مـن أعلام قبيــلة مطــير..سالفة وقصيدة

مـن أعلام قبيــلة مطــير..سالفة وقصيدة

بسم الله الرحمن الرحيم
الشاعر محمد بن خلف الخس المطيري أو البستان كما يسميه الملك عبد العزيز أحد كبار الشعراء في
الجزيرة العربية و علم من أعلامها .. له العديد من القصائد المشهورة و منها قصيدة مطلعها

سبحان من سوى الأوادم من الحور = أنا اشهد أن الله هو اللي يسوي

يقول شاعرنا في أحد أشرطته اللتي يتحدث بها عن قصائده و مناسباتها :-
هذي بنتٍ كنت أكشخ عندها وهي تقول أبيك وأنا والله نافعتني قولت أبيك لو أنني داري أنها تكذب
علي , وكان عند أهلها صبي يعرف مابيني وبينها من مودة وفي أحد الأيام يوم رجع الصبي للبيت لين
أهلها عندهم مسايير من جماعتهم يخبرونهم بربيع على جو الثور بالصمان ويمدحونه لهم ويبون
يشدون الصبي يوم جاء للبيت لين البنت جالسه مع أمها وخواتها على ضو نار الذبيحة وكانت هي معها
عود بيدها تلاحق النار فيه وبطرفه جمره فقال لهال الصبي :
يافلانه لعيون محمد الخس أنك تكوين يدك بالعود قالت بس بالعود إلا بالنار كلها فغمست يدها فالنار
وفي الصباح نفطت يدها من أثر حرارة النار.يقول وقابلتها بعد ذلك عند البل وقالت لي الذاهبين ـ يعني
العرب ـ يبون يشدون ـ يقول يوم شفتها لين الله مصورها صورة عجب فقلت هذه القصيدة :

سبحان من سوى الأوادم من الحور=أنا شهد ان الله هو اللي يسوي
زول ٍ خلق من نور وبخدته نور=نور من الخالق ماهو نور ضوي
أدعج غنج خده به الملح منثور=تقول بدرٍ بان بفتوق نوي
وعيون تذبح بالهوى كل منعور=سود ومضاليلٍ على القلب سوي
نيشانهن رمانت القلب ياسرور=وحرابهن من دم قلبي تروي
هو مسرفٍ فيه وانا فيه مجبور=حبه ملا قلبي وجوفي وجوي
من زود حبه كن كل البني عور=لا غاب عني قمت ادوج وأهوي
أبو جديل اشقر على المتن منشور=يا هني من بيديه فيه أمتلوي
ان كان شدوا يم وسمية الثور=واحسرتي لا قالوا البيت طوي
وان مت من مركوز الأنهاد معذور=اللي عليه هالزمان امتكوي
ولوهو عطاني صاحبي كبر الأظفور=قلت الدوا منك ، وعلى الله بروّي

يقول وفي يوم الشديد مريت من قدام بيت أهلها كني أبا اروح للناس اللي على البير يسقون حلالهم
يقول ويوم تعديت البيت وهي تطلع من خلاف البيت وتشر لي على قلبها .
قلت : منهو له ؟ قالت : لك ....
قلت : واللي محجرينه ؟ : قالت أبوهم بعشرين ضو ...
فخرجت أمها ورأتنا ثم قالت لعل عينك للطرفة ما انت بيم الشديد والقامة ثم أخذت عصا تريد تضرب
البنت ثم استحت ورجعت .

فقلت هذه القصيدة :

بالله ياهل البيت لا تشلعونه=خلوا عيوني من حبيبي تروى
ثم لا تهوزونه تبي تضربونه=جعل اليدين اللي تطقه تكوى
جسمه حريرٍ لو تبي تلمسونه=مثل النفل لو تلمسه لمس ذوى
غروٍ نياشين الغلا في عيونه=يضحك ويشر لي على القلب جوى
يقول هذا لك ولا يقربونه=وأبو الذي يزعل بعشرين ضوى
وأنا مليك رضاه ماجوز دونه=قلبي معه بيديه من حيث موى
حيث اني افهم ماخفى من ضنونه=وأدري بقلبه من قديمٍ وتوى
وأخشى عليه من العرب ينظرونه=أنا أشهد ان اللي مسويه سوى
نبنوب موزٍ مايلاتٍ غصونه=عرقه من الجم الزلالي تقوى
والخد براقٍ تكاشف مزونه=مثل المشاعل من مقاديم نوى
عنق الغزال مخلعاتٍ متونه=والثوب من قفوه عليه يتطوى
في خاطري ما فالبشر مثل لونه=مما خلق ربي من آدم وحوى
الله على من شد مجمع قرونه=وأكمى عليه وفي رقبته تلوى

و سلامتكم

الموضوع الأصلي: مـن أعلام قبيــلة مطــير..سالفة وقصيدة || الكاتب: الغفيلي || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::

تعليقاتكم البناءه هي طريقنا لتقديم خدمات افضل فلا تبخل علينا بتعليق

وانت سالم يالغفيلي

عزالله ماقصرت خوش قصه وقصيده

يعطيك العافيه على هذا الانجاز

ولاهنت

تقبل مروري

الله يعطيك العافية يالغفيلي

وننتظر مشاركاتك الطيبة

تقبل تحياتي

ياهلا والله يالغفيلي . . . . .


لاهنت والله . . . .


موضوع جميل

الأخ القعيمي - عبد الله السالم - بن لامي ....أشكركم على مروركم الرائع.
وعلى هذا التحفيز .... تقبلوا فائق التحية والتقدير

قصيده رائعه واحداث اروع تسلم يالغفيلي عليهاااااا-------------اثاري الخس ماهو بهين قبل -------------على فكره الخس جارناااااااا ونعم الجار الله يطول بعمره ويعطيه الصحه والعافيه----------تقبل مروري

يعطيك العافية يا البناخي وما قصرت
بيض الله وجهك

يعطيك العافيه وماقصرت يالغفيلي

يعطيك العافيه اخوي الغالي الغفيلي

روووعه الابيات والقصه

يسلموووو

تحياتي.

يعطيك العافيه