معارك صواب ولاخيضر ومعارك بن لامي

معارك صواب ولاخيضر ومعارك بن لامي

مسسسسسسسسساء الهجن والهجيج

معركه صواب

قصة غزو الجبلان من مطير على عنزه في مكان اسمه صواب يقع حاليا شرق الاردن وسبب ذكرها بانها اخذت وقتا طويلا ثلاثة اشهر روحه وثلاثة اشهر رجعه نظرا لبعد المسافه والقصه وما فيها بان الجبلان غزو على عنزه واخذو حلالهم ورجعو الى اهلهم وعندما علم مطلق الديديب شيخ العمارات من قبيلة عنزه قال ان مسكت بن لامي امير الجبلان قتلته وعندما سمع بن لامي امير الجبلان هاذا الكلام قال لربعه الجبلان غزينا شمال قالوله وين يابو سفاح قال شمال ثم قال رجل من الجبلان والله مايردكم الا عنزه يقصد بان ابن لامي ناوي لعنزه وفعلا قطعوا المسافه وصبحوا عنزه في شعيب صواب وكان ابن لامي يقصد من ذالك قتل مطلق الديديب أحد شيخ العمارات ونظرا لان الجبلان فخذ من مطير وهم قلة بالنسبه لقبيلة عنزه الكبيره فقد قطع ابن لامي عنزه وفصل فخذي شلخان وصقور عن باقي قبيلة عنزه حتى لاينذرو باقي القبيله وقد هرب الشيخ مطلق الديدب وصبحوا الجبلان فخذي عنزه واخذو حلالهم ورجعوا الى اهلهم في الصمان.
وقد قال صاهود بن لامي في ذالك :






غزيت انا ياعبيد بهـلال عاشـور
اول صفر والتـوم كلـه تمامـي
ثلاثة اشهر فوقهن تقـل ناطـور
مع مثلهن ماشفت زاه الوشامـي
كم فاطر من نيها تزعـج الكـور
تفصم مضاريس الرسن والخطامي
واليوم دوك ذراعها لاحن الـزور
مثل الغشين الي طـواه الهيامـي
يذكر لنا ياعبيد شلخان وصقـور
بيسر شعيب صواب ذيك الزوامـي
صبح اربع من يم عرعر وبا القور
حمر تناسع بالنشامـى همامـي
ندوسهم ياعبيد مع شقـت النـور
كما يدوس الجول فرخ القطامـي
ولونها في مطلق قاسـي الشـور
هذيك هي الي عليهـا السنامـي
وعنا تنحا بالقبيسـه ورا الهـور
نـوخ منـاخ معقليـن الجهامـي
ومن طال عمره ماقصرتوه بنذور
ون ساعفة ياعبيد وهب الولامـي
ويا ماحلا جيب المغاتيـر دعثـور
من فوق حمر تقل جول النعامـي
وعلم نطرشبه فهد هو ومنصـور
ووفايتـه تنهـج شمـال ويامـي
لعيون من قرنه على المتن منثور
وقذيلته تشـدي لريـش النعامـي
بربعي مهديت الصعب كل مصطور
بصمعن مضاربهن تقص العظامي



معركة الأخيضر



وبعدها غزى صاهود بن لامي مرة أخرى على عنزه في الشمال وقابلهم ووذبح مطلق الديدب وهزم عنزه هزيمة نكراء في الأخيضر ...
قال محمد الرشيدي وهو من المصاحبين لبن لامي بعد غزوة صاهود الثانيه على العنوز..






ثلاثة اشهر مع هل السيف عادين
الهجن كمل نيهـن والجهـد بـاد
يتلن ابو سفاح سقـم المعاديـن
الحر الاشقر لابرق الريش صيـاد
وغرنا على عناز برضن بعيديـن
يم الاخيضر ويم ديـران الابعـاد
وغرنا على عناز برضن بعيديـن
يم الاخيضر ويم ديـران الابعـاد
الديدب اللي يذكرونه غـدى ويـن
غدى عشا للذيب في يوم لاعـاد
وغرنا على بوش طلع بين حزمين
بأيمـن جلاديـه خذينالهـا اذواد
وصارت نكيفتنا على بلدة العيـن
في حاجة الزهبه وفي حاجة الزاد
والشيخ بيع في بريـده بعاريـن
وقسم علينا أثمانهن جوز وافـراد
ثمن ركبنا من هل العين عاديـن
وحط ابن لامي دار الاجناب ميعاد
سقنا ونوخنـا للاجنـاب يوميـن
وجاهم نذرنا واحتسونـا بمجـراد
وتهرجوا بالمنع عنه امتراضيـن
عن ابن لامي نهضوا سلم الاجواد
تحاقرونـا يـوم حنـا شويـيـن
وحنا الشراب الكدر سمن للاكبـاد
والموت ماجنب رجالـن كثيريـن
الموت واحد وانفد الخلق مازتـاد
والضيغمي عود وربعه معيفينـب
الصمع طوعناه مثل ابـن مجـلاد
بغـوا ركايبنـا وحنـا معيـيـن
الجيش من دونه مداغيـش الاولاد
جبلان من بد النحايـا ضريريـن
حريبهم مايهتنـي النـوم برقـاد
هذا كلام الصدق والنـاس داريـن
واقطعك ياهرجه بلى صدق ووكاد







وقبـر الديدب يسمى مكانه نقرة الديدب شرق الأردن مما يلي الأخيضر وهو معروف وكل من في تلك المنطقة يشهد بذلك ويقر بغزو بن لامي الشهير على عنزه وهزيمته لهم في عقر دارهم وذبحه لشيخهم ..

لكم خالص تحياتي:
راعي العلـــيا

الموضوع الأصلي: معارك صواب ولاخيضر ومعارك بن لامي || الكاتب: راعي العليا || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::

تعليقاتكم البناءه هي طريقنا لتقديم خدمات افضل فلا تبخل علينا بتعليق

لا هنت اخوي على ذكر معارك بن لامي

معاركـ لا تنسى يفتخر بذكرها فيها كل جبلي ومطيري

تسلم اخوي راعي العليا على الموضوع المميز ..ولا تحرمنا من جديدكـ

...............................................

اشكرك اخووي الصدقي على المرور

تقبل خالص تحياتي ابن عمك:
راعي العليا

لاهنت ياراعي العليا ..


موضوع طيب .. ومفخره للقبيله كافه ..


الف شكر لك يالغالي ..!

لعيون من قرنه على المتن منثور
وقذيلته تشـدي لريـش النعامـي
بربعي مهديت الصعب كل مصطور
بصمعن مضاربهن تقص العظامي




راعي العلياا ,,

تسلم يمينك على النقل الفعال والمتميز

لا هنت يا المطيري على الموضوع المميز

وبيض الله وجهك

بيض الله وجهك ياراعي العليا

السلام عليكم ورحمة الله وبركاته

يعطيك العافيه اخوي راعي العليا ماقصرة

وبكم هذولا الجبلان مطانيخ علوى


ولي خلا صاهود يغزي على مطلق الديدب

ان مطلق نذر نذر انه اذا مسك صاهود وذبحه بيذبح فاطر بهالمناسبه

ؤصاهود قال ابقصر عنوته ؤهو يغزي عليه

ؤصاهود بن لامي عقيد والله والسبعة انعام بس مهو فارس
ؤيوم انشدوه الرياجيل ؤقالوله جبت الصيت للجبلان
قال الصيت جابوه فريس الجبلان

وكان من الافضل انك تفصل مابين غزوة صواب وبين غزوة الاخيضر بالعراق
كلوحده بموضوع مستقل
حتى تعطي المجال للاخوان بالتعليق واخذ كل موضوع لحقه

ؤيامال العافيه يا راعي العليا ولا يهونون باقي الخوان

فمان الله

اخوي / دمي جبلي بعد التحية
القصيده طال عمرك هي مثل ماسمعناها يمكن صاهود ابن لامي اخطأ فيها بس اتأكدلك منها انشالله .
ؤصاهود بن لامي عقيد والله والسبعة انعام بس مهو فارس
ؤيوم انشدوه الرياجيل ؤقالوله جبت الصيت للجبلان
قال الصيت جابوه فريس الجبلان
اولاً :كلام صاهود يحسب له ولا يحسب عليه لانه فضل غيره على نفسه وقليل من يفعلها وهاذي بحد ذاتها من صفات الفروسيه الفذه وصدق في كلامه اليد الوحد ماتصفق ولان فيه فريس من ربعه يفوقونه بالفروسيه وهذا شي طبيعي .
ثانياً: كيف يصير عقيد ولا يصير فارس ؟!!!! الفروسيه مطلوبه قبل العقاده يعني مافيه عقيد ماهو فارس ابداً ومن غزا ثلاث شهور ذهاب وثلاث شهور عوده ما اظن بالعقل والمنطق والعرف انه يسلب حق الفروسيه ويفسر كلامه عكس لانه مايقدم على هذا الفعل الا فارس شجاع مقدام داهيه و مغامر.
وشاكر لك عزيزي تفهمك لوجهت نظري

السلام عليكم ورحمة الله وبركاته

يعطيكم العافيه يالربع

خوي الازلع هاذا الكلام انا ماني جايبه من عندي

هاذا كلام الجماعه يقولون صاهود عقيد وليس فارس

ونتهى كلامي بهالموضوع

فمان الله