(( ديوان )) الشاعر : متعب التركي

(( ديوان )) الشاعر : متعب التركي

السلام عليكم ورحمة الله وبركاته


جبت لكم مجموعة قصائد للشاعر العذب متعب التركي

وأرجو ان ينال الموضوع على اعجابكم

متعب التركي

هو دائماً هكذا
يأتي بلا مقدمات



دعوه للمرور على جروحنا .. بألم صامت
.
.
.
.
قبل اسافر
.
.
.
قبل اسافر وتنسى جيت اسلم عليك
جيت ابي عمري اللي اكتشفته غدى
ضاعت اجمل سنيني من عمايل يديك
اكذب ان قلت راحت لاجل عينك فدى
فرصة العمر قالوا لا غدت ما تجيك
جتني اكثر فرص عمري وضاعت سدى
جرب الخوف مره حس به يعتليك
وارفع الصوت ماتسمع لصوتك صدى
تدري اللي ذبحني قولتك ما ابيك
مابقالي لثاري لو بغيته مدى
ما هقيت المشاعر كلها ترتجيك
قل لها بالمفارق منهو اللي بدى
هاك دمعة عيون(ن) باكيه تشتكيك
هاك ريح ضمير(ن)ما استراح وهدى
ما تناظر عيوني زول هذي وذيك
ما يهز المسامع اسم ريم وهدى
قلت ماعادلي رغبة وشوفات فيك
قلت يا نفس طيبي يفرحون العدى
قلت عايف ونفسي بالخفا تشتهيك
عزة النفس تدري طيب ماهي ردى
خل عينك تهل دموعها وش عليك
انت خدك ورود ودمع عينك ندى
.
.
لاتنشغل فيني
.
.
.
.
لاتنشغـل فينـي أنابحالـي ادرى
قلبٍ تعلّق فيك ينسى مع الوقـت
اكثرمن اللي صارلي ويش يجـرى
بين الرجاوالياس فكـري تعلّقـت
مثلي ولوشفته عن همومه ازرى
ماقال ليتك في جروحـه ترافقـت
هاك القصايد لاتضايقـت واقـرى
شف وشكثرفيها لبسماتك اشتقـت
أثرالوفا ينبـاع عنـدك ويشـرى
ماكنت اصدق فيك واليوم صدّقـت
يامشتهي فرقا المواليـف حـذرى
تبعد وأنا من سكرة الحب مافقـت
لاطافت الفرصه تحريت الاخـرى
وتروح ماكنـي عليهـا تشوقـت
ساري لو إن الليل مافيه قمـرى
اشيل من حمل الهوى فوق ماطقت
لاصارحـظ أقشروالايـام قشـرى
مافيه احد عاقل يلومك إلياضقـت
صحيح بعض الناس فرقاه بشـرى
وبعض البشرلاغاب ليله تضايقـت
ليتك خذيت بليل الاحباب مسـرى
غربت من كثر الطواري وشرّقـت
السيل يبقاله على القـاع مجـرى
ويبقالك التذكار لو كنـت فارقـت
اشوف لك من وين مارحت ذكرى
ولاشفتها صديـت عنهـا ودنقـت
ماكل جـرحٍ لاخـذا أيـام يبـرى
بعض الجروح يزيد شره مع الوقت
.
.
.
.
.
.

قالوا حبيبك
.
.
قالوا حبيبك يسمع الشعر قلت إيه
يقراه بعيوني قبل تسمعونه
لولاه حتى طاري الشعر مابيه
ميراكتبه من شان خاطر عيونه
هو روح شعري وامنياته وماضيه
جذع الشجر وش كان لولا اغصونه
اكتب لغيره والقصايد تجي فيه
كن القصايد حالفه ماتخونه
هذاك لامنه زعل قمت اهاديه
حتى وهو مخطي تعذرت دونه
يمكن لوانه يلمس الجرح بيديه
يستغرب ان اللي لمسها طعونه
ابطى وهو غايب وزلت حراويه
وأنا من العام اتحرى مزونه
هومادرى اني في غيابه محاتيه
ليته نشّدعن حالي اللي يجونه
وقلبي اللي توه افلت عراويه
كيف انسرق وضلوع صدري حصونه
عجزت ارده كن ماني براعيه
يوم انتثر شوقه وهاضت اشجونه
يبسن عروقه لكن اللي يعزيه
ان اكثر العالم تردد لحونه
خافوا من الله لاتجيبون طاريه
لاصرت انا موجود لاتذكرونه
لو كل غالي جابه الله لغاليه
ماشفت لك مخلوق تبكي عيونه
.
.
.
.
لاتعتذرلي
.
.
.
ماقلت لي شي وش خليت ماقلته
اسكت وخل الكلام لجرحي الدامي
لو غيرك اللي يسولف ماتحملته
لكن على شان عينك هانت آلامي
للحب مفهوم عمرك ماتخيلته
ما أظن يستوعبه تفكيرك السامي
هذا الفراق الطويل وهذي أسئلته
هذا حصاد السنين وهذي أيامي
ياما وياما عليك البال طولته
والعمر عدى وانا عايش على أوهامي
حتى طريق الفراق اللي تساهلته
لقيته أصعب على نفسي من أقدامي
هذا قصيدي بعينك لو تجاهلته
ينزف على شان يروي قلبك الضامي
العام طاري غيابك ماتقبلته
واليوم حرماني أصبح مصدر الهامي
لا تعتذر لي وانسى كل ما قلته
وش ينفع العذر لا من ضاعت أيامي
اصبر لي شوي لو دمي تثاقلته
بحاول أستوعب اللي صار قدامي
الحب ضحكة بعينك بس ماطلته
عمرك بها الكون شفت أبسط من أحلامي
القلب لو ماخفق لك كان ماشلته
ولو ما انت ملهم قصيدي جفت أقلامي
.
.
.
شاعر تزلزل
.
.
.
مرفوض ياللى بعت غيره عشانه
أزريت عن رد الجزا أو تهاونت
مابي لك أكثر سد باب الميانه
بانت مع الوقت الخفايا وبينت
مادام مالى وسط قلبك مكانه
أنا بعد مثلك عن الحب هونت
أنا مثل خيال خانه حصانه
عذره يقول من الرسن ماتمكنت
غرّه مع المركاض وارخى عنانه
مخطى وانا غلطان يوم انى امنت
لو كنت وافى ماتخون الامانه
ياللى تقول تشيب روحك ولا خنت
ذاك الهوى لو ماشعرت بحنانه
ماكنت فى حلو القصايد تفنّنت
شاعر تزلزل من فراقك كيانه
لك يعترف مايسكن القلب غير انت
لو كان قلبك صافى الود خانه
فى ذمّتى ماهان حبّك ولا هنت
اليوم كلـن يحتفـظ فـي مكانـه
لا كان يوم به عرفتـك ولا كنـت
أحدٍ يخون وواحد الوقت خانه
أنا ترى الثانى وألاوّل تراه أنت
.
.
.
نور الشمعدان
.
.
.
كل حاجه طعمها مر فى هذا الزمـان
المكان اللى عرفناه ماعـاد المكـان
صاحبى حتى أنت ماعاد تستاهل حنان
البكا فى مثل هالحال نوع من الهوان
صاحبى لو كان للناس والدنيا أمـان
خل عنك علوم الاحباب واللى كان كان
كلما تظما لياليك قمت أكتـب عشـان
الكلام الموحش يخاف نور الشمعـدان
من زمان أكتب علشان نقرا من زمان
.
.
.
البارحه
.
.
.
البارحة مدري وش اللي خذاني
يوم أجنبوا عني من الضيقة أشملت
جيت أتكلم بس عيا لساني
ما كني إلا مرتكب ذنب وأخملت
الله يسامح من ذكرت ونساني
وأنا أدري اني لا ذكرته تجملت
عانيت وأدري كل طيب يعاني
وعلى حساب طعوني الخضر جاملت
يا ماخذوا مني ولاحد عطاني
من طيبتي في حق نفسي تساهلت
عزاي لامنه تجهم زماني
يممت وجهي للكريم وتوسلت
واللي يبي قربي وبعدي لقاني
أمشي على وضح النقا ما تختلت
.
.
.
توديع الاحباب
.
.
.
توديع الأحباب مثل الموت له سكره
ادمى جروحي وشق الصدر منيّـا
والقلب طير ضلوع الآدمي وكـره
لا شاقـه الطلـع لاسلـم ولاحيّـا
مصير الأحزان تنساني وتفتكـره
ماكل الأيام بيض وسمحـة محيّـا
قل غيرها ماأنت لامجبر ولامكره
لاصار ماهي غلا ماأبي لك حميّـا
لو في يدي شي ماقلت الوعد بكره
حزمت حدب الضلوع وقلت لك هيّا
لو كل غالي يجي دايم على ذكــره
ماصرت اشوفك هنااااااااااك وحبك هنيّا
ياليتني لابغيت اكره قدرت اكـره
ماكان قلبي ليا جيت اكرهك عيّـا
مادامك معيف رح لكن على فكـره
ماقلت لي ليه دمعـك سـال منيّـا
.
.
.
سود الليالي
.
.
.
يوم طاب السهر عيّت تطيب النفوس
جت من الله وانا كم كنت محتاجها
كنها من حلاها كل ليله عروس
خايفه من عيون الناس واحراجها
حى هالطول يازولٍ عساه محروس
من عبث لوعة الايام وازعاجها
تزعل نفوس والا تمتلى غيظ روس
من يقرّب لها وضلوعى سياجها
لامتى وانت ياشوق القلوب محبوس
طالب السالفه وابطيت بعلاجها
جعل قلبٍ على نار الغياب محموس
يحترق بين صاليها ووهّاجها
من خبر له غلا بين الضلوع مغروس
غرسةٍ كلبو شعرى من انتاجها
لاتقرب لك الفرقا هذيك الهجوس
من متى والبحور تفارق امواجها
لازم اصبر على وجه الزمان العبوس
لين سود الليالى يضحك احجاجها
من بغى يقطع الفرجه يعاف الجلوس
لين ياصل نهاياتها ومخراجها
كان شعرى قصر ماطال شمس الشموس
تستريح القصايد داخل ادراجها
.
.
.
ياوسيع البال
.
.
.
ياوسيـع البـال ضيّقـت الصـدور
رحت ماعلّمتنى ويـن أنـت سـارى
فى غيابك مـال خلـق الله حضـور
وفى حضورك مالهم بالبـال طـارى
ليـه ماتختـال يـابـدر الـبـدور
والقصايد لـك وصيفـات وجـوارى
لـك بنـات الفكـر ربـات الخـدور
يكشفن لثامهـن والجـرح عـارى
جعل قلـبٍ مامـلاه الصـدق نـور
عند وجه الريـح مايلقـى مـزارى
التغاضـى عجـز لاطـال القصـور
ليـه أدارى وأنـت بالـوضـع دارى
الزمان (ا ) قصيـر والدنيـا تـدور
كل يوم يضيق فـى عينـى مـدارى
صاحبى محتاج لك شعـر وشعـور
وإحتياجـى شـى ماكـان إختيـارى
من متى والغصـن يختـار الطيـور
من متى والبـال يختـار الطـوارى
لاتسمـى صمتـى البـارح غـرور
انكسارى خلف هالصمـت متـوارى
فى غياب الشمس وش ذنب الزهور ؟
والمطر لاشح وش ذنب الصحارى ؟
اللقـا لحظـات والغيبـه شـهـور
تقصر الخطـوات ويطـول إنتظـارى
لو قريت المنكتـب وسـط السطـور
ماكتبـت لغلطـة العمـر إعتـذارى
صمت هالمينا مثـل صمـت القبـور
مارسى مركب ولا لاحـت صـوارى
.
.
.
ودي افرح
.
.
.
مدرى البارحه ويش إفتكرت وسرحت
هى طوارى او ان هموم قلبـى ثقـال
هى طرتلى قديم الذكريـات ولمحـت
زول والا الحكايـه كلبوهـا خـيـال
هجّن ركاب فكرى بالمشاعر وصحت
منهو اللـى تغافلنـى وفـك العقـال
ضقت والبال عمس ومنقلب فوق تحت
هى من شوى يوم تفوح صفر الـدلال
ودى افرح ومن مبطى انـا مافرحـت
ودى القا عن شموس الحبايب ظـلال
كم سنه عقب مركوز النهـد مافتحـت
قلبـى ولا عيونـى للغـلا والجمـال
لو بغيت انتهز فرصات واجد ربحـت
كانت اجمل فرص عمرى تنادى تعـال
ماهـو بعيـب لازلّيـت والا جنحـت
منهو اللى بلـغ فينـا حـدود الكمـال
وانت ياللى عن حدود المحبه نزحـت
كل ماشد لـك حيلـى تشـد الرحـال
ماشكيتك لو انى من جفـاك انذبحـت
وانت شف حكمة الخالق ذبحك الدلال
لا تقول انك بذاك التصـرف مزحـت
يوم سويت فى هاك النهـار احتفـال
ماهجيتـك ولا كنـى ابـد مامدحـت
كلبوهن عقب هالعشره اكبـر محـال
صاحبى دام انا منك وعليك انجرحـت
لاتجينى على درب الخطـا والخمـال
تدرى انى تحمّلت الكثيـر وسمحـت
خابر ان التسامح من كريـم الخصـال
ليه تفهم غلط وشفيـك لبعيـد رحـت
ماطلبتك تشيـل الهـم يابـن الحـلال
ماشغل بالـى الا يـوم افكـر بنحـت
القصايـد واحفّظهـا قلـوب الرجـال
قالوا انى بترويض القوافـى نجحـت
قلت اجل كيف لو بزعل وامس الحبال
لو تخوّفت من درب الخطر مافلحـت
مايهـاب الصعـاب الا ردى العيـال
عكس تيارهم شفنى جزمت وسبحـت
ماحرصت انى اترك للتراجع مجـال
لو طموحى قريّب من زمااان استرحت
مير خابر محلى فـوق روس الجبـال
.
.
.
مرت سنه
.
.
.
مرت سنه وشهور وشويـة ايـام
على غياب اللي حلاهـا شمالـي
كم قلت في نفسي قبل عيني تنـام
يارب جبها عند ما أصحى قبالـي
تعبت ادور بيـن حزنـي والالام
عن صبري اللي ما بقى منه تالي
يابنت خليت السوالـف للاقـلام
يكفيك لا عـز الكـلام انفعالـي
من صارت الدنيا حسابات وارقام
وانا عجزت استوعب اللي جرالي
ضحيت بالواقع على شان الاحلام
وضحيت بالغالي على شان غالي
حتى الغرام اللى كسر قلبي العام
ماني بحاله كـان ماهـو بحالـي
ما بنحسب عمر البنادم بالاعـوام
بعض السنين نعيش فيهـا ليالـي
وجه التشابه بين قلبـك والايـام
القلب خالـي والليالـي خوالـي
.
.
.
حلوه عذاريبك
.
.
.
نسيتني علمني شلون أبنساك
في هالزمن نسيان الاحباب عادي ..
وشلون لامرت على البال ذكراك
وطيفك سرق مني لذيذ الرقادي ..
وشلون لا قالوا لي الناس وش جاك
من كنت في لذة منامك تنادي ..
وشلون اعيش اللي بقـالي بلياك
لامن غدينا كل واحد بـ وادي ..
لو قلت اداوي جرحي اللي تباطاك
ماكل جرح يفيد فيه الضمادي ...
اعلنت حبك لين كلن تمناك
غلطه وغيري من خطاي استفادي ...
لولي مثل قلبك تمنيت فرقاك
واكيد قبلك بالجفا صرت بادي ..
حلوه عذاريبك وحلوه مزاياك
حتى بيوم افراقنا كنت هادي ...
كن الليالي ودها تكسب ارضاك
وانا يطول مع الليالي جهادي ...
في ذمتي ماهي غريبه خطاياك
مبطي وقلبك لو تنبهت غادي ...
سهله على من كان مثلك وشرواك
مثل الثياب يغيرون المبادي ..
علمني اكره ذكرياتك وطرياك
وانسى من الليله صدوق الودادي ...
ولاني بقايل عقبها وين ابلقاك
راضي ولو جروح قلبي جدادي ....
وإلا القصايد جعلها من فداياك
لبستها مبطي ثياب الحدادي ...
باكر على المخطي يدورن الافلاك
ونشوف من يصعب عليه البعادي
.
.
.
الموت هين البلا وش ورى الموت
.
.
.
الموت هيِّن والبـلا وش ورا المـوت
عند الحساب .. يهون سهـم المنايـا
باكر نموت و تصبح قبورنـا بيـوت
وعقب القصـور بضيقـات الزوايـا
فجوف الارض وكل من حولك سكوت
و تعاقبـن بالقبـر عـوج الحنـايـا
يارب يا منجي نبيـك مـن الحـوت
سترك وعفوك يـوم كشـف الخفايـا
باكر ليا جينا علـى داعـي الصـوت
شيبـان واطفـال وشبـاب وصبايـا
ندعي وحنَّـا بيـن باكـي ومبهـوت
ورحنـا لهـا ننقـاد مثـل السبايـا
يا رب تهديني قبـل لحظـه الفـوت
وتغفـر ذنوبـي يـا كريـم العطايـا
واشكيك همٍ داخل الصـدر مكبـوت
وأيَّامـي اللـي بالخطـايـا مـلايـا
إن لاذ بك من كان طايع و مبخـوت
في مـن يلـوذ المرتكـب للخطايـا
يا رب يا قادر علـى كـل طاغـوت
لا ياقف اللـي وحّـدوا بـك خزايـا
رحماك لا منّا صحينـا مـن المـوت
واليـا وقفنـا عنـد بابـك عـرايـا
.
.
.
غير الاول
.
.
.
ضايـق البـال مايستانـس لحالـه
وأنت لاغبـت عنّـي كنـي لحالـي
جتـك الأشـواق ر جليـة وخيالـه
غير الاول تحمـل عشقـي التالـي
ليت من قال متعـب خابـت آمالـه
شاف بعيونـك الخـدرات منزالـي
واحـد فيـك ماهـو منشغـل بالـه
أشهد إنه بها الدنيـا هـو السالـي
راوي العـود يزهالـك وتزهـالـه
عاد من يقـدر يلومـه ليـا مالـي
صاحبـي والقصايـد فيـك مختالـه
وانت لك حق فيهـن يـوم تختالـي
دام نفسـك لحـب الشعـر ميـالـه
ليه مااصير شاعر وانت في بالي.. ؟
من تمنّـاك لاتنشـد عـن احوالـه
كيف عقب العسل يستطعم الحالي.. ؟
عقبك النفـس مذعـورة ومهتالـه
سود الايام هـزت برجـي العالـي
لكن القلب مـن يمـك علـى حالـه
في تناسيك ليه اكذب علـى حالـي
قلت لك : نعمـة النسيـان زوالـه
ذكرياتـك بعضهـا قـام يبـرالـي
كـل مامرنـي طيفـك علـى فالـه
قلت : يامرحبا فـي ريحـة الغالـي
شلت همك وهمـي ماحـدن شالـه
كن قلبك غـدى ياصاحبـي خالـي
ابتعدنـا وكلـن راح فـي حـالـه
بيـن هالنـاس لكـن كنـي لحالـي
.
.
.
شقر الجدايل
.
.
.
اخر اللي سمعته فـي نهـار الـوداع
دقت القلب مدري صوت عجل الخطاوي
نايف الطول وش سوابـي الانقطـاع؟
صار بين الضلوع القلب كنـه فـداوي
بيني وبين ضحكـات السعـاده نـزاع
كني اللي قضى عمره طريـدٍ جـلاوي
لا تلوم الذي سـوى لـك المستطـاع
خف من الله وخل جروحنا بالتسـاوي
عن هذيك النواعس ليه شلت القنـاع
الحيا وين يلي طول عمـرك حيـاوي
كن في خدك الطاهر بـروق وشعـاع
اثرها رحمةٍ للناس بعـض الغشـاوي
وش يفيدك عذابي ياغريـب الطبـاع
ليه دايم على الملتاع سيلـك نحـاوي
امتلي غيض وازعل يوم وارجع بساع
راعي الجرح يستحمل عذاب المـداوي
غالطوني وقالـوا ليـش هالاندفـاع
ادوخوني عليـك مكثريـن الحكـاوي
عذربوك بوجـودي بالجفـا والخـداع
فيك حلو الوصايف صوروها مسـاوي
التزمت السكوت ورأيهم فيـك ضـاع
لين قالوا ترى متعب على البعد نـاوي
ميت القلب عرضـت الغـلا للضيـاع
والله اني على قطع الرجا بك مـراوي
ماتغيرت ليـن انـك لويـت الـذراع
تحسب اني على الهجران ماني بقاوي
لوتقول انت ماعقب الفـراق اجتمـاع
عندي اليوم كل اللي تقـول متسـاوي
ولو يقولون صار يخاف قلب الشجـاع
من هك الليله وبيت القصيد امتهـاوي
بين شقر الجدايل والعيـون الوسـاع
اذكر اني فقدت القلب في هالحـراوي
.
.
.
وهذا بيت على السريع
.
.
الله يسامح من ذكـرت ونسانـي
وانا ادري انـي لاذكرتـه تجملـت
.
.
.
عند الكريم انفراج
.
.
.
ليه وطيت عن خيل القصيد السروج
ليه مديت لي عقب القراح الهمـاج
لاتكملي الغلطـات والعـوج عـوج
يضحك حجاج ولاينعقد لـي حجـاج
إصبرشوي وشعلمك تهوج وتمـوج
ميت القلب مثلك مايعـرف الهيـاج
ماتعودت اجامـل معتليـن البـروج
الزم العلم قبل يصير هرجك سمـاج
المشاعر تجي مثل المعاصيرهـوج
وانت مالك على هوج الرياح احتجاج
جيت وقلوب حسادي تهيج وتـروج
لاصفا جوهم ساعه قفـاه العجـاج
ابتسملك وهمي فوج يقفـاه فـوج
من يحبك لزوم يصير مثلك هجـاج
بس قلي وانا غلطان لك ومحجـوج
وين يلقون لجروح النواعس علاج!!
القمرغاب وأنت اطفيت نور السروج
قلت يكفيك نورالوجه لا اصبح سراج
كن بين الضلوع العوج صفقات موج
يوم فاض الغلا والشوق والقلب هاج
ضيقة الصدر لو بين المحاني تلـوج
كل ضيقه لها عند الكريـم انفـراج
ماهوالغيظ سبة كل ابـو هالهـروج
بس مالي على بعض السوالف مزاج
.
.
.
جابتني الذكرى
.
.
.
جابتني الذكرى على الماضي كتاف
سجيـت كنـي تونـي مكتشفـهـا
سرى بي الهاجس ومريت الاطراف
دوجت حـول الساعتيـن بطرفهـا
نعم تذكرت الزمـان الـذي طـاف
غديت مثـل اللـي عيونـه طرفهـا
لي في غرام(ن) فات كلمه وميقـاف
لولا خفوقي هـام بـك مـا وقفهـا
اول غيابـك قلـت مابـي خـلاف
واليوم شف حالـي غيابـك تلفهـا
تجهل جروحي ياللي جروحك خفاف
معذور لو قلبك جهـل مـا عرفهـا
ياليت مجروح الهوى جرحه يشـاف
لقول قرب مـن جروحـك وشفهـا
شفها بعينك كانـك مـن الله تخـاف
حـاول تصلـح غلطتـن مقترفهـا
العمر لامنـه خـلا منـك ينعـاف
في حال والا حـال غيـر تعرفهـا
قدام عينـك لـو تطلعـت وخـلاف
تلقى الخفايا خاطـري لـك كشفهـا
خايف ومن مثلي معه حق لو خـاف
تبعـد ونفسـي ماتحقـق هدفـهـا
ماللهوى عندك مواثيـق وانصـاف
ماكـنـه الا لعبـتـن محترفـهـا
اليوم لو ذكراك ترجع بـي خـلاف
محبتـك سيـل التهايـم جرفـهـا
::
::
::
::
::
::
::
::
::

ارجوو ان تنال القصائد على اعجابكم

::
::
::

ودمتم بود

الموضوع الأصلي: (( ديوان )) الشاعر : متعب التركي || الكاتب: راجـع ضمـيـرك || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::

تعليقاتكم البناءه هي طريقنا لتقديم خدمات افضل فلا تبخل علينا بتعليق

ولآ اروووع

إحسأس وإبدآع رآقي

صح السآنه على هالروآئئئع وسسسلم قلبـك


كلك ذوووق .. دمت بود

جــــنــــون الــــحــــب



تــــعــــلـــيــــقــــج هــــو الــــرآقــــي



وأســــعــــدنــــي مــــرـوـرج

راجع ضميرك


مساء الخير ..... اخي العزيز

يعطيك الف عافية على النقل الرائع والجميل للشاعر

التركي ..... من تميز الى تميز اجمل .... في سما الجبلان


تقديري وتحياتي

اخوكــــــــــــــــــ

سلطان الجبلي

مساء الانوار


ربي يعافيك


الاجمل هو تعليقك يالذيب


ومواضيعي تمتاز بعليقاتك عليها


لاهنت عـ المرور

شاعر كبير واحساس راقي

متعب التركي بحد ذاته روعه

اشكرك اخوي راجع ضميرك على انتقائك الجميل والموفق

يعطيك الف عافيه على مجهودك بجمع القصايد


وتحيه

يعافيك ربي




الاجمل والاروع هو تعليقك




أخوي ملحوس نورت الصفحه بمرورك