ديوان الشاعر/ نايف ابو طفره الجبلي

ديوان الشاعر/ نايف ابو طفره الجبلي

السلام عليكم ورحمة الله وبركاته
يسرني أن اضع هذا الديوان امامكم .. وهو لـ شاعر له بصمه علي الجبلان .. وعلي مطير عامه

ياااصباح الورد والا ياصباح الخير كله=الوكاد انه صباحن مايجي مثله صباحي
الغلا والشوق باقي يالغلا الك بمحله=بين نظرات العيون وبين زرقات الرماحي

هذي الصفحه فقط مختصه لشاعر أبدع في الشعر النبطي

هنا
تجدون
كل
ماهو
يعجبكم
من
غزل
مدح
رثاء

أتمنى اني قد اوفيت هذا الشاعر حقه في جمع قصائده ..

أتمنى من الاعضاء والمشرفين عدم الرد لحين اكتمال الموضوع ..

أضع امامكم قصائد الشاعر نايف ابو طفره ..

ياحريب الردا يالشيخ يالمرحباني
اتصل بك غلا يانسل شوخ القبيله
حاجتي سمع صوتك ياحفيد الحصاني
كل ما ابطيت عنك يازبون الثقيله
ايه والمدح واجب والوفا لك حداني
والمشاعر تغني كل ماغبت ليله
مايكنه فؤادي لك يقوله لساني
ياسمي الزعيم اللي فعوله مهيله
فوق عوص النضا ومكاضمات العناني
ضربة الجمع ماهي من جنابه قليله
عقبه فيصل الهارف عريب المجاني
وامتطى المجد واسرج للفعول الكحيله
النوادر مجاذب والفخر له مكاني
كل ماغاب نجم النجم الآخر بديله
جعل ربي يديم ألنا اطوال اليماني
كل مامال حمل اخوان جوزه تشيله
شجرتن ظلها للناس قاصي وداني
من قديم السنين الماضيات الطويله
ياولد بدر هاجوس القصايد دعاني
جاك بدع الفرايد والبيوت الجزيله

ليت دمع العيون يزيل جرح الضمير
كان اهل المدامع كل يومن وليله
كل ماناحت الورقا وغنت عصير
رحت اجاوب صداها فوق راس الطويله
ول وليت ياقلب الشقاوي كسير
ليت سود الليالي بالعطايا بخيله
حفيت اقدام رجلي لو بغيت المسير
يازمان العجايب يازمان الثقيله
هب يالوقت الاقشر سل حال البعير
ان برك ماتساوا وان مشى عزتيله

البارحه والناس بالنوم غافين=السهر صاحبني وعفت الرقادي

ممسيت يابندر ولاغمضت عين=والجفن وسطه مثل شوك الكدادي

لاقلت روحّ قلت اصبر وبعدين=عادي تحسب الوضع للناس عادي

خليتني محتار مابين رايين=والفكر دايش والبلا في فؤادي

مابين ساموده ودار الحمادين=ياليت تسمع كان اصوت وانادي

احرمتني من شوف (صاهود )ياشين=حرمتني من شوف طير الهدادي

صاهود يابندر يساوي ملايين=اشقر خفيف الريش مابه هوادي

يعجبك طرده لاكتف بالجناحين=ليادبر الحفان راح متحادي
اومى على روحه وخلا الشياهين=مثل العقيد اللي نهار الطرادي
ياما طلع قدام ويسار ويمين=وياما تعلا خارمن ماتصادي
وياما لحق وحده وحده وثنتين=واردفت عقب اثنين علمن وكادي
بالكف مايكفخ طليق الحجاجين=الا ليا شاف ابرق الريش بادي
لاشافها مايلتفت للمومين=لولا جهازه يمكن العام غادي
لاشافها كنه براسه شياطين=يفج داغرها لروس الثنادي
لاتلها والله ماغبط السلاطين=اللي تحوش المال من كل وادي
الريش من ضربه سوات الدخاخين=تفرجوا ياللي تبون العنادي
ابيض نحر اقطم وله مفرعن زين=والراس عازل مايخلطه سوادي
ماهو من التهجين ولاهو من الصين=عذروبه انه من طيور الحمادي
بيني وبينه مثل عشق المحبين=لبطيت عنه ماتهنا بزادي

ما ملدوه اهل الحمام الجديدين=اللي على ماقيل ناسن اجدادي

الموضوع الأصلي: ديوان الشاعر/ نايف ابو طفره الجبلي || الكاتب: سعود بن لامي || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::

تعليقاتكم البناءه هي طريقنا لتقديم خدمات افضل فلا تبخل علينا بتعليق

يالله يارحمن ياخالق الكون=يارافعن سبعن بليا عمدها

يامقسم الارزاق وابليس ملعون=سنه نبيك يالولي نعتمدها

سبحانك الفرد الصمد لك يحجون=الخلق من مداتك انت مددها

ياناصرن موسى على جيش فرعون=وابولهب يلقى الحطب من مسدها

الوذبك ياللي لوجهك يصلون=وارجيك عن دنيا تزايد نكدها
وفي حفله اللي للمواجيب يافون=شقر الحرار اللي ينومس هددها
اقود عذبات الطواريق بلحون=مثايلن تبقى ولحدن نقدها
وامدح مدام المدح له سلم وافنون=بالعزوه اللي من بغاها وجدها
الابه اللي يقلطون ويطولون=افعالهم لو قلت محصي عددها
فريس علوى يوم طاعن ومطعون=تقلط وتدحم والفعايل عهدها
اخوان شما واكثر الناس يدرون=افعالهم تبقى وكلن شهدها
تاريخهم في قمه المجد مقرون=الارض عاليت النوايف وتدها
كم انطحوا من جمع ويروح مغبون=والدحمليه طير شلوى سعدها
قالت غنيم وقال حاضر وممنون=واومى عليهم والقحيله لكدها
يوم احتمى الماقف غدى تقل مجنون=يضرب بشلفا والمنايا وردها
وعجير غنى والقبايل يعرفون=والمعركه فبيوت شعره سردها
وقال العطاوي يفصل الراس ومتون=الخيل من فعله تزايد جهدها
وغيره عقاب اللي له الناس يثنون=كم سربتن قدام وجهه حصدها
يدب بحد السيف والنصر مضمون=كم سابقن حدره تطاير زبدها
يوم الدعيله قال مهما يسون=يقلط على الصابور لينه مردها
ومع ذكر ابو مرزوق ياللي توحون=ركايب الامجاد فيصل ولدها
فيصل كما الفيصل مهو شك واضنون=مقدم جموعن والبيارق فردها
يتليه جبلانن للارواح يهدون=فهود الزراج محلحلينن اعقدها
صيارمن في غالي الروح يصخون=لاغطرفت عكشن بزمه نهدها
الياغطرفت فوق المعادي يروجون=يشوش واحدهم لياومت بيدها
افعالهم تبقى مهي فلم كرتون=تبقى مع الدنيا ولو طال امدها
راحوا ويبقى من على الطيب يسعون=تطلع فهودن من سلايل فهدها
واليوم حكم ملوك والشر مدفون=في ديرتن حكم الشريعه سندها
سيفن يقص الروس والحد مسنون=ونعمه وخير ومن لقاها حمدها
تمت بذكر اللي لبيته يطوفون=اللي رفعن سبعن وسبعن مهدها

هيه ياللي تواعدني وتنساني=الله يسامحك.. يامخلف النيه

البارحه للوعد ناطر وسهراني=والشوق ناره بجوفي ليلها .. حيه

ياراعي القرناس لاعاد تدعيه=ماعدبه سجه وروحه وجيه

القيض بانت فالبسيطه مواريه=وتبدلت روس الفياض العذيه

العشب قفى والسوافي غدت فيه=واللي بقي عليه شمسن لضيه

تحرق اغصونه لين يذبل وتمحيه=والقيض راع الطير ماهو خويه

همه يزود ومدهراتن لياليه=سته اشهورن والمشاعر خفيه
ربيع قلبه مع اسهيل وطواريه=لابان كنه معطن الفيصليه
وانا بعد قلبي ترده محانيه=يكفخ ولالي ياعرب مقدريه
خطرن تصرم من محله عراويه=طرد الولع للمهتوي جاذبيه
اليا نشا نون تعقرب مثانيه=مقادمه هلت على الجندليه
اساهره واسمر واشوفه واراعيه=واخيل براقه صباح وعشيه
واقول طيري لاحقاتن مواسيه=ذلايق الجنحان ماهي طريه
كمل عقب سته اشهورن اداريه=حقن علي ارفاه عن كل سيه
واليوم يطيرن حفظته واباريه=مامن عذر دام الليالي مديه
لك واحد والصيد يضرب اراضيه=ويجهم ويسري للفجوج الخليه
جرحه بقلبه وانت ياطير تبريه=لدلجت وقت العصر والشمس حيه
على ازرقن مثل امس شفنا مواطيه=واليوم قلنا مالنا عنه نيه
قمنا نقطعله ونضرب حراويه=ملاقفه والروس هاذي وذيه
هذا يطلعله وهذا بثاريه=وانا على شانك رقيت الشغيه
واليا طلبت السبق ثم قلت عطنيه=اقول سبقك مطلقاته ايديه
ماعاد فيها بالنداوي مشاريه=مدام نفسك فالمواقف جريه
الخرب لدبر ماتسره مواميه=كم انكبن ياطير منك ضحيه
اليا علقت بمنكبه مع لواحيه=كنك تضفه ضفتن عاطفيه
تقول ابركد يوم اضفه واوطيه=واقولك تسلم وهاذي هديه
هاذي طرات العمر والرب نرجيه=يعودها خلاق رب البريه

عـزاه ياحـال الصقاقيـر عــزاه=الوقـت غيـر يالحويفـي مسـاره

اللي يحـب الطيـر ماعـاد يبغـاه=نقله يابو سلمـان ذنـب وخسـاره

الصيد مامـن صيـد ياويـن تلقـاه=وحـده وجرتهـا عليهـا بـشـاره

راع الغنم يبلس على شـان مخبـاه=ويعوض التاجـر رصيـد التجـاره
راح الولع ياطيب الصيـت والجـاه=اقفت اضعونه مـع زمـان اندثـاره
وانت تجامل غصب من دون مشهاه=طبع بدويـن مارغـب بالحضـاره
قلبك غلا القرناس بالحـب يشعـاه=تقدير عاشـق مامشـى باحتقـاره
تبكي على وقتـن مضالـك وتنعـاه=يومـك اطلـع للحبـاري بـقـاره
لاجيت قفرن ماحـدن يابـدر جـاه=تلقـى جرايرهـن تـدك الـزبـاره
واخذت عن وجه اللذي عارف اقصاه=جثل المناكب كاشفـن فـي غتـاره
افجح قصير الساق والمـدح يزهـاه=ريش الظهر خالط حمـاره شقـاره
اليا سمـر قامـت اعيونـك تحـلاه=وان طار ماغيره يشوقـك اطيـاره
يوم القنص يعشق وتحمـد مزايـاه=(مركبك فـوق ولاتحـب الغمـاره)
واليـوم مالـه مزتـن لـو تمنـاه=لاعاد تبنـي يـوم غيـرك دمـاره

قالولي اقعد بالبلد قلت وشعاد=انا البلد ماحب ضوله وسوقه
ربيع قلبي والهنا يابن فهاد=في خايعن طرق النسايم نشوقه

لابان نجم اسهيل مافيه مقعاد=قلبي ذعاذيع الهبايب تشوقه

اسج عن عاذل وحاسد ونقاد=واخيط قلبن كاثراتن فتوقه

ماني من اللي يجمع المال لازاد=اللي لجمع المال تابس اشدوقه
خطو البخيل اللي يلوبد تلوباد=اللي طروقي ما توالم اطروقه
اليا نقلت اللي على الصيد معتاد=الاشقر اللي زاهياته ادقوقه
في صحصحن كد جالنا فيه مطراد=وقت المارا كل طير ولحوقه
اليا حصل خربن اثاريه تنقاد=وعقب القصص عمد بطاريف لوقه
هديت مسعورن مهو عنه نشاد=لو يتعلا الغيم صاهود فوقه
يدلي كما دلون على البير وراد=كم خربن ازرق ذاق دم امعلوقه
يصيد لفلس طير حامد وحماد=اليا طلع وادلج عطيته اسبوقه
طيرن ينومس لاحصل بينا اعناد=ويعد لاعدوا طيورن سبوقه
ماهو من اللي لنطلق حام مافاد=اليا صمل خربن مصقر يعوقه
طرد الولع سهمه مطانيخ الاولاد=اليا سمر نون تلاعج ابروقه
اليا انحدر سيله على قبر زياد=وعلى فياض الصلب صدق حقوقه
ضافن من الباطن ليا ريق عواد=وعلى الرفيعه مسبلاتن اشنوقه
دارن رعت فيها مغاتير الاذواد=يومن كلن يعتزي عند نوقه
سهف البكار اللي غواربهن اسناد=اعراض الجنوب وكل وصفن تفوقه
تشوف سيله غاديله تزباد=بامر اللذي يعلم بسر مخلوقه
اللي بسط سبعن وسبعن بلا اعماد=ربن لعطفه كل الانفس شفوقه
يقوله اللي قزر القيض بجهاد=وعبرات صدره بالفؤاد امخنوقه

تباشروا ياهل الولع بين سهيل=والقيض ولا واقتفاه البرادي
راح النهار يمد من طوله الليل=والريش كمل في طيور الهدادي

يالله ياللي تحيي الارض بالسيل=ياللي لوجهك يسجدون العبادي

ياعالم الاسرار ياعادل الميل=عليك يارحمن كل اعتمادي

عفوّك ولطفك يامغيث المقاليل=ياهادي الانسان ياخير هادي
يالله بنوّن من ثقيل المخاييل=تلعج ابروقه في نحور السوادي
تنشيه يارحمن يارب جبريل=سيله يفيض يالولي كل وادي
يلقفله الشرقي سوات المحابيل=ويركد شماله لاتزبر هجادي
ستين ليله للسواقي تعاليل=ويعيشله راع النياق التلادي
شقحن عليهن يصلحن التماثيل=هزعن غلاهن في صميم الفؤادي
عوبن لهن في بصره القلب تبجيل=لا ربع المشلوف شلع وقادي
راحت تداحم جلها والمخاليل=جرد الرقاب المكرمات السنادي
مقهورها يردع وراحت عرازيل=الصلب الادنى شفها والمرادي
وراع القنص ياعاذلينه مهابيل=مايستمع في شف قلبه منادي
دقت اهجوسه والليالي مقابيل=عن المدينه تقل حاديه حادي
اليا خذا علم الرجال المشاكيل=قال الوعد من بين ضلع وحمادي
في خايعن دونه احزوم وغراميل=يمشي بشف الطير جبر الثنادي
اشقر تواديعه على كامل الذيل=فعله مثبت كل ماهد صادي
عوق الخريش اليا قعد بارد الحيل=لدلى من اللجه بسودن احدادي
حرشن اكفوفه كاسيتها السراويل=رشه من المحزم وحدر الهوادي
عليه من فارس ارسوم وتحاليل=وعليه من وجه الشجيع العنادي
اشقر وكن اللي بصدره سماليل=او الذهب بصخيفات الايادي
اليا انزعج ماسبرت الدرابيل=لولا الجهاز امن المطاريد غادي
لاجيت قفرن للحباري مداهيل=فعله يزود وغير شرواه عادي
لاثبت الطلع الملاوح ورا الميل=لوزاد غيره طير فالطلع زادي
اهل الولع مايسمعون العواذيل=لاناض براقن شمال البلادي
راحوا يلمون العزب والمعاميل=ثم قربوا شعل الجموس الجدادي
يالله عساها للنشاما تساهيل=ياهادي الانسان ياخير هادي

الشعر ماعادله في خاطري مزه=عفته ولالي هوى لو زاد جمهوره

من اولن في اعروق القلب واعزه=واليوم يقمح لو انه دف بابوره

ماني مرحب ولو جاني على الحزه=صفحة قصيدي على ماضيه منثوره

العام اجمل اهجوسي صوبه اكزه=احزن بفرقاه واغني على احضوره

واليوم ببكي على غزه واهل غزه=وافرح للبنان واصفق لسنيوره

الجرح راع الغشامه فالحشا حزه=والنفس ماهي على الانذال مجبوره

راع الردى مثل شكله عالم توزه=ناسن على السب يأهل العرف مسعوره

بالكذب والظلم عند الشوخ مرتزه=على الاجاويد كلن شب تنوره

الحقد ينبت ويلقى واحد يجزه=على الردا والنميمه سل ساطوره

ابليس لمسى ولصبح جاه ثم وزه=دايم يباريه فالطرقه على شوره

والحر ماهو بحال البط والوزه=الحر يشهر بجنحانه مع اصقوره

يفرد جناحه على المرقاب ويهزه=وان طابت النفس عاف اطويق واطيوره

الطيب راع المراجل بالغلا لزه=ويعالج الجرح يأهل الجرح دكتوره

واللي عن المخطيه محشوم ومنزه=لوكان تقفي اضعونه واجب ازوره

القلب لمشاهد الغالين له فزه=يحفظ مواثيق صدقانه ودستوره

اشعيل يمشي وشوك الحزم ماطزه=واعمال كل البشر فالحشر منشوره

يابعد دقت تلفونك وياقربك‘‘‘غلاك خلاك كنك عندي اهنيا
خذني بكفك وفا واطعنبي بحربك‘‘‘والروح تفداك خذها جات في يديا
يحقلي يوم اغني واتفاخربك‘‘‘ويحقلي يوم اسولف فيك عفويا






مسايير جينا للسنافـي عريـب السـاس=عريب المناسب من عمامـه ومـن خالـه
زعيم الشكاله والمراجـل مـن القرنـاس=حفيد الشيوخ اللي علـى المجـد مدخالـه
نزوره ونجلس في مضيفه مـع الجـلاس=على العـود الازرق والمفاطيـح وادلالـه
عسى مجلسه عامر ولاهل الوفـا نبـراس=علـى ماضـي الاجـداد حلـه وترحالـه
مجاذب عقيدن لاطرالـي رفعـت الـراس=عسى جنه الفـردوس صاهـود منزالـه
فعوله تخلد لو رحل مـع جميـع النـاس=عقيد النضـا والشعـر مايحصـي افعالـه
بعيد المغازي سته اشهـور باسـه بـاس=سـوات القطامـي لاتنهـض ومحـوالـه
تمر الليالي لـو رحـل والرجـال اتقـاس=على الطيب واهل الطيب والعود واعيالـه
اقـول المثايـل كـل مادقبـي هوجـاس=واغنـي لبـو متعـب قصيـدي وموالـه
من الخافق اللي صاغ شعره على القرطاس=يغوص البحر ويعانـق الشعـر واجزالـه
على مدح وافين الخصايل خـذا مـرواس=وعن اهل النمايم والحكـي صـك جوالـه

لاابعدت شوق الحب يمـك يردنـي=غلاك مرثع في حشايـه وهابلـه
اليا طرتلي غرتـك وانـت غايـب=النوم غيري ياتلـع الجيـد طابلـه
وانا سهير وكل مرقـب يشوقنـي=والحب سالم من سلم من محابلـه
اموت واحيابك وشوفـك مسرتـي=حبك شراب القلب وايضا الزهابلـه
لا اقضيت في سودك دنا الموت مني=المسعد اللي منت فالرمـش نابلـه
كن المنايا وسط سـودك مقرهـا=وكن الحدايق عند شـرواك ذابلـه
ارجيك عن ليل الشتا تطرد الشتـا=قصر الغلا حذرا تسـوق الخرابلـه
عليك خشم وعين والخـد كالقمـر=وعنقن جريح الجاش صار العذابله
متمرجحن بالزين والملح والحـلا=وعودن تقل شط الفرات الشرابلـه
مغويه غيه كل مانسنـس الهـوى=لامره العاشق من الشـوق ذابلـه

لي عوده .. أتمنى عدم الرد لحين اكتمال الموضوع

مع خط الاطراف والساعه ثلاث وعشر
والدرب ساع اعتدل بالرجل دزيتها
راحه بحفظ الولي قبل صلاة العصر
مثل النداوي اليا اومى يوم حليتها
الله ياقا مواطيها طريق الخطر
والله يحفظ دريولها على سيتها
b m ماكن غيره فالمواتر ظهر
الارج من طيبها غليت حبيتها
فيها التطور وفيها مايشوق النظر
هاتف وشاشه وامورن ماتقصيتها
اتنزح المنتوي لاضاق فيه الصدر
واتقرب المنتحي وان كان سريتها
تاخذ من الذيب وجهه والندواي ظهر
وفيها من البرق مقدمها على ليتها
سردن تقد المسافه باتساع النحر
اقفت تبطح وانا لرضاي عنيتها
الضغط حول اربعه كنه ينوش الحمر
والضغط الاخر على البستم ومع زيتها
اليا دعست السليتر واستجاب الامر
قال انتبه للمواتر كان مريتها
واقول انا الشوق يدفعني لنور القمر
اللي بوسط الضماير شيدت بيتها
من دونها المجمعه واسدير غير الحفر
في ديرتن من محبتها تمنيتها
ام الدلع والحلا والملح بنت الفخر
كم ليلتن في احلوم الليل ناديتها
ربيع قلب المولع عقب ماهو دهر
وسبت ادموع المحاجر يوم هليتها
العود موزن يغذى من افروع النهر
ليت الليالي تجي بالكيف ياليتها
حبيت كل الرياض وبدوها والحضر
كله سبايب هنوفن صرت انا ميتها
تلطمني امواج حبن مثل موج البحر
وابقى بقصه وفا للوقت غنيتها
لاضاق صدري طرالي رحلتي والسفر
وكم ديرتن دون ديرتها تعديتها

عسى من يحدك عن وليفـك زمانـه حـرج
تفتح عليـه امـن اشهـب الوقـت بيبانـي
عقب مامعه امن الدبش ألف غيـر الفـرج
يصبـح يابـن ماجـد ذلـيـلاّ وفقـرانـي
على صاحبك سج القـدم واطلـب الله وارج
ولاتستمـع فـي هرجـه افلانـي وافلانـي
تواصل مع اللي نور خـده سـوات السـرج
تشعشـع بنـوره ناعـم الـعـود ريـانـي
عيون اشقرن يطلع على الطايـره والـدرج
يوقـف هـل الحمـلات بالطلـع ثبتـانـي
على كف شيخن مثل شرواك ساس وعـرج
ينومـس جنـابـه لاتنـهـض ابليهـانـي
وانا ما اشرب المطروق ولا اكلت لحمن حرج
واضنـك بهـاذي يابيـض الوجـه حقانـي
وترى بالعرب عاقل وبـه نافضيـن الخـرج
صديقك صديقـك واكثـر النـاس قومانـي
بعضهم يقربلك علـى شـان فتـح الـدرج
مغيـر ايتحلوالـك وهـو قلـب شيطـانـي

بالله يالطيار لاشفت ساقان
خذلك على عاليه لفه ودوره
اطمن مع حد الدكاكه بصفطان
وابو حجايا لاتجاهل اصبوره
وأهزع على المشلوف مع جو عرفان
ومناخ في قلب المشقى اقصوره
ومر اللصافه واللهابه على شان
ايبين المغرم غلاه وشعوره
قلبي على دار المناعير شفقان
هوّن على قلبن تزايد احروره
او نزل الولهان لاصرت عجلان
مادام عبرات الفؤاد امحشوره
وتفوز بجري والحساني بميزان
انكان مايلحك منها خطوره
دارن لها بالقلب ديره وبيبان
ديرة غلا حدر الضلوع امعموره
من حب اهلها كل ماطرت بفلان
لديت والدمعه تهل امعذوره
عسى يساقيها من المزن ودان
والروض بالفيضه يشابك ازهوره
امرها ولهان واروح ولهان
وابكي حمار الصلب وابكي ازبوره
لوكان ماعاصرت ذربين الايمان
اشفق على هاك الزمان وعصوره
قدام لايدخل مع الحسد شيطان
وكلن على الثاني تزايد نفوره
اليوم ذا راضي وعشرين زعلان
وابليس للبغضى يقرقع اقدوره
وانكان مالك بالجميلات عنوان
اهل الجمايل للرجال امخبوره
والله لرجع لاوصلنا لخيطان
والحر يالطيار يعرف اعبوره
الدرب ادله دون شاشه مجلان
بالراس له عندي اكروكي وصوره
على اللذي يطربك لاصرت عمسان
لياعارض البطناج ماناش زوره
من وارد الفكسار ماهو بنيسان
اشريه من مدة حفيد النموره
شيخن تقدابه قبايل وشيخان
شبره يزود اليا اقصرن الشبوره
عبدالله ابن الشيخ ماجد اكحيلان
ابن الدويش اللي بنا المجد سوره
من فيصل الاكوخ قبل عصر سلطان
لفيصل الهارف وعهده ودوره
مجدن يخلد والمواريث عقبان
وفعلن هل الجزلات تخطي احكوره
عساه يبقالي على طول الازمان
ويبقى لحمران النواظر اسطوره
هذا ولد ماجد وجده بليهان
النور ياخذ من هاك الوجه نوره
ذكره حيا وابروق وارعود وامزان
بالشور يقنع لاعطا الناس شوره
من جالس الحكام يشهر بجنحان
وهذا مع اعيال الامام اخو نوره

كل ماقلت ابدله عن محبة مضاوي
واتريح واقول الهم ماهو بحولي
راح يقنب على المرقاب ذيب الشواوي
لين نكد عليه جعل عمره يطولي
طير النوم عن عين الجريح الشقاوي
ورحت اوقف تقول من العباد امهبولي
ابن بدهان عاقبني بكثر الشكاوي
جاه شره وفتح مبهمات القفولي
احسبنه تطوع واثر قلبه مهاوي
كل شياّ يصير بهالزمان امعقولي
ارثعتبه فتاة موسعين الاهواوي
بنت بدون لها سلم البداوه ادلولي
غيرها مايشوقه لابسات الغطاوي
بين حبل الرجا والياس صار امعقولي
فوقها اشقر يغذا مسك عنبر وجاوي
ذيل شقراّ شعاها الصبح قرع الطبولي
تنسفه كل ماسمعة احداه وعزاوي
لا انتثر كنه اللي عن جسدها امعزولي
عنق ريميتن بين السهل والملاوي
اتصلفق ليا شافت من الناس زولي
عين فرخ الحرار النادرات النداوي
لاتنهض وثبت وانزعجله لجولي
راح يرقى ويرقى والطيار امتساوي
لين حول على الطلع الملاوح نزولي
طير من يعطي الجزله ربيع الفداوي
شيخ وابن الشيوخ اهل الكرم والفعولي
جاذبينه صناديد الرجال الدهاوي
لا ارتكى ماتهزهز عن ثقيل الحمولي
انحر اسعود ابن ماجد يحل الدعاوي
لامشالك خذ الدنيا بعرضن وطولي
دون ولد الدويش الفيصلي لاتراوي
ولاتسمع بهرج الحاسدين الخبولي
ان نصيته خذ العلم الصحيح القصاوي
قام حظك وجرحك بالفؤاد امغسولي
كنك اللي على العد القراح الرهاوي
وكان قلت الحقيقه ياعرب صفقولي

تطرش وتفقدك القبيله ليا ابطيت
تفقد جنابك يوم قلبك فقدها
وغيرك يغيب اسبوع وانسجله ميت
ماتفقده كود العجوز وولدها
امطير تنشد يابوتركي ليا اقفيت
وانجيت عشاق الجزيله قصدها
والشرف والصمان والضلع والبيت
واصبور ابو سبعه تباطت وعدها
ياطيب المنسب وياطيب الصيت
فيك المدايح مايوقف عددها
لو النوادر في غيابك مفاليت
تكفخ مواميها وتلطم بيدها
اعيال ماجد لو مدحت وتقصيت
تقصر ابيوتي بالحرار وهددها
ساس الفخر نسل الرجال العناتيت
مال البيوت الا قوايم عمدها
يالهيلعي يامثبت الطلع تثبيت
هاذي تشقلبها وذيك اتهبدها
اشهر بجنحانك على ماتمنيت
وارق الثريا والكواكب بعدها
من جرب النادر يعاف الحتاحيت
والشبل يطلع من مجاذب اسدها
تطرش وتفقدك القبيله ليا ابطيت
تفقد جنابك يوم قلبك فقدها
وغيرك يغيب اسبوع وانسجله ميت
مايفقده كود العجوز وولدها

وقفت اطالعها وانا داخلي شوق
في ماقفي ابطيت واقف وقفت
اخيلها والقلب ضايق ومحروق
يوم ادبرت عني وقفت وهفت
ليت الفراق اليا حصل صار برفوق
او ليتها عما تبى النفس عفت
من اولن هي القمر بالسما فوق
واليوم وين البدر يوم التلفت
لو قالن الخفرات محقوق محقوق
النور والانوار قدمي تخفت
لاسلهمت قلب الشقا يمها يتوق
تحي عروق الحب وانكان جفت
ارخي سموعي ويرتوي كل معلوق
ياليتها في دينها العام وفت
هاك العنود اللي خذت قلب مخلوق
اللي لشمعات المواليف طفت
قفت وقلبي ياهل الحب مسروق
شالته بحبال الغلا عقب لفت
واليوم لاسولف ولا اشرب ولا اذوق
والنفس من عقب الفراق استخفت
من عقبها ما لاقلي كل منطوق
حيثنها عن باقي الناس كفت
ياما عليها ساقني هاجسي سوق
اتعبت نفسي والاوادم تعفت
اسرح مع الذكرى على كل طاروق
وابقى مع القصه ولوهي توفت