راعي القرن الاشقر شد قلبي وتله،،

راعي القرن الاشقر شد قلبي وتله،،

أسعد الله أوقاتكم جميعاً
بكل خير .. أيها الأحبه
ضويحي الهرشاني صاحب إحدى أشهر القصائد بجزيرة العرب
والتي جاراها أكبر الشعراء أيضاً وهم : عبدالعزيزالعبيدي والشاعر
حمدبن ناحي من أشهر شعراء قبيلة مطير الأوائل
أتمنى أن تستمتعوا بهذه القصائد الرائعه
قصيدة ضويحي الهرشاني..

راعي القرن الاشقر شد قلبي وتلـه=بيُح السد مني عقـب مانـي بكامـي
عنز ريمٍ تقود الصيـد دقـه وجلـه=عذبت ناقل البندق سريـع الولامـي
ياوجودي عليها وجد من فاطـرٍ لـه=غرها النوم عنها في فروع المظامي
فوقها قربته وحذاه مع مزهـب ٍ لـه=واختفت جرة الفاطر غطاها العسامي
خابر المـا بعيـدٍ والدحـل مايدلـه=وما حواليه من يعطيه حمض العلامي
صاحبي وان هرج له هرجةٍ مانملـه=كود امل اللبن من در هدف السنامي
لـه زمانيـن حبـه ماتعـدى محلـه=كود برق الصبيحيه تعـدى سنامـي
ليتني شذرة ازمامٍ علـى مبسـمٍ لـه=فوق بيض تلاعج مثل برق الظلامـي
ليتني ربطة ازرارٍ علـى لبـةٍ لـه=فوق فرع النهود وحدر طرق اللثامي
كن في عينه اليمنى عساكـر وسلـه=عسكر الروم حمران الوجيه الطغامي
ان قتلني عشيري بالهوى فـدوةٍ لـه=ذبح خلي حلال وذبح غيره حرامـي

ثم جاراه العبيدي بقصيدته اللتي يقول فيها

تل قلبي من اقصى ظامر الروح تلـه=نشت الحال من عقبه طواها الهيامـي
قلبي اللي تذكر بالهوى صاحـبٍ لـه=بو قرونٍ ذوايبهـا تعـدى الحزامـي
كن قلبي على المـلا عشيـري يملـه=لاطرالي عشيري ماهتنـي بالمنامـي
بو عيون هدبهـا فـوق خـده مظلـه=مجهماتٍ يشادن ريش ربـد النعامـي
خدهـا كنـه البـراق فـي مستهلـه=مزنةٍ من حقوق السحب فيها قتامـي
عين ياللي على شوف الحبيُب مغلـه=ياوجودي على راع النهود الزوامـي
ناب الارداف صاف لي وانا صافيٍ له=كامل الزين ماوقف بـدرب الملامـي
شبه خلي خشيفٍ والحجر مدهلٍ لـه=خشف ريمٍ رتع بقفور خـد وسامـي
ليت من شافني مع لابتي طارشن ٍلـه=طارشينن لداره مع ربـوع حشامـي
كيف انا فالبحر والترف نجـدٍ محلـه=حيل بيني وبينه وارمسـن العلامـي
كيف اطرش لترف الروح خط وسجله=ودي بشوف زوله وله ارد السلامـي
شوف خلي طماشة صاحبـي مانملـه=كل من حب خلـه ظنتـي مايلامـي
ماحلا ياعرب عقب البطا مبسـمٍ لـه=من ثمانٍ يشـادن قحويـان العدامـي
شربين من ثمان الزين نشحه وأعلـه=كود ابرد ظميري عقب ماني بظامـي
ول يالايم المفتون فـي حـب خلـه=جعل يذكر مريض طايحن كل عامـي
اوغريقٍ بغبه هالـك عـن هـلٍ لـه=طابعٍ محمله بالريح والمـوج طامـي

ثم رد عليهم حمد بن ناحي البديري بقوله

هيضتني هنـوف واثـرت فـي خلـه=عقب شفت المبيسم طار عنه اللثامـي
بوجديـل علـى متنـه طويلـن يهلـه=ريحة المسك والريحان دايـم دوامـي
شـد قلبـي بشنكـارٍ حديـدٍ وتـلـه=ليـن قطـع معاليقـه ظبـي العدامـي
يوم تله جـداي اصيـح واقـول خلـه=قال ابقطعك من قلبك وازيدك هيامـي
تلنـي تلتيـن ووحـدتـن مستجـلـه=وانشـده مايعلمنـي بوضـع الكلامـي
قلت انا وش علامك قـال خلـه لعلـه=ذاك سلمي وسلم مرودعات الوشامـي
من خبر خل يالاجـواد يلعـب بخلـه=ناهبٍ قلـب خلـه وآخـذه بالتمامـي
ياحسين الشخص حالي علامك تسلـه=ليـن خليتنـي ماعـاد اديـم المقامـي
ياعيون اشقر وقـع علـى ماكـرٍ لـه=مستطلٍ على صيـد الخـلا ماينامـي
لعنبو داعج العينيـن مـن سامـحٍ لـه=كيف يلعب بقلبـي ماحسـب للكمامـي
ليتني في حشاه ليا رقـد فـي محلـه=ثم اقلب نهودٍ مثـل بيـض الحمامـي
ثم اوطي غطاه اللي على الوجه كلـه=واتفرج علـى خـد يبـوج الظلامـي
واتفرج على خـده وهـو جايـزٍ لـه=مستنيسن على لعبي حسيـن الكلامـي
صاحبي عايزٍ فالنـاس عمـره ودلـه=عايز الوصف واسمه من خيار الاسامي
ياوجودي عليها وجد من هجمتـن لـه=اقتفاهـا عقيـدٍ ظــاريٍ باللغـامـي
فوق حمراً تكف الخيل حمراً غذاً لـه=مغتذيها علـى يمنـاه ولـد الحرامـي

وسلامتكم

[/quote]

الموضوع الأصلي: راعي القرن الاشقر شد قلبي وتله،، || الكاتب: بندر الجنيدي || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::

تعليقاتكم البناءه هي طريقنا لتقديم خدمات افضل فلا تبخل علينا بتعليق

الجنيدي بندر ~||

ذائقه راقيه
لاهنت



..

بندر الجنيدي

أختيار موفق

والقصيده الاولى دايمن نشيلها فرينسي بالعروس ^_^
وقصيده معروفه وجميله

لاهنت يالجنيدي على النقل

لاهنت يابندر ..

رجعتنا بالذاكره ورا <- شفيها العجوز ..

قصيده الهرشاني حلوه واذكر كان فيه لها شيله حلوه ..

صح ذوقك ولاتعدمنا هالاختيارات الطيبه ..


آخت القمر

اختيار رائع