالـي
شوفها في عرين امطيـر مصلوبـه
في عراوي الكرم واحبال الافعالـي
الصخاء مذهب ٍ فيهم تواصـوا بـه
وراثين الشيم من مـاض الاجيالـي
والشهامة على الهامـات معصوبـه
والمروة وسـام صـدور الابطالـي
كم زبنهم دخيل وكـم تقصـوا بـه
وارتكوا مثل حيـدٍ شامـخ الجالـي
وكم نصاهم كليف وزالـوا اكروبـه
بدلوا لـه شـراب المـر بالحالـي
وكم وكم من نهار ٍ ما تـرادوا بـه
زينـوا فيـه فـال وخبثـوا فالـي
الفخر دارهم من ويـن حلـوا بـه
كـل عـز ٍ لهـم بحمـاه منزالـي
والسعـد مردفينـه كـل منجـوبـه
سبّـق ٍ للغنايـم تهجـل اهجـالـي
بطشهـم يـودع الاوطـان منكوبـه
تسقط حصون به واركـون تنهالـي
للعزاوي صخـب والنـار مشبوبـه
كل سرب ٍ وضوّه تشعـل اشعالـي
السمـاء قاتمـة والارض مقلـوبـه
والميادين ترجف رجـف زلزالـي
كـل نمـراً بلتهـا مطيـر مذنوبـه
من قديم الجـدود لتـال الاجيالـي
قوم ٍ اذكارهـم بالنعـم مصحوبـه
مرخصين العمار بخوض الاهوالـي
فوق قبٍ خلت مـن كـل زاروبـه
ما عليهـا سـوى حمايـة التالـي
دام خيال واحـد يـوم عـدوا بـه
ينحسب عن عـدد سبعيـن خيالـي
ذا فخر .. والفخر فالعفـو والتوبـة
عقب عصر الفعول الداميـة زالـي
والفخر عزوتي يوم الفخر جوا بـه
والفخر مـع هـل العـادات ميالـي
جيت يا مطير فرْح بما فرحتوا بـه
يوم سقنا الجزال وجـات بجزالـي
الف مبروك يوم الفوز حظيـوا بـه
من مخالب اذياب ٍ تهـذل اهذالـي
ضربـة معلـم بالضبـط محسوبـه
محترف فنها فـي كـل الاحوالـي
التنافس شريـف ولا أحـدٍ يشوبـه
والمـوازيـن مثـقـال بمثقـالـي
والفناجيل من قبل امـس مشروبـه
كد شربهـا نـدا فنجـال فنجالـي
قال أنـا فالسنـام ونـال مطلوبـه
ما يخيبك أبـو هابـس ليـا قالـي
بيـض الله وجـه ٍ شـرّع جيوبـه
في سبيل الشموخ اصخى بالاموالـي
جا على ظن ربعه يـوم ظنـوا بـه
وارتقى بإسمهم في روس الاقذالـي
خلف شوخ ٍ مقام امطير قامـوا بـه
هامةٍ عن نباهـا المـزن ينجالـي
وردوا إخوان جوزاء كـل مهيوبـه
واظفروا بالمقـام الشامـخ العالـي
ما ظهر وصف عز الا تحلـوا بـه
كل ما غاب نجـم ٍ جالـه امحالـي
ذخر شيخ ٍ ليا جـاء للقـاء شوبـه
وانتخا بالاسامـي لابـس الشالـي
سل سيف ٍ دمـي القـوم مشروبـه
من مهاوي طعونـه جـات شلالـي
يد عـدوه مـن النامـوس مسلوبـه
مثل سلب السكينه من حشا الجالـي
تقفي القـوم مـن يمنـاه مرعوبـه
لا أعتزا صابهم خفخـاف واجفالـي
لا نطح مهـرةٍ بالخصـم مركوبـه
روحت بالعنـان وسرجهـا خالـي






الشــــــاعر محمد عامر بن نيف

الموضوع الأصلي: قصيده بمناسبة فوز مطير بام رقيبه || الكاتب: غـ الصمان ـلا || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::

تعليقاتكم البناءه هي طريقنا لتقديم خدمات افضل فلا تبخل علينا بتعليق