21-08-2010, 04:15 PM
|
|
|
|
|
|
::عضو فضي::
|
|
|
|
|
|
|
لوني المفضل
Cadetblue
|
|
رقم العضوية : 4421 |
|
تاريخ التسجيل : Apr 2010 |
|
فترة الأقامة : 5855 يوم |
|
أخر زيارة : 22-11-2012 (11:20 PM) |
|
المشاركات :
797 [
+
]
|
|
التقييم :
10 |
معدل التقييم :
 |
|
بيانات اضافيه [
+
] |
|
|
|
متى على الله يظهر سهيل ويبين ...( قصيدة )..... أبو شعلان ..
السلام عليكم ورحمت الله وبركاته
حبيت انزلكم القصيدة$في الربطات الطير
وانشالله تعجبكم
متـى علـى الله يظهر سـهيل ويبين * والــوقت بــرّد وإجـمدّن اللــيالي
وأهـل الولـع بـطيورهم مــستعّدين * والكــل جــهّز مــوتره بــالكمالي
سبعــة شـهورٍ بــالتمــام مــتحّرين * شفقه لنقل الطير لــو هــو قــبالي
وإلى أقفت الربّطه وتمّت الموسين * والـطير شفقٍ للعلــف مــا يـزالي
قم ياخلف وأظهر حــرارٍ مــزايين * الكــل فعلــه بــالحبــاري هــبالي
مـن بينهن غــشامٍ وطلعــه الــزين * اللــي بــطلعـه مــالغيره مــجالي
ومـن بينهن وراّد رفــّة جــناحــين * اللــي جناحه مثل قوس الــهلالي
ومن بينهن وكري بكر مالي العين * هــديةٍ مــن واحــدٍ مــن خـــوالي
وأركو عليهن بــالدّعو يـــالميامين * نبـغي الوناسه باوّل الوقت وتـالي
ويــرتاح بــالـي لاســرينـا مــقفّين * شـرقٍ نوينـا وإن بـغينـا شـــمالي
بارضٍ نبتها عرفج ورمث لــونين * وفيها خطايط عشب مثل الزوالي
وخصٍ ليا صرنا عن البّر مــبطين * تلقــى الحماسه والربع بـإنشغالي
ربعٍ علــى الشدّات دايـــم ولـــيفين * ومــن بينهــم لامـــايهّم الـــرّيالي
وجينا المراح اللي له الربع شـفقين * بأرضٍ دكاك من المشاجير خالي
سقاه ربّي من المطر قــبل يــومين * سقاه من غــرّ الــمزون الـــثقالي
وشّبيت لي ضوٍ من أرطاه غمرين * وبجالها الفنجال هـو راس مــالي
من دلّةٍ صفراء بـها بهار نـــوعين * هيــلٍ ومسمــارٍ ومــاهــن زلالي
وكلن نقل طيــره وحــّنا مــتقهوين * وسوالــفٍ وش قـال وفــلان قالي
وقتٍ قصير وكــامل الربع نــيمين * وكـلن زبن طيره يخاف الــثعالي
وحين أذّن الفجر وخلصنا مصلين * كلن لقط روحــه يحوف الــدلالي
وقبل طلوع الشمس بالجيب ماشين * في وسط شغيه ماوطاها الحلالي
وإستقطعت جرّه جديده وهـــالحين * وأنــا ألـقط الريشه وأنادِ الــعيالي
قلت أبشروا عندي جراير لـثــنتين * خـربٍ وتـبراه الـدجاجه عـــدالي
وأنا أرتفع خوفي يطيرن عن يمين * والطير طلعه مـايبي لــه ســؤالي
قلت أســرعوا يمّي وقـــالوا قريبين * قلـت إلتفت شـفني يمينك مــوالي
ويـزين وجه الــطير وهــّم مــتقّفين * ويوم بغى الطلعه أرخيت الحبالي
قلت الركـــاده لاتصيروا ســريعين * الــطير وجـّه يــمّكـم يــالــرّجالي
وعثربهن بالجيب (خمسه وسبعين) * ويــطيـرن الــثنتين عــّنا شــمالي
والطير أشوفه عنّهن حول مــترين * يــكرب جــناحه بـالهدد بإشتعالي
والخرب ردّه فــوق يمكـن مــردّين * وعــنه الدجاجه نوّخت بــالمفالي
وثالـث مردّ للــخرب عنّه بــشبرين * والـرابعه صكّه وجــاك إمــتدالي
ويطيح مـثل الشــال بـين الــبعارين * وحوّل عليه الـطير ياوجد حــالي
وحاولت أخلّص مير ماعاد يــمدين * قــدّله زمــن ميّت ومـابه جــدالي
وأنــسّره نـسرٍ خــفيفٍ وعــــجلين * ومــن الـرباشه مــالقيت الــنّعالي
ثــم إنــحرفنا للــدجاجــه ســلاطين * والكــل طيره فــرّعه بــإحـتمالي
وعنّي يمين الجكّس سبعه وتــسعين * يــقـول طــيري غــّزته للـــتلالي
قلت أرخله سبقّه عسى الرازق يعين * وفـعلن طلـع غشـّـام إرتاح بــالي
وإبفزّته وشهــي فــروخ الــشياهين * وحين إنطلق مثل السهم مـايبالي
وجّه علــى الــيمّه وحــنـّـا بــعيدين * وسقنا المواتر في وعور وسهالي
مـرّه أشــوفــه ومـرّةٍ يــالله إيــبـيـن * أليــن شـــفناهـن وجّـوه صــفالي
وكتف عليهــا الــطير نشّه مــنشين * وصــادها بــالقاع زيــن الــفعالي
ثــم إجــتمعنا كــل أبــونـا ســعيدين * وكلن ذكر إسـم الله بصوت عالي
لا شك هذي منوتي إن كنت توحين * وفصّلت كـل اللـي يـدور بـخيالي
وأطلب من الله يالرّبع قـولوا آمــين * يـحـقـق هوى منهو تـولّع بــغالي
وصلاة ربّي عـّد حــرفٍ وحــرفين * على الشفيع اللـي بيوم الـــهوالي
|
|
|
تعليقاتكم البناءه هي طريقنا لتقديم خدمات افضل فلا تبخل علينا بتعليق |
|
|
آخر تعديل طهران يوم
21-08-2010 في 04:19 PM.
|
العرض الشجري