ديوان الشاعر الكبير // صحن ابن اقويعان الجبلي

ديوان الشاعر الكبير // صحن ابن اقويعان الجبلي

بسم الله الرحمن الرحيم

(تعبير عما يحوي الضمير)

هو الشاعر صحن بن قويعان بن عواد الجبلي المطيري

ولد سنة(1348) وينحدر من فخذ المقالده أحد فروع الجبلان من مطير

من صفاته شديد التواضع وصاحب رأي سديد ..

له علاقات كثيره مع الشعراء وبالأخص مع الشاعر الكبير محمد الخس فهم كانا ولايزالا روحين

في جسد ولهم رديات عديده تدل على مدى صداقتهم ومعزتهم منها..





أخذنا خمسين حجـه ماهـي ادون
يبدي هوا نفسي وشفي على هـواه
وأنا ماتهنا في منامي وهو مشحون
تفرحني أفراحه واشاكيه في شكواه



وكذلك قال الشاعر الكبير محمد الخس يذكر مدى هذه العلاقه الأخويه..




ياصحن لو يذكر دواك بالصيني
كان جبته لو يقولون بأقصاهـا
حيثك أغلا من عيـونٍ تقدينـي
ورفقتك يابو قويعان ماأنساهـا



وبعد هذه النبذه عن حياة شاعرنا نبدأ بكتابة الديوان الأول له (تعبير عما يحوي الضمير)


(قصيده بالأمير بندر بن ماجد الدويش)

عندما زار شاعرنا الأمير بندر ابن ماجد الدويش فسأله الأمير عن أحوال جماعته فقال كل شي على مايرام ولا ينقصهم سوى الكهرباء فقام الأمير وارسل مكينتين كهرباء لصحن وجماعته




ياشعاق نورنا بيـوت الجماعـه
من جود من جدنا بفضله وجوده
قامت تشب أنوارها كل ساعـه
ومراوحٍ بالحر تعطـي بـروده
ماسقت فيها من حلالي بضاعه
من مال بندر لاعدمنـا وجـوده
هو الأمير اللي جنابه طماعـه
علي معروفه تعـدى احـدوده
هداج تيما بالكـرم والشجاعـه
ابا امدحه لو كان يزعل حسوده
امدح طويل الباع سبع السباعـه
قهار حسرات العدا في كبـوده
اقطع من المصقول عند اندفاعه
واحلى من الغند المصفى ركوده
من رام شمخات العلا وارتفاعه
يفعل مثل بندر وتظهر شهـوده
لا صار ماطيب الولد من ذراعه
لايفتخر في ورثته من جـدوده
الورث بالبل والنخل والزراعه
والطيب كلٍ قدحته من زنـوده
ماحدٍ يخل الطيب لأبنه وداعـه
لاصار باعه قاصرٍ عن عـدوده
خله يقوم بقدرتـه واستطاعـه
ماله ومال المرقب اللي يكـوده
بدرٍ كسفبـه مايسفـر شعاعـه
والحنظله ماغير السيـل عـوده
عسى البقا بأهل الندى والبتاعه
اللي لهم في عسر الأيام نـوده
نطاحة الكايد ليا مـال صاعـه
لاولعت شهب السنيـن بوقـوده
يلقون بأيـام السنيـن المجاعـه
العفن مايندى ولا حـدٍ يـروده
ماحدٍ يبي قربه ولا شوف قاعه
من جاء محله نوبـةٍ مايعـوده
قلته جزاء معروف ماهو خداعه
الطيب من بندر وهـذي ردوده







(قصيدة مدح في الأمير بندر بن ماجد الدويش)




ياالله عسى من طالنا منه معروف
يطول عمره في حيـاة السعـاده
وردانا في كنة القيـض هفهـوف
بمكيفـاتٍ نلتحـف عـن بـراده
الناس يلهبها الظما بوسط الجوف
وحنا أسود الما مالنـا فيـه راده
وأنوارنا يجذب سناها عن الشوف
من شافها وقـع لقولـي شهـاده
من مال من يعطي قويين وضعوف
مسيارهم من كـل ديـره مـراده
ليا ضاق ديوانه مسايير وضيـوف
هذا طرب قلبـه وهـذي عيـاده
مل المقهوي بين مقعاد ووقـوف
فـي متبعـاةٍ مابـيـذر قـنـاده
خلافهن كبش ليا جيـب منسـوف
على فقاره مثـل قطـن الوسـاده
بندر ليا زادوا هل البنك بولـوف
يزود مـن غالـي حلالـه نفـاده
لولا هروج مكذبة كـل مشيـوف
ابديت مـا كنيـت عنـدي زيـاده
ببن الذي يمن ذراهم عن الخـوف
ليا جاهم المطلوب هم راس مـاده
دوشان مقطع حقهم ببـو حنـوف
عنهم سيوف الهند تعطي الأفـاده
يشهدلهم بفعالهم شلـف وسيـوف
وقبٍ لهم في ماقف الضيق عـاده
عاداتهم دقمت شبا كـل منحـوف
من شيـخ قـومٍ مايسنـد جـواده
اجيب عن تاريخهم رمز وحروف
والهرج يكفي عن كثيـره وكـاده







(قصيدة مدح بالأمير بندر بن عبدالعزيز بن ماجد الدويش)





ياالله يالمطلـوب تقبـل سؤالـي
ياكافيٍ ماغيـرك أحـدٍ يكافـي
سلم لنا راع العطايـا الجزالـي
اللي لنا ليا غثرب الوقت صافي
ليا اونست من شد الليالي ميالـي
خـلا ثقايلهـا عليـه خفـافـي
دايـم يعدينـي حمـولٍ ثقالـي
لا لحقت الغارب حذفها خلافـي
ليا جيت ناجاني عن اسرار حالي
برفـا فتـوقٍ مايرافيـه رافـي
علي من معروفـه أول وتالـي
شيٍ يجي خافي وشـيٍ يشافـي
جاب المكاين يـم بيتـي تشالـي
اللي لهن فضلٍ على الربع ضافي
والجمس جاني ماشريته بمالـي
شوفوه قدم البيت ماهـو بخافـي
جاني عطا من واحـدٍ مايبالـي
جزل العطا اللي بالمواعيد يافـي
ليا جود المفتول حـزم الريالـي
مصروف بندر تغتنيبه اضعافـي
ماينكس المحتاج مخبـاه خالـي
ولهو على المد الزهيد متشافـي
وليا شلهب الوقت والزاد غالـي
بيته لدسمين الشـوارب ملافـي
يلقون حيلٍ فوقها السمن سالـي
في بيت ابوعبدالعزيز السنافـي
بيتٍ على من يلتجيبـه ظلالـي
جعله عمـارٍ مايجيـه اختلافـي
ذرى لنا من ماضيـات الليالـي
من شاف ناره وامنس مايخافـي
افعل جميل ويشهدون الرجالـي
واللي يكذب طيب غيره عوافـي
الدرب ممدي والليالـي طوالـي
والطيـب بيـن مايلفـه لفافـي
ومدحي لبنـدر مايبيلـه جدالـي
الصدق ماينفـاه بالكـذب نافـي
تمت وصلوا عد ذاري الرمالـي
على رسولٍ كمل الحـق وافـي






(قصيدة مدح بالأمير هزاع ابن عبدالعزيز بن ماجد الدويش)





عزالله اني ناون الصبـح مطـلاع
وابا اجحد اللي مونسه في عظامي
ابطيت ماعايـدت بنـدر وهـزاع
فرضاً عليه مثل فرض الصيامـي
لـوٍ بنـدر جابـرٍ دونـه القـاع
اجيي محلـه حشمـةٍ واحترامـي
عسى البقا بااللي بقا وافـي البـاع
اللي وقف عقبه وشـد الحزامـي
اللي هقينـا ببـو نـواف ماضـاع
قـام بلوازمنـا عزيـز المقامـي
حلو النبا جزل العطا زين الأطباع
ابذكر اللـي فيـه مانـي بكامـي
ليا جنب المخطي عن الدرب جزاع
اللي يحـس بخاطـره مايسامـي
من هيبتـه مايقربـه كـل خـداع
ومن جا بضفـه وامنـاً مايخافـي
وان جاه راع الحق ماهـو طمـاع
يعطيـه حقـه كامـلٍ بالتمـامـي
العـام بيـن كـل ناقـص وبتـاع
بان الكريم وبان بخـل الخمامـي
شفناه غير اللي سمعنـا بالأسمـاع
شرطان شعـاره تبـث العلامـي
أحدٍ لربعه مد كفـه وامـا طـاع
وأحدٍ غشا وجهه سـواد وملامـي
راع الردا يحسب كثير العطا ضاع
والله عويـنٍ لليديـن الكـرامـي
ينفق على المنفق عن المد بالصـاع
اللي كفـل رزق البشـر ماينامـي
والبخل مايفـوز بـه كـل جمـاع
لو يجمعه كثـر الجـراد التهامـي
في حاجة المحتـاج ماهـو بنفـاع
ومالٍ يقصر في حقوقـه حرامـي






(قصيدة مدح بالأمير ماجد بن محمد بن بدر الدويش)





هات القلم واكتب كلامي وانا امليه
ابيات شعرٍ تعجب اللـي قراهـا
مثايلٍ مـن شايـبٍ فـي بناخيـه
ماقلتهـا فيـه اتحـرا جـزاهـا
والله ماقلتـه ولـي مقصـدٍ فيـه
لا حاجةٍ عندي ولا فـي رجاهـا
لا شك يعجبني ليا اوحيت طاريه
حرٍ صعيبـات المراقـي رقاهـا
يفعل فعولٍ تتعب اللـي يماريـه
ماهي هينـةٍ علـى مـن بغاهـا
ابا امدحه والمدح قـده وزاهيـه
ماهي سوالـف واحـدٍ ماقداهـا
ماقول قـولٍ ليـن ابيـن معانيـه
ماضيـع الكلمـه بغيـر معناهـا
امدح بها مزعل خصيمه ومرضيه
اللي ليا مالـت رفـع مستواهـا
يزعله ليا منـه اخطـا مماشيـه
ويرضيه ليا جت من بعيد التقاهـا
يشره اللـي يفهمـون المشاريـه
ويسنـع اللـي ماتسنـع خطاهـا
ماجد حكيم الراي دامـت لياليـه
ليا شقهـا غيـره برايـه رفاهـا
مفراص مـاصٍ ماتعقـد مثانيـه
ماتوخذ القاله وهو مـن وراهـا
حيدٍ يذري من قعد فـي مذاريـه
عقب الفهود اللي يـذري ذراهـا
ماغواه تيار الجهل فـي مباديـه
مشى الدروب اللي محمد بغاهـا
رسم حدود الدار واسـس مبانيـه
وسكانها ارضاها وطـور ابناهـا
وختم الكلام الله على الحق يهديـه
ويكفيه شر اشرارهـا واحسداهـا







(قصيدة مدح في الأمير مهاوش بن مشل الدويش)





الله يجـزاك يامهـاوش بالأحسـانـي
ويذكـرك بالخيـر ياريـف الفـداويـه
جيتـه وانـا مامعـي للحـق برهانـي
مثل العمى ماعرف وش تقضـب يديـه
وشتال عنـي ثقيـل الحمـل واعفانـي
وادركت شيٍ من اسبابـه ماهـو ليـه
أخذ شهـر كـل يـوم موتـره عانـي
ماحسب النقـص والروحـات والجيـه
وان صرت حاضر معه وان غبت كفاني
لين انقضى لازمـي وانهـى مقاضيـه
لولا كذا مافـرق واحـد عـن الثانـي
اللي يبا الطيـب مايبخـل علـى شيـه
قولـة نعـم ماتهيـا كــود بأثمـانـي
برخاصة العمـر ولا أرخـاص ماليـه
وايدامها قومةٍ فـي خمـس الأركانـي
عليـك الأجهـاد بالأخـلاص والنيـه
من غـر منهـا بليـا شـك خسرانـي
مـالٍ وراه الفنـا والعـمـر عـاريـه
لابـد مـن ساعـةٍ يطـوى بالأكفانـي
من خزنة البنـك مايدفـن معـه ميـه









(قصيدة مدح بالأمير بدر بن هايف الفغم)




أنـا ليـا منـي بغيـت الأنـاسـه
سيرت يم اللي دعاني مـن الـراس
الله يعـدي سـو الأيـام راســه
مدام له في ساحة العـز مـرواس
بدر ولـد هايـف خبيـر السياسـه
عوق الخصيم اللي براسه تعنطـاس
كسار باس اللـي بنفسـه حماسـه
وحلالها لاصـار بالحبـل لـولاس
ماقدمـه راس القلـم والـدراسـه
من راس هايف محتمي قب الأفراس
لا لبسـوا الفرسـان درعٍ وطاسـه
ملبوسه الجوخه على ثوب قرطاس
فكر مثـل تركـي برايـه وداسـه
لينه على بيض الصحاري بنى ساس
ساس على الميزان يوخـذ قياسـه
لين اجتمعبه كل جنسٍ مـن النـاس
هـش بشـوشٍ مابنفسـه شراسـه
يابعد فرقـه عـن ثقيـل الأنفـاس
ليا جاهم العساس عـاف العساسـه
مثـل المحـل مراعـيـه يـبـاس
ماينسمـح بالـي ويغـدي عماسـه
ألا مع اللي فيـه شيمـه ونومـاس
وان شفت في خطو الرفيق انعكاسه
صديت عنه وقلتلـه ماتـرى بـاس
ماهين نفسـي فـي دورة الحاسـه
ولاني على فرش المهونه بجـلاس
الـرزق لامنـي بغيـت التماسـه
طلبـت ربٍ منـه مانقطـع اليـاس
ماطلب عطاء ناسٍ هدفها الرياسـه
ناسٍ على الحـروه تلمـس تلمـاس
أخبث من الهربيد وخدود فاسـه(2)
اللي على ريح المرق يطبخ الفـاس



(2)الهربيد: رجل من شمر يطبخ الفاس لولده





(قصيده في حسين بن عادي الله يرحمه)


هذه القصيده قالها شاعرنا وذلك بعدما جائته جارته تشتكي له وتطلب منه ان يساعدها بأطلاق سراح ولدها وذلك بعدما القوا القبض عليه في تهمه وهو بريء منها فقال هذه القصيده يطلب فيها من امير الحفر سابقاً (حسين بن عادي )ان يساعده في اطلاق سراح جاره





يابـو علـي نكبـات الأيـام مـره
تصير مع طول الدهر والشهـوري
جتني عجوزٍ جيـب ثوبـه تقـره
عليه مـن ميـلات بقعـا دبـوري
الشرطي أقفـا فـي ولـده يجـره
وجتني تصيح ودمع عينـه يفـوري
الله بـلاهـا وابتلتـنـي بـشـره
وعاداتـنـا بدخيلـنـا مانـبـوري
ابا ابدي المجهـود باللـي يسـره
وأنا بلا فزعتـك تـدري بأمـوري
مالـي مـن المقـدور مثقـال ذره
أمـا هـداك الله بحملـي تثـوري
العلم يصـدر منـك وأنتـه مقـره
وان ماقضيت الشان منته معـذوري
يوم اني احـرج موقفـك واتشـره
بلاي هرجة قاصريـن الشبـوري
أخاف مـن قولـة رفيـق وغـره
ناسٍ على عوج السوالف تـدوري
والله لو أذكـر فيـه علـمٍ يضـره
لا قول خل الحوت بقصى البحوري
جعله مهف امقيط من راس حـره
يوم انطلق برشاه هـوي الطيـوري



وبعد القصيده أخرج حسين بن عادي السجين واطلق سراحه ورجع شاعرنا وجاره الى هجرة الحيراء وهم يهوبلون بغمارة الجمس:12:







(قصيدة مدح في الجبلان)




عديـت راس ابـرقٍ مـن بيـن عرقينـي
في حد حير العصل مـن ماقـف ابوابـي
وقمـت اتذكـر ابراسـه وانشـد العينـي
يوم انعمس خاطـري فـي راس مرقابـي
ياعيـن ويـن الربـوع اللـي توديـنـي
ماشوفهـم لـو رقيـت مـع املـطٍ نابـي
ياحيـف يالابـتـي سـقـم المعاديـنـي
متيهـت بالوسامـي جــرد الأرقـابـي
نزالـت القفـر مـن بـيـن الحفيفيـنـي
يـوم العـرب تسطفـق والقفـر ينهابـي
والنـاس ماهفيلهـم حــظ ٍ وموازيـنـي
ميـر ان ربعـي بهـم شـارتٍ اتعـابـي
قهـارت الـورد عـن وجـه المحيلينـي
الأجنبـي لاعرفهـم عــاف الأقـرابـي
والضيـف لاضافـهـم بــادوه باليـنـي
لادش بأرباعهـم عـن الـكـدر غـابـي
مـن دارهـم بالمـوده واجـه الزيـنـي
ومن دارهم بالقشـر جولـه نسـم دابـي
احلـى مـن الغنـد لاصبـوه بالصيـنـي
وامـر مـن حنظـل الكنـه اليـا شابـي
ربعـي اطـوال الخطـا ماهـم خفيـنـي
هوماتـهـم مايهـومـه كــل كسـابـي
جبـلان يدعابهـم لـو هــم بعيديـنـي
كـم جمبتـن صبحوهـا دونهـا اجنابـي
هذا قضا مامضـا جـاء دورهـم شينـي
كـلٍ بنالـه عشيـش وحطـلـه بـابـي
اميـرهـم عشـتـه بـيـن القليبـيـنـي
تشدي اشـراع الجنـب بأمـراح عزابـي
يـاالله عسـاهـم ابمنزلـهـم عزيزيـنـي
مـن حبلـه منـزلٍ فـي خاطـره طابـي
وانـا مـدام انـي القـا مـن يباريـنـي
ابنـزل البـر الأصـبـح والله اولابــي
اليا نـاض بـرقٍ علـى خـدٍ يشهوينـي
قلـت اطـون البيـت وزونـه بالطنابـي
ودنيـت مـن وارد الفـرتـات ستيـنـي
من كسب اخويه ماهو من سوق الأذنابي(1)
ماعاش جـدي علـى المسحـاه والطينـي
اليـا نـوى الله بـرزقٍ جالـه اسبـابـي
رزقـي علـى اللـي خلقنـي مايخلينـي
معطـي العطايـا بليـا مـنّ واحسـابـي
والخاتمـه يـاالله انـك تنصـر الديـنـي
واتمن احدود العـرب مـن كـل طلابـي



(1)اخوه هو نضاد بن قويعان الله يرحمه






(قصيده في الماضي)




يازين شب النار وسـط المسيلـي
قدام كسر البيت ينهـض عمـوده
في وسـط جـوٍ واسـعٍ للنزيلـي
فروحٍ مرضـه عليـك محـدوده
عشبه من الوسم المبكـر جليلـي
وعليه من تالي العقـارب بـروده
تفرقوبـه مبعـديـن الرحيـلـي
كلٍ يبـا زيـن المضحـى لـذوده
الفقـع يجنونـه بوسـط الشليلـي
من جود من عم المخاليـق جـوده
أناستٍ لـو مـا مداهـا طويلـي
العـود يابـس والليالـي معـدوده
أخير مـن قصـرٍ دفـيٍ ظليلـي
راعيه روحه يـم جـاره تكـوده
يقـوم مرضـانٍ وفتـران حيلـي
من كثر ماياكـل وكثـرة ركـوده
ومجالسٍ من بيـن قايـل وقيلـي
ناسٍ تجيب الهـرج وتاخـذ ردوده
كثر الحسد مـن بينهـم والنقيلـي
العلم لو هو كذب تظهـر شهـوده
تصور الكذبـه مـن المستحيلـي
منهم كبـود الصابريـن مغـدوده
دنيـا تقلـب بيـن عـدلٍ وميلـي
تضحك حدٍ وأحـدٍ تبيـح سـدوده
الذيب فيهـا مـن ثعلهـا ذلبلـي
والداب ياقفله علـى الـدرب دوده
واللي يعـد النـور فيهـا قليلـي
تبلش ليا ناظـرت نقصـه وزوده
شفنا من أقوال المصـدق دليلـي
زودٍ من الناقص تعـدى احـدوده
المال يكثـر فـي يديـن البخيلـي
وأقوال تـرك الصـلاه محمـوده
ينخاف فيهـا بيـن صبـحٍ وليلـي
الله على السلام يضفـي ركـوده
ويعـز حكـامٍ تشيـل الثقيـلـي
من دون العرب والدين تبذل جهوده








(قصيده في الماضي)




ياهل الونيت اللي تبون المظاهير
ان كانكم عجليـن مـروا عليـه
ياحبنـي لمدوريـن المشاويـر
خصٍ به اللي يركبون معفيه(3)
خلوه يسرح يالوجيـه المسافيـر
يمة مغيب سهيل وأيمـن شويـه
جمسٍ يثور بالدبـادب معاصيـر
ويله يشق القاع لو هـي قويـه
يبعد هموم مقزر الليـل تقزيـز
أسهر وأنا ما وأنس بعمري شكيه
لو أن ماجاني من الدار تقصيـر
قلبي يحب البـر وأغلـي نديـه
أهل بيـوتٍ يتعبـون المداويـر
يضويلهم مع كـل فـجٍ رعيـه
يازين لجتهم ليـا غـرد الطيـر
كلٍ يبا المغبـاش يسبـق خويـه
مضمين والبارح اغشان وشخاتير
وهجوٍ على نقع الصفا والحجيه
ياكثر أناستهم ليا جـم مصاديـر
كـلٍ روى ذوده وملـى رويـه
وصكم ابيـتٍ مدهـلٍ للمساييـر
يصبح عليه الصبح والنار حيـه
عسى مراويح السحاب المباكيـر
تزي وطنهم كل صبـح وعشيـه
لين ايتساوا قشعهـا والنواويـر
وتصير مثـل سنينهـا الأوليـه
ماوسطها كود أشقح الريم ومطير
ماطبها الشـاوي مربـي طليـه
يرعونها بمـراوزات المقاهيـر
وحدودها من كل صوب محميـه
من دونها جماعة الشر والخيـر
على جميع الناس عسـرٍ مجيـه
واليوم فيها مثل وردٍ على بيـر
تلقابها مـن كـل سبـع اللغيـه
أقولها عن ضيقة الصدر تعبيـر
ولا الدهر مادبرتـه فـي يديـه
العبـد ماعنـده لدنيـاه تدبـيـر
ماعنـده ألا مايـدبـر ولـيـه



(معفيه): دبايه في الدبدبه




(قصيده في الصمان)




ظهرت ابا اخذ لي مع البر جولـه
قصدي وناسة خاطري وانشراحـي
ابرقب اللـي باقـيٍ مـن تلولـه
وامد شوفي مع وسيـع البراحـي
ولقيـت بـرٍ مابقـا الا سمـولـه
قشعه وسدره عقب الأمحال ماحي
بـرٍ نحبـه لـو تقافـت محولـه
اروحله لو مـا يونـس مراحـي
ممشاً مع الصمـان همـي يزولـه
ديرة مطيـر مخضبيـن الرماحـي
امشي وادوج في منـازل انزولـه
عليـه بانيتـن ذواري الريـاحـي
ماكنهم داجو هكـا النـاس حولـه
ولا وحيت فيه مودهـن لطياحـي
ياما جزم مـن خايـعٍ ورجعولـه
قفرٍ أدعوبـه ماظربهـا المتاحـي
عشبه يساقيـه المطـر واطلولـه
فيه الظبى واجوال برقـا جناحـي
من أولٍ محـدٍ يـذوق محصولـه
واليوم كلٍ حـل بـه واستراحـي
أشوفبه مـن كـل نـاسٍ حمولـه
متقاسمينه مثـل قسـم الشحاحـي
اليا ذكرت اللي مضا مـن حلولـه
الدمع من عينـي ردعتـه وفاحـي
وعينٍ تبـا هكـا السنيـن مهبولـه
ماشافت اللي قدمها ويـن راحـي
حطتهم أيـام الفنـا فـي حثولـه
ومن راح ما رده طويل الصياحـي
من يامـن الدنيـا وهـذي فعولـه
تزي الذحاحي عقب شرب القراحي
مندوبهـا يشعـب ورانـا ذلولـه
اما هجـد والا يصبـح صباحـي
ياالله يـا باعـث بحقـه رسولـه
تكتب لنا يوم الحسـاب النجاحـي
يطلبك عبدٍ عاف قصـره وطولـه
مذنب ويرجي رحمتك والمباحـي
ماله سوى رحمتـك عـذرٍ يقولـه
ليا دهدمـوه مجوديـن المساحـي







(قصيده في الماضي)




ياهل البيوت اللي على الماء محاظيب
هـذي عوايدكـم بماضـي الليالـي
لامنهـا يبسـت جلـود الدغالـيـب
كلٍ نـزل فوقـه وخـلا الحلالـي
يرعونها الرعيـان شـرقٍ وتغريـب
وليـا ورد قدمـه عـيـالٍ بـدالـي
يعطونه الماء من طويـل المجاذيـب
من عيهلٍ بين السهـل والجبالـي(4)
ثلاثـة أشهـر ثابتيـن المناسـيـب
وليا مضا الرابـع نـوو بالمشالـي
البـرد حـل وزل حـر اللواهيـب
وشافوا على المنشا طخاف الخيالـي
معـاد يبقـى للمـدور معـازيـب
كلٍ نصا خدٍ مـن الصيـف خالـي
ما دفق الشـاوي بوسطـه مغاريـب
من يوم كفـوا عنـه ماجـاه والـي
اللي يبا اللامه عوى دونـه الذيـب
يرجي مع الطرشـان رد السؤالـي
جاهم من القبلـه خيـالٍ مهاضيـب
مـلا فيـاضٍ مـا هـواه البعالـي
على جغبقـا حولـن السراديـب(5)
والعوده الدنيـا رقـت كـل جالـي
تلقالهم حول الدعيلـه مظاريـب(6)
لبيوتهـم والصلـب للبـل مفـالـي
مدهـال شقـحٍ علقوهـا الدباديـب
دايم هي اللي من توالـي الشمالـي
ترعى بفرسـانٍ تـروي المغاليـب
لفعالهـم بيـن القبـايـل مجـالـي
يرعونها الجبـلان كسابـة الطيـب
أهـل بيـوتٍ مـدهـلٍ للرجـالـي
الجار يلقا زيـن جانـب وترحيـب
والضيف يقلط فـوق حيـلٍ جزالـي
وهوماتهم تاصـل ديـار الأجانيـب
يـومٍ بالأفعـال طـامـن وعـالـي
كم جـو قـومٍ سهجـوه المكاسيـب
في مال الأقصى يسهجون الموالـي
هذا الذي في لابتـي مـن عذاريـب
وعندي علـى ذلـك أولاد الحلالـي
وصلاة ربي عالـم السـر والغيـب
على الرسول اللي مشـى بالعدالـي



4..العيهل: عد أو بئر تسمى اللصافه بين الدبدبه والصمان

5..جغبقا:مكان لتجمع الماء ويسمى خبرا

6..الدعيله:فيضة سدر









(ديرة الجبلان)





زين ممشى الجمس مع خطٍ يدله
كل ما محته على صوبٍ عطاني
عارفٍ دربه وأدل الخـد كلـه
لو محاه الريح عقبي ما خفانـي
ناصٍ اللي قربهم ماحـدٍ يملـه
مير تصريف الدهر عنهم حداني
جعل ودان المـزون المستهلـه
في وطنهم تنثر الماء الريهجاني
وكل ماجا سبعـة أيـام] تعلـه
لين يشبع طرشهم بين المبانـي
ديرة الجبـلان قلبـي مستهلـه
عن خفي القلب يخبركم لسانـي
ربعي اللي دارهم للضيف فلـه
يذبحون الحيل لا شان الزمانـي
وكل نشميٍ ليا جيـت بمحلـه
تمضي الساعات تحسبها ثواني
ضيفهم مع جارهم مدموح زلـه
كل من جاء في طرفهم مايهاني
يزعلون عيالهـم كـلٍ أرضلـه
ومجلسه ببيوتهم بأحسن مكانـي
والمحيل اللي حلاله فيه خلـه
لا ورد لعدودهم شرب اسمهاني
قولي اليا قلـت كـلٍ شاهدلـه
الدقاق بما ذكر فيهم كفانـي(7)




7..الدقاق:شاعر من شعراء قبيلة مطير قد مدح الجبلان في هذه الأبيات..




ليتني زبنت بشياهـي حمولـه
ناصن الجبلان يوم الوقت جاني
حاشمين الجار لو تزلق انعوله
جارهم يقدم على كل المعانـي







بـــــــــــــــاب الغــــــــــــــزل




(البارحه)




البارحه مـا ذاقـت النـوم عينـي
لين الثريـا وايقـت والسفـر بـان
أسهر اليـن الصبـح نـوره يبينـي
وأمسك على فنجـال بـنٍ ودخـان
مـن هـم يـومٍ خابـره مقتفينـي
تطوى البيوت ويفترق شمل الأضعان
أحدٍ يـروح ايسـار وأحـدٍ يمينـي
بدوٍ تمارى فـي منـازل وقطعـان
ياليتهم دايـم علـى المـاء قطينـي
والا يصيـرون المحبيـن جيـران
حتى ان كلٍ خاطـره مـا يشينـي
ولا حدٍ يذوق من العناء مثل ماكـان
يامـن يـودي صاحبـي كلمتينـي
مدام أنـا وحمايـة البيـت عـدوان
ماحـرزت أجيـه ولاتهيـا يجينـي
أغديه يرحمني علـى قـد الأمكـان
قلبي اليا أبعد طـار عنـه اليقينـي
يدكبـه عـن لـذة النـوم شيطـان
يجمع علـي همـوم قلبـي قرينـي
الحب بلـوى والمخاليـق قشـران
ان كان طاوع هرجـة المبغضينـي
مالي مع اللي يدهل البيت صدقـان
عندي خبر مـن غايـة الذاهبينـي
شفت الجفا من يمهم سـر وأعـلان
أونس خطاهـم واجحـده لايبينـي
من شان ملهوف الحشا خدر الأعيان
أبـو عيـونٍ تسحـر الناظريـنـي
والخد برقٍ في مراويـح الأمـزان
يسوقنـي حبـه لـمـن لايبيـنـي
لولاه مالي في هل البيت غرضـان
مالـي علـى فرقـاه قلـبٍ متينـي
واللي يعدّل مولـع القلـب غلطـان
راع الهـوى مايسمـع العاذليـنـي
عنده طريقه سمح لو فيـه ظلعـان
لادرك من المطلوب ربـع الثمينـي
ماهو على تعذيـب الأيـام ندمـان






(عجايب)




يامساييـر لاجيتـم عجـايـب
سلمولي على موضي النحريـا
سلمولي على موضي الترايب
عد وبل السحاب اليـا انتثريـا
منه جرحي ترا ماهو بطايـب
كـان جيتـوه ودوه الخبريـا
اسهر الليل وجروحي عطايب
اتصبر وانـا حـدر الخطريـا
جابه الله وأخير أسمه عقايـب
لي أنا خص من بـد البشريـا
لا حلف لي بعمره والقرايـب
ذاب قلبي لونه مـن صخريـا
ذوب القلب منسوع الذوايـب
باشقر الراس والخـد العفريـا
يامصيبه علي أكبـر مصايـب
من عشيـرٍ يحيربـه النظريـا
ان طلبناه من دونـه طلايـب
وان تركنـاه قلبـي ماصبريـا
من يخلص شرابيك النشايـب
اكثر الشـر بوجيـه القشريـا
حسبي الله على العجز الحدايب
حوفرن للغـم ليـن انفجريـا
دايم العجـز للفتنـه سبايـب
اظهرن سرنـا ليـن انتشريـا





(يامل قلبٍ)




يامـل قلـبٍ كـل ماهـف شفـه
يزوع من بين الضلوع المهاديـف
اليا جاء غروب الشمس واقبل مهفه
مرتاح لين ابدي طويل المشاريـف
اليـا ذكـرت اللـي بغيتـه بعفـه
مضيت يومي بين ممشى وتوقيـف
ارقى على روس الهضاب المشفه
واخيل نشر مشلف القلب تشليـف
راعي اشقرٍ من فوق الأمتان ضفه
شليـل شقـرٍ هزتـه بالحاريـف
والعيـن نجـلا مايغطيـه كـفـه
والعنق عنق اللي تقود المخاشيـف
حبـه لجـا بيـن قلبـي وجـفـه
كنه على جوفي يشب المراضيـف
ليته يطاوعنـي ليـا قلـت طفـه
بيديك ياراعي الثمـان المراهيـف
خف العنا في وصل الأقدام خفـه
الوصل طـبٍ للقلـوب المواليـف
قـدام تاخـذ فينـا الأيـام لـفـه
مافي يدينا من قدرهـا تصاريـف
اليـا دقـرت ماكـل حـيٍ يدفـه
ماعدلوها أهل المهـار المزاغيـف






(وين أهل زين الاوصاف)





يابو سعيد وين أهل زين الأوصـاف
علميبهـم قبـل تطيـح المشـاريـع
يومٍ كل القيظ فـي حسبتـه طـاف
راحت ظعاينهم تزاعج مـع الريـع
من جال عدٍ يدهله خمسـة أسـلاف
حامين حـده بالسيـوف القواطيـع
ترعى الخطر في ظفهم حم الأشعاف
وجنوبهـا معترضتـن للطمامـيـع
يغذالها مـن درهـا كـل مزغـاف
حتـى تباشرهـا بسـرع المفازيـع
ليا صاح صياحٍ على راس مشراف
ركبم عليهـن مهمليـن المصاريـع
فيما مضى يشهدلهـم كـل عـراف
واليوم أمـان وتاركيـن المطاميـع
تفرقوا يرعـون ريمـه بالاريـاف
وأنا قضى صبري ولا لـي مدافيـع
يسقى ليا نشف ثـرى كـل هتـاف
ويبست حبوب العشب عقب المرابيع
اظن يجمعهم على العـد مصيـاف
يجيبهـم حـره لمـا هـم مرابيـع
واشوف من فتخ ايديني بالأحـلاف
اللي مضيعني عـن النـاس تظييـع
أغليه لو أنـه مسومبـي اسـراف
وليا عذلني عاذلـي قلـت ماطيـع
ياعاذل العشاق منته مـع انصـاف
ماذقت مـن لـذات حبـه قراطيـع
ليتك تشوف اللي نوانـي بلاتـلاف
اللـي جـرح قلبـي بليـا منافيـع
تشوف شقراً شرعاً فـوق الأرداف
وسودٍ هدبهن فـوق خـده مشاريـع
أغديك تبلشبه من اليـوم واخـلاف
وتسامح اللي يشتـري فيـه ويبيـع





(عديت)




عديت في رجـمٍ طويـلٍ يبايـن
أخيل نشر مبعديـن المراحيـل
أخيلهـم ليـن اتقـن الظعايـن
يتلون جرة ذاكر العشب والسيل
أقفم وعيني في سنعهـم تعايـن
ينحون واثنات الجمال المحاميـل
اشوف من تالي دبشهـم عوايـن
من بعدها تسمى سوات السماليل
ماهمهم شف القلـوب الحزايـن
يتلون شف مراوزات المخاليـل
ياصاحبي ليتك فتشت الظعايـن
حتاك تدري انك عليـه غرابيـل
أسقيتني كاس الطنـا والغبايـن
وانته تواعد بالليالـي المقايبـل
ليا قمت تضحك بالثمان الرزاين
حطيت لك بفلوج قلبي مداخيـل
أودعت مني قاسي القلب لايـن
وحمست كبدي حبس بن المعاميل
الكون كونك ياعطيـب الكوايـن
والأمر للي يولج الصبح بالليـل
أرقابنا حـدر المـوده رهايـن
وأعتاقها بيدين من يعتـق الميـل




صحن بن قويعان

الموضوع الأصلي: ديوان الشاعر الكبير // صحن ابن اقويعان الجبلي || الكاتب: محمد الحصيني || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::

تعليقاتكم البناءه هي طريقنا لتقديم خدمات افضل فلا تبخل علينا بتعليق